INTRODUSAUN

VIII Govornu Konstitusional hato’o ona proposta OJE 2020 ba Parlamentu Nasional, no Parlamentu Nasional halo ona audensia ho entidades sira hanesan NGO Nasional/Internasional, Bancu Central, Uniâo Europia, Bancu Mundial, no entidade sira seluk mós. Objetivu husi audensia públiku, atu Parlamentu Nasional bele hetan pareser ka hanoin balun relasiona ho proposta Orsamentu Jeral Estadu 2020.

Iha inisiu proposta OJE 2020 liu husi Envelope Fiscal, iha senariu tolu, no husi senariu tolu ne’ebé bót liu mak propoin biliaun US$1,6,governu uza metris ka sukat katak bainhirauza senariu tolu ida ikus ho propoin biliaun US$1.6, konsidera kategoria ne’ebé laiha sustentabildiade fiscal, no kontinua lori Fundu Minarai ba risku, maske nune’e proposta OJE 2020 final, governu propoin kedan biliaun US$1,950. Ho proposta OJE ne’ebé atinji biliaun US$1,950 hatudu katak governu nafatin laiha komitmentu ba planu inisiu, hanesan akontese mós iha tinan rua kotuk liu ba (2018 no 2019), ne’ebé la tuir ona prinsipiu sustentabilidade fiscal.

Bainhira halo komparasaun estrutura proposta OJE 2020 ho OJE sira ne’ebé liu ona, estrutura proposta OJE 2020 bele dehan rungu-ranga oituan, tanba kategoria orsamentu balun la hatur tuir nia fatin, hanesan orsamentu ne’ebé tuir lolos iha kategoria Kapital Dezenvolvimentu, forma fali iha kategoria transferensia (Tokon US$21 ba Min. Edukasaun hodi halo konstrusaun Eskola), nune’e mós orsamentu ne’ebé tuir lolos iha kategoria Kapital Minor forma fali iha kategoria Bens e Servisu (Sosa roo hodi halo patroilhamentu).

Tabela OJE 2018–2020


 

 

 

 

 

 

 LEVANTAMENTU FUNDU MINARAI VS RESEITAS DOMESTIKA 


Levantamentu Fundu Minaria hodi halo investimentu liu husi Orsamentu Jeral Estado, iha tinan hat ikus (2015–2018) gasta ona biliaun US$4,584, inklui levantametu ne’ebéexcede ka liu Rendimentu Sustentavel Estimadu (RSE) hamutuk biliaun US$2,369, no Lei Fundu Minarai fó dalan atu bele foti liu 3% RSE, importante tenki justifika razaun nune’e mós anno fiscal tuir mai tenki iha redusaun ba3% RSE no garantia sustentabilidade Fundu Minarai, hodi benefisia ba jerasaun ohin nune’e mos jerasaun tuir mai, notenki garantia porsentazen husi liu 3% RSE fó fali retornu signifikante ba estadu, infelismente excede 3% RSE durante tinan hat ikus, seidauk bele garantia hodi hetan reseitas ba atinji tokon US$200, no atu selu deit makina estadu kada tinan liu husi salariu e vensimentu mós la to’o.

Pie iha sorin hatudu durante tinan hat nia laran, governu halo levantamentu ba Fundu Minarai inklui foti liu 3% RSE hamutuk ona biliaun US$4.584, maibé konsege rekoilha deit 16% (tokon US$ 750) liu husi reseitas domestika, se sura nia rendimentu liquidu, governu konsege hetan deit tokon US$13, durante tinan hat nia laran (2015–2018), signifika investimentu liu husi OJE kada tinan La Los no kuaze fó benefisia ba makina estadu ne’ebé kontinua boot no bokur, porezemplu ba tinan 2020 governu kontinua propoin orsamentu boot liu to’o 71% husi total proposta (Rekorenti)hodi finansia makina opersional duke investe iha seitor dezenvolvimentu ekonomia.

Hau hanoin governu persija muda nia estrutura orsamentu, no koloka tuir nia dalan hodi hafasil atu kontorola no tenki iha seriadade ona hodi halo investimentuba seitor produtivu hanesan Turizmu, Agrikultura, Peska, manufaktura, edukasaun, no Saude hodi bele fóreseitas ekonomiku ba Timor-Leste ne’ebé sustentavel duke fasilita ba makina estadu. Atu fó hanoin katak durante Fundu Minarai estabelese, governu haloona levantamentu hamutuk biliaun US$11,027 (to’o fulan Julho 2019).

Liga ba politíka governu hodi hasa’e reseitas domestika, liu husi Komisaun Reforma Fiscal (KRF), ne’ebé parte hodi garantia rekoilhamentu ba reseita estadu, seidauk hatudu performa diak hodi atinji tokon US$450 iha tinan 2020 hanesan tarjetu husi Komisaun Reforma Fiscal, tanba depois komisaun estebelese iha tinan 2015 to’o 2018, rekoilha deit tokon US$13 (rendimentu liquidu)no komisaun rasik nia despeza hamutuk tokon US$12, hatudu katak politíka deit labele hodi hasa’e reseitas domestika, maibé persija iha asaun konkreta liu husi investimentu seitor produtivu, no politíka estadu hodi fó free tax ba visa prejudika mós estadu hodi hasae reseitas, tanba iha tempu hanesan data estatistika trimestral terseiru (Juli–Setembru 2019) hatudu ema estranjeiru aluga ka hela iha hotel liu husi Industrial Akomodasaun sae (2%), se porsentazen ne’e mak estadu la fó vistu livre ba ema estranjeiru, sei fó vantazen ba reseitas domestika, karik governu hanoin parte husi stratejia atu atrai investidores, no turista sira maibé keta haluha katak iha Janeiru 2019 directur SERVE deklara katak kuaze emprezariu rihun ida nia atividade laiha ka suspense iha tinan 2018, no KRF nia papel ida hodi atrai investidores hodi investe mak ne’ebé?

DESPEZA VS KAPASIDADE EZEKUSAUN


Proposta OJE 2020 konsidera orsamentu ne’ebé bót, sa’e 24% (tokon US$473)husi OJE 2019, kategoria orsamentu ne’ebé sa’e makas liu iha kategoria Bens e Servisu, reprezenta 32% husi total proposta OJE 2020. Bazeia ba fonte orsamentu estadu 2020, governu rekoiñese katak sei labele ezekuta tokon US$200 husi orsamentu anno fiscal 2019, nune’e reorsamenta ba anno fiscal 2020, maske nune’e governu nafatin halo levantamentu ne’ebé bót liu nia kapasidade hodi ezekuta.

Se ita uza referensia kapasidade ezekusaun orsamentu kada tinan, husi tinan lima ikus (2014–2018), hatudu kapasidade ezekusaun average kuaze 75%, hanesan grafiku hatudu, hau nia pergunta mak, tanba sá tenki halo levantamentu ho valor bót liu? Bainhira haree espesifiku fali ba kolokasaun orsamentu tuir nia seitores, 42% koloka ba estrutura institusaun no 9% deit ba seitor dezenvolvimentu ekonomia, hau hanoin katak governu ida ne’e kontinua hafraku no hodi Fundu Minarai ba iha risku nia laran, inves de muda estrutura orsamentu hodi investe iha Seitor Dezenvolvimentu ekonomia hodi garantia retornu iha future, duke halo todan makina liu husi despeza 42%.

GOVERNU PERSÍJA HASA’I KUSTU BALUN NE’EBÉ LÁ NESESÁRIU
Proposta Orsamentu OJE 2020, konsidera orsamentu bót depois Orsamentu anno fiscal 2016, no husi proposta OJE 2020 porsentu bót ne’ebé governu koloka ba orsamentu rekorenti, reprezenta 71%. Hau senti preokupa ho nia kolokasaun ne’ebé kuaze fasilita ba makina estadu, no kuandu haree spesifiku husi orsamentu kategoria bens e servisu tokon US$727, 29% koloka hodi fasilita makina estadu liu husi: Material fornesimentu ba eskritoriu, material fornesimentu ba operasional no mós despeza operasional inklui rubrika ida konaba catering services.

Seidauk inklui kustusira hodi sosa transporte (Veículos) ho tokon US$ 19, fasilidade komunikasaun, fasildiade mobiliario (Kapital Minor), no kustu seluk ne’ebé governu prepara hodi selu ema professional de service sira reprezenta 15% husi bens e servisu, no kuandu hateke fali tinan lima ba kotuk (2015–2019) governu kuaze gasta osan hamutuk tokon US$464 ba professional de servicu sira, sera ke estrutura governu laiha liu kapasidade hodi governu tenki gasta osan bót ba ema professional servisu sira? proposta OJE 2020 ho 15% husi bens e servisu ba Servisu professional/professional service, hau hanoin katak tenki muda ona politíka hodi halo redusaun masimu, atu labele kria fali hanesan estrutura governasun dupla tanba kustu ba selu professional service metade husi salariu e vensimentu, hau hanoin politíka poupansa husi S.E. Primeiru Ministru Taur Matan Ruak tenki tau ona iha pratika no tenki defini programa ne’ebé nesesariu liu hodi garantia retornu ekonomiku ba estadu, tanba ita hotu hatene retornu husi mina no gas hahu ki’ik no iha tempu hanesan labele garantia ba reseitas domestika, tanba reseitas domestika rasik depende fali ba despeza estadu kada tinan.

Hau hanoin katak, atu ita labele kontinua fó todan ba Fundu Minarai, persija halo redusaun ba kustu sira ne’ebé la merese no la nesesariu, hanesan kria iventu, partisipa iventu iha rai liur (Expo Internasional iha Dubai), inklui kustu sira balun ne’ebé temi ona iha leten, nune’e mós persija iha avalisaun ba kustu liu husi Fundu Dezenvolvimentu Capital Humanu (FDCH) atu define, rekursu ida oinsa mak Timor persija tanba desde FDCH estabelese gasta ona tokon US$209 (Cash) no iha proposta OJE 2020 mós husu tan osan tokon US$23, no husi gastus hirak ne’e (tokon US$209)kuaze fó prevelezu ba funsionariu públiku sira (Kustu ba formasaun Funionariu Públiku 53% no ba Públiku 47%)hodi hasae kapasidade, no governu mós fó tan bolsu estudu ba Funsionaroiu Públiku sira hamutuk 72% no ba públiku hetan deit 28%. Tanba ne’e hau hanoin tenki avalia fali hodi haree rekursu sira ne’ebé hetan ona prevelezu liu husi formasaun no bolsu estudu,ida ne’ebé nasaun persija no merkadu persija.

DEZENVOLVIMENTU SEITOR PRODUTIVU


Iha panorama proposta orsamentu 2020, governu rekoiñese folin mina mundial la stavel, no fó impaktu negativu ba rendimentu fundu minarai, maske nune’e, governu kontinua hodi tau inportansia ba halo investimentu iha seitor mina no gas, bele haree espesifiku husi planu VIII governu ioha tinan 2020 hodi halo imprestimutokon US$750 no projekta sei uza metade (47%) ba projetu tasi mane. Sosiadade civil, Academia, Emprezariu no públiku bain-bain dala barak sempre fó rekomendasaun ba governu hodi halo investimentu ba seitor produtivu sira hanesan Turizmu, Agrikultura, Peska, manufaktura, edukasaun, no Saude hodi bele husik dependensia ba mina no gas.

No liga ba proposta OJE 2020, pesoalmente apresia VIII Governu konstitusional ba seitor produtivu hat liu husi Ministeriu Turizmu, Komersiu no Industria, Ministeriu Agrikultura no Peskas, Ministeriu Saude, no mós Ministeriu Edukasaun iha tinan ne’e (2020) grafiku hahu sa’e, no ne’e diak, hodi seitor hat ne’e bele sai duni forsa ida (Finanseiru no rekursu umanu ne’ebé preparadu) no ho grafiku ne’ebé sa’e nia orientasaun tenki hatudu nia rezultadu, porezemplu Ministeriu Agrikultura no Peskas, governu koloka orsamentu liu husi Fundu Infrastrutura iha tinan 2017–2019 hamutuk tokon US$9, ba konstrui no rehabilita irigasaun atu garantia garantia hodi redus inportasaun, mal nutrisaun, no hamlaha, maibé dadus husi Global Hunger Index 2019 (GHI), hatudu nasaun Timor-Leste konsidera kategoria nasaun ho problema nutrisaun no hamlaha ho valor 34.5% okupa fatin 110 husi nasaun 117. Hau hanoin katak grafiku orsamentu ba seitor produtivu importante maibé tenki kontrola ho masimu atu nia finn hatudu duni rezultadu la’os fasilita ka koloka barak liu jerente estadu. (Hakerek Nain: Jonathan Gonsalves)