Kampu Greater Sunrise nudar futuru esperansa hodi eleva receitas ba kofre estadu. Nunee sei tulun sustentabilidade osan minarai ba Timoroan tomak husi jerasaun ba jerasaun. Fundu Petrolifera (FP) nudar oxigênio nasaun, tamba husi FP mak finansia Orsamentu Jeral Estadu (OJE) kada anum ba seitor dezenvolvimentu nasional. Saida mak FP?.

FP mak receitas nebee governu TL simu husi rezultadu produsaun faan mina no gas iha Tasi Timor. Durante nee TL nia FP mai husi deit receitas kampu minarai Elang Kakatua nebee deskobre iha 1994-1997, kampu minarai Kitan deskobre iha 2008, enkuantu kampu Bayu Undan deskobre iha 1995. Kampu minarai hirak nee tama ona iha faze dezenvolvimentu ou produsaun, nunee sedu ou tarde produsaun sei remata ou la ekonomis.

Kampu Bayu Undan (BU) hahu produs LPG ou kondensadu iha 2004 no LNG (gas) hahu produs 2006. Estimasaun projeitu BU nia life time to’o tinan 2022. Kampu BU kontribui ona receitas ba kofre estadu purvolta $30 é tal billioens dollares amerikanu. Husi receitas $30 bilioens é tal, purvolta $13 bilioens mak uja ona ba despeza publiku depois de independensia 2002 ate to’o agora no futuru. Nunee fundu petroleum (FP) agora dadaun rai iha banku federal US purvolta $17 é tal billioens dollar amerikanu.

Alteração Lei Fundo Petrolifero iha art. 15.º A, n.º 1 dehan FP bele aplika direitamente ba operações Petroliferas, liu husi celebração transacões comerciais neebe kompanya minarai nasional Timor gap celebra. Lei Fundo Petrolífero estabele ho base iha art. 139.º n.º 2 CRDTL neebe koalia kona ba aproveitamento recursos naturais sira tenki sai reserve finanseiru obrigatoriu katak sai fundo soberano ba RDTL.

Nudar fundo soberano, fundo nee pertence ba Povo. Nunee, Governo nudar orgão soberania ida atu foti osan husi FP hodi Financia OJE tenki hetan aprovação liu husi OJE iha PN nudar órgão soberania ida no hetan promulgação husi PR. Dala barak mos ita koalia konaba diversifikasaun, maibe realidade rezultadu TL nia diversifikasaun zero ou ki’ik tebes. Iha parte seluk dadus hatudu tusan ou debe ba nasaun aumenta ba bei-beik, TL nia debe hamutuk $452 millioens dollars hodi konstrui estrada iha teritoriu TL, nunee mos receitas domestika TL nia sei kiik tebes.

Dadus hatudu 2018 ita nia receitas domestika kobra deit $198 millioens dollar amerikanu. Tamba nee karik OJE kada anum mak kontinua sae to’o $1.4 é tal billioens dollars mak estimasaun FP bele hotu iha tinan 12 ou 13 nia laran. Atu asegura sustentabilidade FP no dezenvolvimentu husi jerasaun ba jerasaun mak tenke investa makas iha seitor produktivu, inklui investimentu iha seitor minarai identifikadu hanesan iha kampu Greater Sunrise (GS) nudar alternativa hodi sustentabilija FP wainhira kampu BU la ekonomis iha 2022.

Investimentu ba kampu GS sei kompostu husi; kustu ba fasilidade marine, instalasaun pipeline, hari planta LNG ou fasilidade prosesaun (surface facilities) to’o marketing purvolta $7.9 billioens dollars no investimentu kustu ba esplorasaun, perfurasaun, ekstraksi ou foti mina no gas husi tasi okos total $2.6 billioens dollars, nune’e total Investimentu ba dezenvolvimentu kampu GS hamutuk billaun $10.5.

Osan billaun $10.5 ne’e sei la foti husi Fundu Petrolíferu maibe bele foti husi Emprestimu (Fontes informasaun; Timor Gap). Importante mak bele impresta halo investimentu maibe tenke iha certeza. Kampu GS fo certeja boot ba governu TL hodi halo imprestimu (loan) tamba kampu GS iha potensia rezervatoriu gas 7.7 tcf (trillion cubic feet) no mina 300 MMbbls (kondensadu no LPG) boot liu rezerva gas iha kampu Bayu Undan ho rezerva gas 4 tcf no mina 550 MMbbls, nunee kampu GS potensia boot sei haksubik hela osan $ 28 billioens to’o $50 billioens dollar amerikanu.

Nee foin benefisiu direita, seidauk kalkula ho benefisiu indireita ou spin off. Profit indikator nebee bain-bain uja iha industria minarai mak; NPV, IRR, B/C, no POT. Kompanya sempre investa wainhira valor IRR boot liu minimum actractive of return (MARR). Analizasaun project economics nudar sasukat ba companya operador, joint venture no host country foti desijaun ba dezenvolvimentu projeitu kampu GS.

Dalang stratejiku atu asegura futuru sustentabilidades FP no garantia kontinuidade industria petrolifera mak governu TL tenke kontinua investa fundu ba aktividades explorasaun minarais no gas. Aktividades explorasaun mak aktividades sira nebee ligadu buka no deskoberta mina no gas hodi garantia sustentabilidade FP ba jerasaun agora no futuru.

Koalia konaba sustentabilidade finanseiru minarai ou FP?, kalkulasaun oinsa?, mekanismu investa oinsa?, Timor Gap no ANPM nudar orgaun reguladora aktividades petroleu iha sira nia domain. Entidade ou orgaun idak-idak iha kompetensia no domina nia area. Orgaun idak-idak mos iha constraint. Tenke honestu!. Esperiensia nasaun dezenvolvidu, sira sempre halo adjustamentu ba lei ou alterasaun ba lei wainhira lei refere la fo vantajem no la fungsiona tuir nia tempu.

Ho mudansa evolusaun no tempu, intensifikasaun investimentu no teknolojia hodi hasa’e produkividade no kompetitividade, nasaun presija adopta an no moris tuir mudansa no tempu. Hanesan mos uluk Governu TL lideradu pelo S.E Xanana Gusmao halo investimentu fundu minarai ba iha Equity nebee nia rezultadu kontribui ona osan $5 billioens dollares ba rendimentu FP.

Obra boot nebee ita no publiku presija fo apresiasaun. Importante mak ita brani investa maibe tenke avansa ho estudu nebee klean no klean, iha data, analiza ekonomia no komersial tuir pratika standarte industria minarai. Investimentu iha area petrolifera sensitivu tebes kompara ho investimentu iha area saude, edukasaun, agrikultur no turismu.

Investimentu iha area petrolifera, ita hasoru mafia bisnis, hasoru kompanya minarai sophistikadu ho esperiensia tinan 50 ba leten, hasoru forsa politika externa, no ect. Investimentu iha seitor minarai asosia ho high tech, high skill, high risk no high cost. TL tenke buka hatene no brani, halo investimentu no hola risku, hare ba oportunidade global tuir boa pratika standarte internasional industria minarai nunee ita bele kontesta globalmente ho kompanya minarai seluk.

Atu atinje nee, Timor Gap (TG) nudar kompanya minarai nasional Timor nian presija iha modalidade hodi halo kompetisaun. Importante mak governu presija hahu tau fiar ba Timor oan no kompanya minarai nasional hodi partisipa direitamente iha industria minarai, nunee bele transfer siensia no teknolojia ba Timor oan no TG rasik, wainhira Timor oan preparadu, Ita bele jere rasik ita nia rekursu. Nunee mos TG bele sai kompanya provider ou service global ba aktividade industria minarai.

Nee stratejia ida nebee importante tebes presija tau iha seriedade. Diak liu uja FP halo investimentu hodi buka osan minarai seluk ou bele mos husi debe (loan) hodi garantia sustentabilidade FP. TL via TG nia partisipasaun 56.56% iha kampu GS presija mos konstrui modalidade husi TG. TL la bele hasai osan minarai finansia atividade non produtivu (konsumu) nebe harisku fundu minarai bainhira minarai hotu.

TL tenki berani hasai osan hodi halo investimentu nunee bele diversifika ho sustentabiliza rendimentu ba nasaun. Timor Gap ep. sei la asesu direitu ba max 5% fundu minarai hodi halo investimentu. Governu via KM, MF ho BCTL mak sei prosesa pedidu Timor Gap ep hodi uza 5% ba investimentu. Instituisaun governu sira nee sei filtra uluk. Tamba nee hanesan mos atividade governu, nunee Tribunal Rekursu ho PN iha nafatin otorisasi hodi halo fiskalizasaun ba osan max 5% husi fundu minarai nebee Timor Gap husu ho uza.

Iha investimentu, fator save mak opportunity, timing, lais, flexibility, analiza risku ho profit. Tamba nee presiza duni desizaun lais hodi halo investimentu se momentun ho oportunidade investimentu nee diak hodi hetan retornu diak. Se hasai osan fundu minarai ba investimentu liu husi OGE nee presiza tempu (tinan ida), nunee Timor Gap bele lakon oportunidade ho momentun hodi halo investimentu no hetan lukru.

Iha futuru Timor Gap (TG) sei la simu receitas rezultadu produsaun mina no gas iha kampu greater sunrise, nunee receitas husi kampu GS sei transfer direita ba fundu petrolifera (FP) hodi sustentabilija no komprimenta lei FP. Importante mak prosesu tomak inkluzivamente tenke nakloke, transparante, check and balance, akuntabilidade, iha supervijaun no iha fiskalijasaun nudar boa komitmentu hodi asegura no garantia bom investimentu ba jerasaun agora no futuru.

Tamba nee diak liu hahu agora tenke halo investimentu boot ba rekursu humanu, hamoris treinamentu no kapasitasaun ba jovem no foin sae sira, fo certifikasaun no hasa’e sira nia kompetensia nudar meius hodi prevene infiltrasaun servisu nain husi liur no garantia oportunidade ba Timor oan nudar rekursu nain.

Investimentu governu anterior ba projeitu tasi mane nebee konsume ona $1 é tal billioens dollars amerikanu ekonomikamente viavel wainhira pipeline mai TL. Projeitu tasi mane nebe involve suai supply base, refinaria betano, planta LNG beasu, sentru elektriku betano no auto estrada Suai-Beasu nudar prekondisaun hodi garantia pipeline mai TL, tamba nee la bele pesimista.

Step tuir mai, Governu TL tenke kontinua intensifika investimentu. Tamba ho realijasaun Fronteira Maritima (FM), ikus mai TL mak maioria sei sai benefisiariu entermu de fahe rezultadu ou rendimentu, royalty, impostu, reimbolsa kustu kapital 100 + 127%, fornesementu bem servisu 90% sei mai husi TL ou sujeita liu husi TL, fornesementu equipamentus no apoiu lojistika, karantina sei liu husi TL.

Dezenvolvimentu kampu Greater Sunrise (GS) sei tulun diversifika rendimentu ba estadu, hamosu multiplier effect boot ba ekonomia nasaun, transfer teknolojia, konhesementu, no skills ba jovem no foin sae sira, hamoris investimentu seitor privadu, hamoris investimentu iha area turismu, edukasaun, saude, peskas, agrikultura, hotelaria, infrastruktura, emprendedorismu, no ect. Resultan mak TL 90% sai benefisiariu, liu-liu expanda TL nia ekonomia sai independente no berdikari.

Pontu principal nebee atan hau aprofunda mak; so Timoroan rasik mak bele dezenvolve nia rai, la iha nasaun ida iha mundu ema seluk mak ba dezenvolve fali nia rai. Tamba nee, diak liu kontinua investa makas ba rekursu humanu no hahu tau fiar ba Timor oan ou kompanya minarai nasional Timor Gap E. P., hodi jere no dezenvolve nia rekursu iha rai rasik. God bless TL. (Husi: Teodoro M. Mota)