Iha jornal Business Timor edisaun semana kotuk, fó sai notisia kona-ba halerik komersiante Merkadu Manleuana nian katak sira nia sasan la folin tanba ema sosa-na’in sira ladun ba merkadu refere. Sira halerik tanba Merkadu Manleuana la’os funsiona nudar fatin ema fa’an no sosa sasan maibe barak liu funsiona ba estudante sira asesu internet gratis ne’ebé governu monta iha ne’ebá.

Politika monta internet gratis iha merkadu ne’e hahu iha tempu kintu governu liu husi sekretaria estadu ba komersiu, ministeriu komersiu industria no ambiente - MCIA nian. Politika ne’e ho intensaun atu dada ema barak ba Merkadu Manleuana. 

To’o ohin loron politika ne’e laiha vantajen diak no labele rezolve problema. Ema sosa na’in sira lakohi ba Merkadu Manleuana tanba komersiante barak hili mantein fa’an sasan iha eis merkadu Komoro, balu hili fa’an iha dalan ninin hanesan kruzamentu Delta nian maski governu bandu. Nune’e konsumidor sira mos lakohi kolen no soe tempu ba to’o Merkadu Manleuana no hili sosa sasan iha merkadu ilegal sira ne’ebé besik.

Ida ne’e fo dezvantajen ba komersiante “kumpridor” ne’ebé fa’an sasan iha Merkadu Manleuana. Ho komersiante sira timoroan ne’ebé soi lisan (karakter) ulun-toos lakohi kumpre orden governu nian ne’e, sai problema governu nian ne’ebé to’o ohin loron seidauk hetan solusaun atu rezolve. 

Iha fulan rua kotuk, iha koluna opiniaun jornal ne’e hatun hakerek (tulisan) kolega Arif Budisusilo, xefe redasaun diáriu Bisnis Indonesia nian ne’ebé hatete katak iha tataruk fila-liman (kompetisaun negósiu) nia laran, xineza sira iha “Kia” rua.

Primeiru mak Kia su, katak ta’uk lakon (kalah), no tanba ne’e iha atividade fila-liman lakohi lakon ho ema seluk. Nia prova hatudu iha mundu tomak vida komersiu nian xineza sempre domina. No daudaun iha ita nia rain, lidun sira sidade Dili to’o suku sira mos zing-zang domina hotu. Depois iha Kia si katak ta’uk mate, no tanba ne’e lakohi mate no tenke luta nafatin atu bele moris. 

Maibe iha xineza Singapura sira ne’ebé nu’udar sidadaun maioria iha nasaun illa ki’ik-oan ne’e, soi Kia tolu. Alende Kia rua iha leten, xineza Singapura nian soi mos Kia cheng hu, katak TA’UK GOVERNU.

Iha Singapura, hanesan Arif Budisusilo haktuir iha nia hakerek (membru governu no diretor ho funsionariu publiku sira ne’ebé halo estudu komparativu iha Singapura pasti hatene ona), sidadaun Singapura rasik no ema tasi-balu sira ne’ebé hela iha nasaun illa ki’ikoan ne’e ta’uk tebes Governu Singapura tanba sempre fo sansaun maka’as ba nia povu ne’ebé viola lei. Iha Singapura ema ta’uk soe lixu arbiru, ta’uk fa’an sasan iha fatin ne’ebé governu bandu, ta’uk tafui arbiru iha fatin ne’ebé  deit, no seluk tan tanba sansaun todan. Alende tama sela ka prizaun, sidadaun sira ne’ebe viola lei tenke selu multa ka koima ho osan boot.

Matebian Lee Kuan Yew, xineza ida ne’ebé sai Aman Fundador Nasaun no Estadu Singapura ne’ebé sai primeiru xefe governu, figura ida ne’ebé vizioner, no mos firme ukun Estadu Kota Singapura ho “liman-besi” alias ditadura. Ukun ho liman-besi ne’e banati tuir husi lideransa nasional Singapura husi jerasaun ba jerasaun. Ukun ho liman-besi ne’e nia halo rai ki’ik oan tebes hanesan Singapura sai nasaun ho spirit ekonomia beilera (jigante) nian, lakohi mate, lakohi lakon no tenke sai aswa’in (manan-na’in). 

Bainhira lee istoria kolega Arif nian, fó-hanoin-kona mai ha’u esperiénsia ida iha Australia tinan 2010. Esperiensia ki’ik-oan ne’e (la’os estudu komparativu) hetan liu husi programa fellowship husi Governu Australia liu husi Asia Pacific Journalist Center – APJC, tuir formasaun leadership media nian. Iha loron feriadu Paskua 2010 nian, kolega australiana ida tene (konvida) ba pasa ferias hamutuk ho nia familia no viziñu sira ba iha fatin peknik ne’ebé dook. Sai husi sidade Melbourne ba tama liu tiha fronteira rai entre Estadu Rejiaun Victoria ho New South Wales ka besik Cambera nian han oras lima nia laran. 

Durante viajen ho kareta modelu sedan ki’ikoan ida, kolega aurtraliana ne’e  sempre fo atensaun tebes ba sinál-sira tráfegu nian iha dalan. Bainhira sinál tráfegu (rambu lalu-lintas) hatudu númeru 100 km/h  velosidade maximu nia halai ho velosidade tuir ida ne’e, labele liu. Besik tama bairru ka sidade ruma sinal tráfegu hatudu 50 km/h, nia hatun velosidade maximu 50 km/h. Se la tuir regra ne’e polisia sei fo sansaun multa osan.

Iha loron tuir mai, ami na’in rua ba sosa sasan iha knua ka kota ne’ebé besik, to’o kareta para iha loja oin, nia deskobre ha’u la uza sintu seguransa (toman aat iha ita nia rain sa’e kareta nunka kesi sintu seguransa). Ho oin sériu nia hetete atu labele haluha kesi sintu bainhira sa’e kareta tanba ne’e kontra lei no hetan sansaun maka’as husi orgaun kompetente. 

Nune’e mos bainhira atu fila husi peknik iha area remotas ne’e, ailaran dook husi sidade, australianu sira ne’e haloot fali lixu husi aihan no hemun (bebidas) fatin uzadu tantu kalen, plástiku no surat-tahan sira tula fali ba kareta hodi fila no soe ba fatin lixu ne’ebé prepara iha knua ka kota sira be besik. Fatin ne’e maski ai-laran tenke moos husi lixu.     

Sira kumpre maka’as regra ka halo tuir lei, tanba ta’uk sansaun selu multa. Iha Australia, hahalok sira la bali meiu ambiente hanesan soe lixu arbiru, fuma sigaru iha fatin ne’ebé bandu fuma, viola regra tranzitu, husik animal (asu, manu, bibi, fahi, kuda, nst.) livre tama iha fatin publiku selu koima minimu liu AUS$200.00 (Dolar Australia atus rua). 

Iha pratika timoroan sira nian, governu bele tau avizu ho kuadru boot hakerek “Labele soe lixu iha ne’e” nunka fo influensia ka konvense sidadaun hotu, hetok halo sira soe lixu nafatin. Ita timoroan sira la soi “Kia cheng hu” ka Ta’uk Governu hanesan xineza sidadaun  Singapura. Maski governu fasilita ona halo merkadu, bandu atu labele fa’an iha estrada ninin ka trotoar leten, hatun forsa seguransa sivil duni sira, komersiante sira ulun toos nafatin. Dader duni sai husi fatin ida, lorokraik mosu fali ona.

Mosu pergunta iha ita laran, tanba sa buat hirak ne’e mosu nafatin? Tebes ka timoroan sira la ta’uk governu no lakohi hakruuk ba lei? Ita haree fali esperiensia iha tinan rua liuba bainhira Diresaun Nasional Transporte Terrestre servisu hamutuk ho Polisia Unidade Tranzitu nian aplika multa ka koima ba sidadaun sira ne’ebé viola lei tranzitu no oinsa regra uzu meius transporte motor no kareta. 

Maski ohin loron sei iha na’in ida rua mak viola nafatin lei tranzitu nian no mos regra uza veikulu iha fatin publiku, politika implementa sansaun koima ne’e nia efeitu ka impaktu ne’e maka’as tebes. Loroloron sidadaun sira barak tebes hakdadak iha diresaun nasional transporte terrestre hodi trata karta kondusaun, hamoris ka hafoun dokumentu motor no kareta nian. Ne’e hatudu katak timoroan sira ta’uk lakon (rugi) osan tanba la kumpre orden governu. Atu sira labele lakon osan, diak liu sira kumpre lei no orden.

Aplikasaun multa ne’e nia efeitu maka’as. Tuir informasaun komforme publika iha jornal nasional sira katak durante fulan ida nia laran DNTT serbisu hamutuk ho Polisia Unidade Tranzitu nian konsege rekolla osan kuaze $2.000.000 (millaun rua) resin husi sidadaun sira ne’ebé trata dokumentu no mos husi sira ne’ebe selu koima ba viola regra tráfegu. 

Alende fo reseitas ba kofre estadu, impaktu husi aplika koima ne’e, motorista ka kondutor sira ne’ebé sente “ilegal” laiha karta kondusaun, laiha dokumentu kareta motor nian ka invalidu ona, rame-rame “atake” DNTT. Motorista sira ne’ebé buka “gaya” hasai tiha lalenok motor nian mos rame-rame “atake” loja pesa motor nian sosa espelu. 

Tanba lisan (watak) timoroan sira ne’e toos duni, labele aplika politika “hamaus” ala Joko Widodo (Presidente Republika Indonezia). Bainhira nia sei nudar Walikota (prezidente kámara munisipiu) Solo atu muda vendedor ka komersiante sira ba merkadu foun, liu husi aproximasaun persuasivu, han hamutuk kontratu-nain sira fulan ba fulan, halo promosaun ba merkadu foun fulan ba fulan no konsege susesu. 

Ba lisan timoroan sira ne’ebé ulun fatuk toos, aplika politika loke internet gratis iha merkadu tradisional ala Sekretariu Estadu Komersiu Ricardo Nheu iha kintu governu liuba ne’e la to’o atu konvense komersiante sira. Ministeriu relevante hanesan MCIA ho Ministeriu Administrasaun Estatal kria lei ida (karik lei ne’e iha ona diak liu tan) regula atividade komersiu ne’ebé tegás, fo sansaun multa/koima no determina kedas montante koima ne’e hira atu aplika ba sidadaun sira ne’ebé halo atividade  fa’an no sosa iha fatin ilegal, soe lixu arbiru, viola regra tranzitu, husik animal livre iha bairru laran, harii uma iha fatin ne’ebé governu bandu no seluk tan.      

Multa osan ne’e tenke klaru, labele namlele deit, hanesan ezemplu Lei de Bases do Ambiente ne’ebé konsege hetan liu husi search google. Iha Artigo 59.º, Responsabilidade contra-ordenacional hatete iha paragrafu 1. As infracções à presente lei são consideradas contra-ordenações puníveis com coima cujo limite mínimo e máximo é definido por lei em função da gravidade da infracção. Iha ne’e la determina mínimu hira no máximu hira.

Kompara ho nasaun sira dezenvolvimentu avansadu hanesan Singapura no Australia ne’ebé aplika multa, determina kedas minímu liu $200.00 (Dolar atus rua), Timor-Lorosa’e ne’ebé povu barak sei kiak bele determina montante multa minimu $20.00 (Dolar ruanulu) no maximu $200.00. Multa ne’e tenke aplika ba atividade sira hotu hansean soe lixu arbiru, fa’an sasan iha fatin ne’ebé governu bandu, tafui arbiru iha fatin ne’ebé  deit, fuma sigaru iha fatin publiku no soe sigaru rohan arbiru, husik animal (asu, fahi, karau, bibi no seluk tan) livre iha bairru laran, viola lei tranzitu nian, no seluk-seluk tan.

Multa ba fa’an no sosa sasan iha fatin ilegal, tenke aplika ba ida ne’ebé fa’an no mos ba ida ne’ebé sosa. Aproximasaun ne’ebé durante hala’o hodi hatun polisia no seguransa sivil ka ofisial saneamentu duni komersiante sira ka prende sasan tenke muda. Governu prepara deit nota resibu selu koima nian ba membru polisia no seguransa sivil ne’ebé hala’o knaar ezekuta lei.

Ezemplu halo “limpeza” ba animal sira ne’ebé husik livre iha sidade Dili, polisia no seguransa sivil oho tiha animal husu tuir nia na’in mak se, haruka na’in selu multa tuir animal nia tamañu ki’ik to’o boot, animal ne’ebé mate ona entrega fali ba na’in. La’os hanesan durante ne’e polisia no seguransa sivil sira oho tiha sidadaun nia animal, tula nonok ba kareta, to’o iha administrasaun munisipiu sira fahe na’an ba malu, depois fo anunsiu bosok  ba publiku katak na’an sira ne’e fahe ba ospital no orfanatu sira. Ne’e la’os ukun ho “liman-besi” maibe komete pekadu boot hasoru sidadaun. Aplika lei ne’ebé favorese ba interese pesoal, la favorese ba interese komun no estadu nian.  

Nune’e mos bainhira hetan komersiante sira fa’an sasan iha fatin ilegal, lalika duni sira, maibe husik no hein konsumidor sira mai sosa mak foin forsa seguransa sira atua tuir lei no orden, aplika koima ba ida fa’an no ida sosa ne’e dala ida. Alende fo efeitu kumpre ba komersiante no mos konsumidor sira, fo mos reseitas ba governu. Karik sira sei barani fa’an no sosa sasan iha fatin ilegal no barani selu koima $20.00 loro-loron, governu bele hasa’e koima boot liu tan. Ne’e hanesan fo opsaun rua, hili fa’an no sosa modo iha fatin ilegal hodi selu koima loro-loron $20.00 ka hili fa’an no sosa iha merkadu ne’ebé governu oferese gratis? 

Ba sidadaun timoroan maioria osan $20.00 ne’e valor boot ba sira moris. Tanba ne’e, bainhira governu aplika multa, bele halo mudansa boot tebes, asegura sidadaun timoroan hotu-hotu sei disiplina maka’as kumpre lei tanba sansaun multa osan. Timor-oan ulun fatuk toos labele hamaus fali ho internet wifi gratis ala Sekretariu Estadu Komersiu Ricardo Nheu iha kintu governu, maibe ho politika liman-besi hanesan Singapura. Ita aprende took politika Ministru Senior Lee Kuan Yew, eis Primeiru Ministru Singapura ne’ebé ukun ho liman-besi no hatudu rezultadu signifikan, sidadaun Singapura moris disiplina maka’as ho ekonomia ne’ebé avansadu iha mundu. Oinsa Ita-boot nia hanoin?

Carlos Malilaka

Estudante Semester 6 Departementu Jestaun Publiku 

Fakuldade  Ekonomia no Negósiu, Institute of Business – IOB 

Xefe Redasaun Jornal Business Timor no Diretor Business Media Group Lda. (BT)