Iha semana kotuk liu husi media imprensa hanesan jornal no media elektronika televizaun no rádiu, fó-sai notísia kona-ba háre tonelada 300 (MCIA dehan tonelada 73) sai fuhuk ka aat iha armajen governu. Háre produtu lokal ne’e governu rasik mak sosa husi agrikultór sira hahu tinan 2008 – 2009 liu husi programa “Povu Kuda Governu Sosa”.

Durante periodu 2009 – 2015 husi IV Governu to’o mai VI Governu háre produtu lokal husik “toba” hela iha armajen. Rahun-diak ita nia Primeiru Ministru Rui Maria de Araujo ba “hafanu”,  se lae publiku sei la hatene to’o mandatu sestu governu hotu mos produtu lokal ne’e toba maten nafatin iha armajen.

Ironia tebes mak  durante periodu ida ne’e governu hahu husi kuartu to’o kintu governu, husi MTCI ba MCIA la hasai háre ne’e hodi dulas sai foos no soe ba merkadu. Alende fo oportunidade ba kompañia privadu importa foos, governu mos ativu sosa foos husi liur mai. Akompaña notísia ida ne’e, fó hanoin mai ha’u ba Reitór Institute of Business – IOB nian  Dr. Augusto Soares koalia iha seminariu ida hala’o institutu ensinu superior refere fulan Juñu liuba. Reitor ne’e temi programa “Povu Kuda Governu Sosa” ne’e ho espresaun “Povu Vietnam Kuda, Governu Timor-Leste Sosa”. Espresaun ne’e reitor hato’o hodi hatutan orador seluk iha seminariu ne’e, Lino Saldanha. 

Iha seminariu ho tema “Hametin Soberania Estadu lihu husi Dezenvolvimentu Rekursu Umanu” ne’e, Lino Saldanha (uluk ami serbisu hamutuk iha instituisaun ida nudar funsionariu publiku sivil Indonesia), ne’ebé ohin loron sai komandante polisia maritima ne’e konsege sita katak programa “Povu Kuda Governu Sosa” loloos diak bainhira halo jestaun diak.    

Programa ne’e governu ka ministeriu ne’ebé tutela ba knar ne’e diak bele fó vantajen ba konsumu produtu lokal nasaun nian. Nune’e  mos bele muda mentalidade timoroan rasik ne’ebé toman no karak liu ho produtu  foos-mutin husi tasi-balu atu bele hadomi no konsumu produtu rai laran rasik. Nu’udar eis funsionariu publiku indonezia nian, ha’u hakarak fahe hanoin hanesan parte ida atu haloko ita nia produtu rai laran hodi minimiza tiha importasaun aihan husi rai li’ur.

Liafuan “haloko” mai husi dalen-tetun rasik tuir Disináriu Nasionál ba Tetun Ofisiál husi Institutu Nasionál Linguístika, sinónimu (arti hanesan) ho lia fuan “promove” iha dalen-portugés katak: “fó sai no halekar informasaun kona-ba buat ida nia kualidade di’ak ka folin boot.” Iha jornal Business Timor edisaun semana kotuk ho títulu “Feira MCIA-Páteo, promove produtu local.” Akontesimentu feira ho akontesimentu primeiru ministru halo inspesaun ba armajen produtu lokal ne’e nudar kestaun hanesan ho nia rezultadu ne’ebé la hanesan. Akontesimentu feira promove ka haloko produtu lokal ne’ebé diak no akontesimentu inspesaun hatudu kualidade produtu lokal ne’ebé aat. 

Ida ne’e hola parte hotu iha lia (kestaun) haloko produtu lokal ne’ebé halo husi parte governu no media komunikasaun  sosial rasik. Bainhira timoroan rasik la informadu kona-ba kualidade produtu lokal, susar atu muda karakter ka toman timoroan sira nia pensamentu ka hanoin oinsa hadomi ita nia aihan rasik. Parte governu nian haluha tiha oinsa halo jestaun ba nia programa, no parte povu timoroan ne’ebé karak liu produtu husi li’ur duke produtu rai laran.

Ita ko’alia kona-ba produtu lokal, iha oin barak ne’ebé moris mai husi ita nia rai laran rasik. Ida mak produtu foos ne’ebe loloos nia kualidade diak liu, han ba sente furak liu duke ita konsumu produtu hirak ne’ebé mai husi liur.  Bainhira ita hadomi liu produtu ita nian rasik, bele minimiza tiha produtu importasaun husi rai-nasaun seluk. Hadomi produtu lokal hodi funu hasoru produtu husi nasaun li’ur mai, ita bele foti referensia husi movimentu nasionalisme iha rai India. Aman fundador nasaun India ne’ebé famozu tebes iha mundu, Mahatma Gandhi iha prinsipiu haat hanesan asaun la ho violensia hodi kontra kolonial Reinu Unidus Inglatera. 

Husi prisipiu haat ne’e ida temi swadeshi. Swadeshi katak lakohi uza ka konsumu sasan sira ne’ebé produs husi ema inglez no hafoli liu produtu rasik. Ho movimentu ida ne’e, konsege hamate negosiu ema estranjeiru nian iha India. Indianu sira lakohi sosa sasan rai liur no uza deit sira nia produsaun lokal. Ezemplu nesesidade hatais ropa nian, indianu sira lakohi hatais kalsa ho faru ne’ebé nudar kultura hatais ema europa nian. Nune’e hanesan ohin loron mundu modernu ne’e mos ema indianu sira barak hatais nafatin hena kabala tantu mane no mos feto sai mos identidade nasional ida no sira nia hatais orijinal ne’e sai mos hatais ofisial iha loron boot sira ka servisu.

Iha ita nia rain mak iha movimentu hadomi produtu lokal no lakohi sosa produtu estranjeiru, no hetan apoiu maka’as husi parte governu, bele mosu revolusaun mental iha timoroan sira. Nune’e bele mosu restaurante ho hahan tradisional sira hanesan etu husi foos lokal  deit, restaurante batar-fai daan kahur ho modo oioin ala timoroan nian, restaurante ne’ebé espesial ba timoroan sira ho aihan espesial fehuk, talas, aifarina, kulu, kumbili no seluk tan. Iha Dili laran mosu ona ida rua maibe tanba ladun haloko, ema barak mak la hatene. 

Kona-ba programa “Povu Kuda Governu Sosa”, Ministeriu Turizmu, Komersiu no Industria – MTCI iha IV Governu momentu ne’ebá  kria ona orgaun ka diresaun ida MTCI nia okos naran Centro Logistica Nacional. Hanesan uluk tempu Indonezia hanaran Depot Logistik (Dolog) ne’ebé sosa foos husi povu agrikultor sira ka kompañia agrikola nian.

Hanesan Dolog uluk, CLN loloos labele sosa háre maibe sosa deit foos. Governu oriente empreza sira ne’ebé hala’o atividade negosiu dulas háre hanesan Acelda iha Baucau no seluk tan iha munisipiu produtor háre nian, mak sosa háre husi agrikultor sira. Kompañia ka empreza sira fa’an fali foos ba governu sosa. Nune’e bele pratis liu duke han prosesu ho tempu naruk.

Oinsa jestaun ba oin ho foos ne’ebé governu sosa atu labele budu deit iha armajen, no oinsa timoroan sira bele hatoman an konsumu produtu lokal? Iha politika tempu uluk Indonezia nian hanesan esperiensia ida ne’ebé ita nia governu bele implementa. Ha’u fiar katak ema sira ne’ebé agora servisu nudar funsionariu publiku iha instituisaun governu tomak liu-liu Komisaun Funsaun Públiku no MTCI (ohin loron MCIA), maioria eis funsionariu sivil Indonezia nian. Ne’e duni sira hatene oinsa politika governu Indonezia momentu ne’ebá atu funsionariu publiku tomak, tantu sivil no militar hanesan tropa no polisia iha “obrigasaun” konsumu foos produtu lokal.

Politika “obriga” konsumu foos produtu lokal ne’e aplika liu husi sistema salarial. Katak ba funsionariu publiku hotu tantu sivil no mos militar ida-idak, iha sira nia salariu ne’ebé nudar direitu, inklui mos osan tunjangan (abonu) foos nian tuir numeru membru familia nian. Tuir lei funsaun publiku nian kona-ba salariu momentu ne’ebá, iha abonu ba familia ka tunjangan keluarga ho forma osan no mos foos. Ba funsionariu ne’ebé sei klosan sira iha direitu ba tunjangan beras (foos) kilo 10. Funsionariu ne’ebé nia feen ka la’en la’os funsionariu publiku, ho oan na’in tolu (depois  minimiza tiha ba oan na’in rua deit) iha direitu hetan abonu osan no foos 50 kg. 

Valor osan ba abonu foos ne’e depende ba folin foos ne’ebé parte Dolog determina. Se foos kilo ida centavos 60 hanesan ohin loron (foos karon kilo 25 ho folin US$15.00), entaun funsionariu publiku ida klosan hetan direitu ba abonu foos nian ho osan $6.00 (Dolar neen). Funsionariu ho oan na’in tolu hetan osan abonu foos $30.00 fulan ida. Osan ne’e kada fulan, nia na’in la simu maibe tezoreiru (banku) ko’a no transfere ba konta bankaria CLN nian atu sosa fali foos.

Ohin loron funsionariu publiku nivel 1 se hetan direitu salariu, ezemplu deit $115.00 kada fulan. Ne’e inklui mos osan ba abonu foos nian. Se funsionariu publiku nivel 1 ne’e sei klosan, ninia salariu ne’e fulan-fulan ko’a $6.00 ba foos, no nia simu deit $109.00. Se nia ho feen ka la’en la’os funsionariu publiku no oan na’in tolu salariu ko’a $30.00 no nia simu deit osan $85.00. Se feen ho la’en funsionariu publiku hotu, na’in ida, ezempu feen hetan abonu foos 10 kg no la’en  ho oan na’in tolu hetan foos 40 kg.  

Karik tuir estimasaun katak kuantidade produtu foos lokal la to’o kompara ho numeru funsionariu publiku ne’ebé boot, entaun primeira faze bele aplika abonu foos 10 kg kada funsionariu publiku sein ho nia familia. Tuir dadus MCIA nian, konformi ha’u sita husi jornal Timor Post edisaun sesta (25/09), katak iha tinan 2009 sosa hare (foos ho kulit) 3.736.358 kg ka tonelada 3.736,4. Tinan 2010 (880.946 kg), tinan 2011 (3.184.344 kg), tinan 2012 (698.954 kg), tinan 2013 (537.939 kg), tinan 2014 (1.957.233 kg).

Total hare husi tinan 2009 – 2014 hamutuk  10.995.774 kg ka tonelada 10.995.8. menus tonelada 73 ne’ebé aat maizumenus tonelada 10.922,8. Se dulas sai ba foos bele fo rezultadu foos moos maizumenus 8.000.000 kg ka tonelada 8.000. Se fahe ba fulan 12, stok foos hamutuk 666.666.7 kg kada fulan. Tuir dadus husi Komisaun Funsaun Publiku – KFP nian, to’o V Governu nia rohan 2015, numeru funsionariu publiku sivil (la inklui forsa defeza no polisia) Timor-Leste nian total hamutuk 32.431. Ho numeru ne’e, bainhira ba oin iha polítika obrigasaun ba funsionariu publiku konsumu foos lokal, ezemplu kada funsionariu koa nia salariu ba foos kilo 10.

Kada fulan presiza foos 10 kg  32.431 x = 324.310 kg foos. Entaun bazeia ba dadus MCIA nian foos ba funsinariu publiku sivil sira liu tiha sufisiente. Atu programa ne’e la’o susesu, koordenasaun liña ministerial entre MCIA ho ministeriu agrikultura (MAP) importante tebes no tenke diak. Parte MAP tenke asegura katak laiha agrikultor ida mak abandona hela nia natar ka halo natar dala ida deit iha tinan ida nia laran. Ekstensionista sira tenke ativu halo monitorizasaun ba agrikultor sira, fo motivasaun akompaña sira, karik mosu problema tekniku ruma ka natureza ne’ebé afeta ba produsaun hare bele konsulta kedas ba nasional oinsa resolve problema.

Bainhira produsaun foos rai laran la to’o ba nesesidade ida ne’e, CLN foin bele importa foos husi rai liur para hakonu nesesidade iha rai laran. Bele mos ba fulan ida ka rua adia funsionariu publiku sira labele simu, no foos fulan rua ka tolu nian bele simu dala ida tempu iha foos barak ona.  Se ita nia governu iha politika ida nune’e, bele fo vantajen diak ba parte hotu. Agrikultor sira motivadu sei haka’as an maka’as hasa’e produsaun agrikola hanesan hare tanba merkadu ba sira fiksa ona husi governu. Laiha laran taridu sira produtu la folin no sai dodok hotu iha armajen governu nian hanesan akontese daudaun. Ida ne’e mak dehan ita haloko no hadomi duni ita nia produtu rai laran. Oinsa Ita-Boot sira nia hanoin?

Carlos Malilaka

Estudante IOB Semester VI Departementu Jestaun Públiku

Xefe Redasaun Jornal Business Timor, no diretor kompañia Business Media Group Lda. (BT)