DÍLI----Governu da Ualu liu husi Konsellu Ministru (KM) deside Aprova Transformasaun Diresaun Jerál Eletrisidade (DGE) ba Empreza Publika. Tan ne’e, Governu transforma EDTL ba empreza publika tanba durante ne’e ema hotu hatene katak EDTL nia hola parte iha Ministeriu Obras Publikas (MOP) nia okos liu husi diresaun jeral ida maibe agora transforma ona ba empreza pubika hodi hari’i Autoridade Nasional Eletrisidade (ANE).

Tuir Ministru Obras Públikas (MOP), Salvador Eugénio Soares dos Reis Pires, iha Kuarta-feira ne'e aprezenta dekretu lei rua ba Konsellu Ministru (KM) kona-ba Transformasaun Diresaun Jerál Eletrisidade (DGE) ba Empreza Públiku no hari’i Autoridade Nasionál Eletrisidade (ANE) ne'ebé hetan ona aprovasaun husi reuniaun KM tanba Durante ne'e Eletrisidade Timor-Leste (EDTL) hanesan diresaun jerál ida ne'ebé tutela ba MOP nune'e atendimentu EDTL nian tenke tuir birokrasia iha Ministériu sira, maibé, bainhira muda ona ba Empreza Públika mak EDTL iha ona autonomia finanseiru hodi halo atendimentu ho efetivu liután.

“Ohin ami aprezenta dekretu lei rua, ida ba estabelese EDTL sai hanesan empreza públika no ida fali ba hari’i entidade reguladóra hanaran (Autoridade Nasionál de Eletrisidade) iha setór eletrisidade ne’e, I nune’e hetan aprovasaun kedas husi KM hodi transformasaun Diresaun Jerál Eletrisidade (DGE) ba empreza publika,” hateten Ministru Obras Públikas Salvador Eugénio Soares dos Reis Pires ba jornalista sira hafoin partisipa reuniaun KM iha Palásiu Governu, Kuarta (11/03).

Nia dehan, Governu aprova tamba ho intensaun katak, ita hatene EDTL durante ne’e hanesan departamentu governamentál ida, ne'ebé mak atu halo atendimentu ne’ebé di’ak, kualidade no sustentável iha birokrasia bar-barak. “Ne’ebé ha’u hanoin ita bele eleva prestasaun servisu ho kualidade EDTL nian hanesan empreza, para atu lalais liu haree investimentu iha setór eletrisidade no mós prestasaun servisu no fornesimentu enérjia eletrisidade ba ita-nia povu sira,” katak nia.

Tanba ne’e, Governu aprova EDTL ba empreza publika hodi hari’i ANE atu haree oinsa no asegura katak Empreza Públiku no privadu ne'ebé investe iha área enérjia eletrisidade bele fornese ho di'ak.

“Autroridade Nasionál de Eletrisidade atu haree no asegura katak empreza públika ne’e no entidade privadu sira seluk ne’ebé mak hakarak investe iha setór eletrisidade, sira presta duni servisu ho kualidade no fó protesaun ba konsumidores sira, ita-boot sira hatene katak ahi-mate, sasan balun estraga, buat sira ne’e kuandu iha ona ita-nia entidade reguladora eletrisidade ne’e iha, sira bele haree ida-ne’e tuir regulamentu ne’ebé iha hodi mellora liután, atu asegura katak EDTL nomós entidade sira seluk ne’ebé mak hakarak investe iha setór eletrisidade hanesan enérjia renováveis sira tuir duni kualidade ne’ebé mak entidade ne’e haruka” Ministru esplika.

Tuir proposta iha dekretu lei ne'e katak efetivamente komesa iha loron 1 Janéiru 2021, tanba ne'e Ministériu Obras Públikas estabelese Komisaun Instaladora hamutuk ho Komisaun Funsaun Públika (KFP) hodi haree funsionáriu sira ne'ebé servisu iha EDTL, kria regulamentu sira. Funsionáriu públiku ne'ebé servisu iha EDTL sei hili mantein funsionáriu públiku ou muda ba empreza públiku.

“Iha empreza públika iha artigu 18, iha Komisaun Instaladora ne’ebé nia servisu tinan ida-ne’e inklui mós kria regulamentasaun EDTL hanesan empreza públika no mós haree ba rekrutamentu pesoál sira ba iha empreza foun ne’e klaru iha ne’eba Komisaun Instaladora ne’e iha mós husi Komisaun Funsaun Públika ne’ebé sira servisu hamutuk ho gabinete Ministériu nian no mós Diresaun Jerál Administrasaun no Finansas MOP nian hodi haree oinsá mak rekruta pesoál sira no halo transferénsia husi Funsionáriu Públiku iha EDTL ba iha empreza públika, ida-ne’e ita sei halo levantamentu dadus no mós sosializasaun ba sira no haree meus sira see mak hakarak hela no hili funsionáriu públiku sira sei nafatin hanesan funsionáriu públiku tanba servisu hamutuk ho KFP, sira ne’ebé mak hakarak muda ba empreza ita muda sira ba empreza públiku” Ministru hatutan.

Nune'e, Komisaun Instaladora nia servisu mak sei haree ba aspetu hotu ne'ebé durante prosesu tranzisaun, no importante mak Governu aprova ona estatutu EDTL sai hanesan empreza públika tanba espera katak sai empreza públika bele hamenus birokrasia. “EDTL bele iha independénsia para foti desizaun no halo atendimentu ba avariasaun sira ne’e lais liután no sustentável liután, nune’e konsumidores sira labele lamenta barak kona-ba ita-nia fornesimentu enérjia eletrisidade,” Afirma Ministru MOP. (BT)