DÍLI----Emprezáriu timoroan ho inisiativa rasik konvoka enkontru eskluzivu ho Embaixadór sira ne’ebé simu pose iha semana hirak liuba hosi Prezidente Republika atu sai hanesan diplomata ba rai liur tanba ne’e emprezariu sira husu ba embaixadór sira atu konvida Investor estranjeiru sira atu mai investe iha Timor-Leste.

Prezidente Kompaña Mahanain Claricia Lay hateten objetivu trasa planu hodi realiza enkontru ida ne’e hodi bele hetan tempu atu hasoru malu ho embaixadór sira ne’ebé mak foin simu tomada de pose atu reprezenta nasaun Timor-Leste ba nasaun sira seluk hodi husu atu embaixador foun sira bele apoiu atu konvida investor sira atu bele mai investe iha nasaun Timor-Leste.

“Sorumutu ida ne’e importante tebes tanba nu’udar emprezária timoroan hare katak oras nee, investor rai li’ur nia númeru atu mai investe iha nasaun Timor-Leste tuun makas tan ne’e hakarak atu husu apoiu hosi embaixadór sira hodi bele asegura koordenasaun di’ak hodi bele manan konfiansa hosi investor rai liur.’’ Dehan Claricia Lay

Prezidente Kompaña Timor Plaza Tony Jape hateten, Embaixadór sira iha papél importante atu promove Timor-Leste ba mundu, liu hosi area potensialidade ne’ebé mak iha, atu atrai investor sira hodi mai vizita no mós kuda investimentu iha nee. Espesialmente iha area Turizmu, Otélária no Ospitálidade. Investimentu la presiza tenke buka investimentu boot maibé ita bele ajusta o situasaun iha Timor-Leste ita bele simu investimentu ki’ik medium no mós bele boot ho objetivu bele kontribui ba kresimentu ekonomia.

“Tempu too ona atu dezenvolve area potensialidade sira hodi hatama ré tornu mai Timor-Leste labele hein de’it osan mina, tanba iha rekursu barak tebes atu bele dezenvolve no jere ho di’ak, liu-liu atrai ema hosi rai li’ur mai Timor-Leste.’’ Dehan Prezidente kompaña Timor Plaza Tony Jape ba jornalista Business Timor (BT) iha Timor Plaza, Kuarta (05/02/20)

Nia salienta tan importante liuba promove setór turizmu maibé ba parte hotu mós importante hanesan agrikultura indústria oinsá atu bele prepara produtu sufisiente hodi ema bele mai sosa no lori ba rai liur.

Nune’e mós Prezidente Otél Hilton Jackson Lay hateten, Emprezáriu Timor-Leste presiza tebes tulun hosi embaixadór sira atu bele promove produtu ne’ebé mak iha hodi atrai komunidade no investor sira iha nasaun seluk, presiza mos embaixadór nia tulun atu halo kooperasaun ho governu hosi nasaun viziñu sira atu bele servisu hamutuk hodi tulun Timor-Leste hamoris ekonomia rai laran.

Nain hosi Kompaña TinuLina Agostiñu Gomes hateten persijamente atu tau importánsia ba setór agrikultura hodi produs produtu lokál no volume barak hodi embaixadór sira bele promove ba nasaun Europa tanba iha Europa foos folin karun, no livre taxa bainhira halo exportasaun sai ba liur.

Embaisador Timor-Leste ba Australia Ines Maria De Almeida kompremetidu atu liga emprezáriu Timor-Leste no Australia atu bele koordena malu hodi mai halo investimentu iha Timor-Leste, no presiza emprezáriu Timor-Leste atu bele prepara didi’ak profile kompaña atu bele ba promove iha nasaun Australia. Sei koopera ho governu Australia atu buka investor balun hosi Australia ne’ebé iha kometimentu atu bele halo investimentu ruma iha Timor-Leste.

Embaixador Timor-Leste Ba Cambodia Hermenegildo Lopes esplika nasaun Cambodia oras nee nia kresementu ekonomia sa’e makas tebes tanba loke odamatan boot ba investor rai liur ba halo investimentu hodi fó benefísiu ba rai laran, hare ba modelu ida nee nu’udar embaixador Timor-Leste ba nasaun Cambodia sei koopera ho governu Cambodia atu fasilita no konvida emprezáriu Timor-Leste hodi ba hasoru malu ho parte relevante atu diskute kle’an liutan ba asuntu investimentu saida mak di’ak ba nasaun Timor-Leste rasik.

Embaixador Indonesia ba Timor-Leste Sahat Sitorus hateten, Pontu importante rua mak emprezáriu Timor-Leste tenke identifika bainhira investe iha area Turizmu, Otelaria no Ospitalidade, tenke asegura ba vizitante ou turista sira atu bele hela kleur iha otél no mós konsidera ba sira nia gastu, tanba. Bainhira turista ida hetan gastu boot sei la halo nian hela kleur no tenke fila sedu.

“Nasaun Indonesia prontu apoiu Timor-Leste hodi promove rekursu tomak Timor-Leste iha, inklui hosi buat barak mak atinji ona iha tinan hirak nia laran, ho objetivu atu kontinua lorin turista ne’ebé mak mai vizita iha nasaun Indonesia tama mai Timor-Leste. Bali ne’ebé mak besik tebes ho Timor Leste iha posibilidade boot ba turista atu tama mai Timor-Leste wainhira iha ona preparasaun di’ak no seguru.

Iha enkontru refere partisipa hosi Embaixadór Indonesia ba Timor-Leste Sahat Sitorus, Embaixadór Timor-Leste Ba Australia Ines Maria De Almeida, Embaixadór Timor-Leste Ba Cambodia Hermenegildo Lopes, Embaixadór Timor-Leste Ba Portugál Isabel Amaral Guterres. Hamutuk ho Emprezariu Timoroan, Tony Jape, Claricia Lay, Jeckson Lay, Agustinho Gomes, Diretór Banku Mandiri, Diretór PERTAMINA no seluk tan. (BT)