DÍLI----Timor-Leste sai ameasa boot tanba kuaze ema barak iha mundu tomak ne’ebé hala’o negósiu ba droga hahú hili tarjetu Timor-Leste sai hanesan fatin tranzisaun droga molok atu transfere liuba nasaun seluk liu-liu nasaun viziñu Indonesia.

Diretór Alfándega Aeroportu Virgílio Amaral hateten, oras ne’e funsionáriu Alfándega sempre servisu matan moris neon nain hodi pasa revista ba pasajeiru sira ne’ebé mak tama sai iha Aeroportu Prezidente Nicolau Lobato Komoro Dili, tanba nasaun Timor-Leste sai ona fatin ne’ebé mak dala barak ema hatama droga liu husi Aeroportu no mós iha Alfándega Portu nian.

“Sistema rigorozu funsionáriu Alfándega Aeroportu hala’o iha parte rua ida mak husi Hand Carry no iha Cargo, husi fatin rua ne’ebé mak sempre hatama sasán ou bagajen husi pasajeiru nian molok tama mai nasaun Timor-Leste.’’ Dehan Diretór Alfándega Aeroportu Nicolau Lobato Virgílio Amaral ba Jornalista Business Timor iha knaar fatin Airoportu Komoro, Dili, Tersa (28/01/20)

Nia haktuir iha dia 30 fulan Dezembru 2019 Alfándega deskonfia ba material ida haruka liu husi parte Cargo nian, ne’ebé mak deskonfia nain husi timoroan ida maibé falsifika nia naran tanba funsionáriu deteta katak iha sinál mean no deskonfia iha droga, parte alfándega kontaktu kedan ba Polisia Nasionál Timor-Leste diresaun kontrolu Droga nian hodi mai lori kedas ba Kuartél Jerál hodi justifika ba evidénsia husi material ne’e.

Nia salienta tan ikus mai deskobre duni Droga marka METHMPHETAMINE shabu-shabu no 3.253 kg ne’ebé mak sei haruka ba Timoroan ida ne’ebé hela iha Ailok Laran no servisu nu’udar jerente resepsionista iha otél iha Timor Plaza. Nia Subliña tan, liu husi akontesimentu hirak ne’e mak oras ne’e funsionáriu Alfándega iha Aeroportu Komoro Dili sempre deskonfia ba material sira ne’ebé mak úniku atu tenke halo scan no mákina hodi hatudu sinál hodi tulun funsionáriu Alfándega servisu ho di’ak.

“Modus barak mak pesoál droga sira sei halo hodi bele atinji sira nia metas hodi ultrapasa droga ba nasaun Indonesia liu husi nasaun Timor-Leste, liu-liu husi parte Cargo tanba nu’udar fatin ida ne’ebé mak sempre transporta bagajen ou naha husi ajénsia koñesidu iha mundu ne’ebé mak hetan ona fiar husi Aeroportu iha mundu tomak hanesan Ajénsia DHL’’ Nia haktuir.

Nia esplika tan katak la’ós Timor-Leste mai sai fatin ba komérsiu droga nian maibé sai de’it fatin tranzisaun atu bele ultrapasa ba nasaun Indonesia liu husi telestra Jalan darat. Númeru konsume droga iha nasaun Timor-Leste ki’ik tebes tan nee sei la benefísiu ba komérsiu nian.

Diretór Alfándega ne’e husu ba komunidade hotu atu bele koopera ho parte kompetente bainhira deskonfia iha atividade komérsiu droga iha ne’ebé de’it tanba ida ne’e sei fó risku ba pesoal ida-ida, liu-liu ba joven sira tanba bele estraga futuru nomós nasaun Timor-Leste. (BT)