DÍLI----Relasiona ho situasaun politika ohin loron Governu uza Orsamentu Duodesimal, Akademista Universidade Dili (UNDIL) hare sei afeita ba Setór Privadu sira. Tan ne’e, ukun na’in resistensia sira presiza tur hamutuk hodi serie resolve problema ne’e ho lala’is tuir Konstituisional Republika Demokratika Timor-Leste (KRDTL).

Tuir Dekanu Interinu Fakuldade Ekonomia UNDIL Gilberto Ximenes hatete Problema Orsamentu Jeral Estdu (OJE) 2020 la pasa iha Parlamentu Nasional (PN) konsikuensia katak Governu atual tenke uza orsamentu Duodesimal hodi responde nesesidade atividades Governasaun nian maibe sei hamate setór privadu Nasional.

Tanba tinan hirak ona Governu nunka hala’o mandatu to’o tinan 5 hodi hamoris setór privadu sira tanba setór privadu sira atu moris Governu mόs tenke mandatu to’o tinan 5, atu nune’e setór privadu sira hetan projetus hodi hetan lukru atu nune’e bele fό servisu ba ema.

“Ita hare orsamentu Duodésimu ninia objetivu atu garante funsionamentu makina estadu, Atu garante deit funsionamentu makina estadu, hodi nune’e nia sei la responde buat barak. Entaun la responde buat barak otomatikamente katak sei impaktu ba aktividade ekonomia rai laran liliu emprezariu sira ne’ebé ke hanesan Emprezaria Nasional sei hetan afeitasaun ka mate hotu,” hateten Dekanu Interinu Fakuldade Ekonomia UNDIL Gilberto Ximenes ba jornalista BT iha nia kna’ar fatin UNDIL, Segunda (27/01).

Nia dehan, Orsamentu Duodesimal impaktu ba emprezariu nasional ne’ebé mak durante ne’e depensia boot liuba Orsamentu Jeral Estadu no kuandu OJE la pasa otomatikamente sira mos labele ezekuta sira nia projetu. Kuandu la ezekuta projetu bele fό impaktu ba empregu tanba durante emprezariu nasional sira mak hanesan fό servisu ba joven Timoroan sira lubuk ida tanbá empreza privadu laos hanesan Empreza publiku ne’ebe bele empréga ema permanente.

Nia hateten, Servisu Temporariu otomatikamente servisu tenke para, Servisu para signifika empreza sira mόs la hetan rendimentu hodi sustenta sira nia necesidade lor-oron nian entaun nemos afeita ba necesidade familia tomak. Nune’e orsamentu jeral kuandu la pasa nu’udar ekonomikamente sei ladun la’o normal, tanba emprezariu nasionais sira ne’ebé halo negoiu iha rai laran sira sei depende liuba ba Orsamentu Jeral Estadu.

Nia dehan tan, oras ne’e dadaun la’os Governu Konstituisional maibe agora Governu Jestaun deit, no Governu ida ne’e laiha dever atu halo buat ida, Governu agora nia iha dever moral atu oinsa garante deit funsionamentu Makina Estadu. Tan ne’e, sira husu ba Prezidente Republika atu bele resolve lalais sitausaun politika atual iha rai laran.

“Ita husu ba Prezidente Republika atu bele resolve lalais sitausaun politika atual iha rai laran tanba tuir KRDTL dehan katak durante loron 60 Prezidente Republika halo Estudu hodi rona ema barak nia ideias hodi bele foti desizaun lalais,” katak nia

Alende ne’e mos durante ne’e ema barak koalia dehan katak lider nasional sira, liliu lider resistensia sira tenkeser tau interese nasional ba iha rai ida ne’e tanba rai ida ne’e uluk lider resistensia sira iha objektivu ida atu hetan independensia maibe ohin loron hetan tiha ona independensia, situasaun komesa mosu oi-oin, halo emprezariu sira to’o balun lakon ida-idak. Relidade situasaun atual agora komesa politiku na’in sira halo povu mak sai terus liutan, Tanba ne’e presiza serie resolve problema ida ne’e.

Nia afirma, resolve lalais situasaun ida ne’e par bele dada investor sira husi nasaun seluk hodi mai investe fali iha ita-nia ra’in. “Ita tenke resolve lalais situasaun atual dada fila-fali investor internasional sira no OJE ne’e lala’o normal fila-fali hodi suporta emprezariu/a nasaiona sira nomos kompañia internasionl sira hodi loke kampu traballu ba joven sira ne’ebé mak agora kada tinan universidade produz ne’e tanba ita liga fali ba ekonomia rai laran komesa menus ba bebeik, oinsa futuru oan sira nian,” afirma nia. (BT)