DÍLI----Diresaun Alfándega ho Ministériu Saúde halo kontrolu Maximum iha Aeroportu Komoro Dili atu kontrola virus Corona nune’e labele tama mai nasaun Timor-Leste.

Virus Corona oras ne’e hahú hada’et ona ba nasaun seluk liu husi movimentasaun sira halo viajen husi nasaun Xina tan ne’e diresaun Alfándega Aeroportu Komoro Dili servisu hamutuk ho ministériu relevante hodi prevene pasajeiru Xineza atu labele lori Virus Corona tama mai Timor-Leste.

Diretór Alfándega Aeroportu Virgílio Amaral hateten, bainhira simu informasaun kona-ba Virus Corona diresaun alfándega halo kedas koordenasaun de servisu ida ho parte ministériu saúde hodi monta ekipa médiku iha aréa aeroportu Komoro Dili hodi koko ba temperatura pasajeiru sira ne’ebé mak mai husi nasaun Indonesia no Singapura tama ma Timor-Leste.

“Bainhira pasajeiru sira tama iha aeroportu Komoro Dili tenke prenxe formuláriu ida ne’ebé mak atu justifika kona-ba kondisaun saúde pasajeiru nian, no iha mós materiál médiku ne’ebé mak utiliza hodi koko temperatura ba ema ida-ida, bainhira identifika temperatura sa’e maks ne’e bele deskonfia ba afetadu husi Virus Corona.’’ Dehan Diretór Alfándega Aeroportu Virgílio Amaral ba Jornalista Business Timor iha knaar fatin iha Aeroportu Komoro, Dili, Tersa (28/01/20)

Nia justifika to’o oras ne’e husi parte Aeroportu Prezidente Nicolau Lobato Komoro Dili seidauk deteta pesoál ruma afetadu ba Virus Corona. Tanba iha semana rua ikus ne’e pasajeiru husi nasaun Xina tama mai Timor-Leste menus tebes. Nia salienta tan tuir informasaun oras nee aviaun ne’ebé mak halo viajen husi nasaun Xina ba nasaun seluk no husi nasaun seluk ba nasaun Xina para halo operasaun hodi evita atu labele lori Virus Corona nee.

Nia Subliña tan, Aeroportu Komoro Dili prontu kualkér tempu hodi halo kontrolu masimu, iha maneira ne’ebé mak uza mak hanesan pasajeiru sira tenke scan sira nia an iha mákina atu bele kontrolu sira ho rigorozu. “Maski hasoru problema balun ho mákina scanner nian maibé ne’ebé normal, tanba la’ós avaria total, bainhira hadi’a tiha bele utiliza fali hanesan bain-bain.’’ Nia haktuir.

Nia esplika tan oras nee sistema de servisu no iha liña kondenasaun ne’ebé ho di’ak, maski iha dezafiu balun maibé la hamate espíritu no vontade ba servisu Alfandega nian iha Aeroportu Komoro tanba sai odamatan boot ba nasaun Timor-Leste.

Atualmente diresaun Alfándega servisu hamutuk ho ministériu saúde hodi fó atendementu másimu hodi kontrola ho rigorozu ba pasajeiru estranjeiru atu labele lori Virus Corona mai Timor-Leste. Husu ba komunidade Timor-Leste labele pániku ho Virus Corona ne’ebé mak espalha iha nasaun Xina no oras nee tama ona ba nasaun seluk. (BT)