DÍLI----Relasiona Orsamentu Jeral Estadu 2020 nian ne’ebé tama ona iha fulan Janeiru maibé seidauk hetan diskusaun iha Parlamentu Nasionál bainhira Primeiru Ministru dada hosi diskusaun iha Parlamentu Nasional iha tinan kotuk.

Hosi situasaun refere hodi halo Estadu no Governu Timor-Leste tenke la’o ho Orsamentu Duodésimu iha fulan Janeiru, Fevereiru no posibilidade bele to’o fulan Marsu hodi hein aprovasaun no promulgasaun Orsamentu hosi prezidente da Republika.

Hare hosi utilizasaun Orsamentu Duodésimu ne’ebé mak iha lori mós nia vantajé no desvantajé ba iha ekonomia nasaun ninian tanbá hosi Orsamentu Duodésimu bele funsiona nafatin makina Estadu nian ho diak maibé nia desvantajen mak sei trava dezenvolvimentu Timor-Leste inklui sei afeita ba iha dezenvolvimentu setór privadu rai laran nune’e mos setór privadu balun sei terus.

Tuir Ekonomista Timoroan Manuel Tilman hateten katak ohin loron governu Timor-Leste sei lao ho Orsamentu duodésimu sei trava dezenvolvimentu Timor-Leste inklui mós sei prejudika mós setór privadu rai laran no balun sei terus ho Orsamentu duodésimu ne’e rasik.

“Agora ne’e prezudika setór Privadu mak Duodésimu, Duodésimu ne’ebé mak agora ita atu tama hodi garante Funsionamentu Orsamentu Jerál Estadu iha fulan Janeiru, Fevereiru no posibilidade bele akontese iha fulan Marsu no ida ne’e mak trava dezenvolvimentu Timor-nian nomós liu-liu setór privadu nian no setór privadu balun sei terus iha ne’e,” dehan Manuel Tilman ba BT iha nia knar fatin, Pantai Kelapa, Kuarta (08/01).

Rajaun ne’ebé mak trava ekonomia nasaun nomós sei haterus setór privadu rai laran tanbá hosi Orsamentu duodésimu ne’ebé mak iha la tau iha kapital minor ka kapital dezenvolvimentu maibé aloka deit ba bens servisu atu oinsa bele funsiona diak nafatin makina Estadu.
“Tanbá Orsamentu ba Setór privadu laiha tanbá iha kompozisaun do Orsamentu ne’ebé iha kapitál Minor laiha, no ba deit béns servisu no karik seitor privadu nia ne’e mak ba de’it agrikultura nian,” katak Manuel Tilman.

Nia dehan espera ne’ebé mak durante ne’e publiku espera ba VIII governu ne’ebé lidera husi Primeiru Ministru Taur Matan Ruak atu ajuda ona setór privadu iha rai laran maibé realidade la realize to’o ohin loron. “Tan ne’e lolos governu ida ne’ebé mak tenke fó kontribui lolos ba setór privadu mak VIII governu atu bele ajuda setór privadu hodi bele kria ambiente pás no sussesu iha Timor mak fasilita emprezáriu sira hodi tama mai iha ne’e, laos politika governu atu dada sira mai,” katak nia.

Nia mós afirma katak hosi utilizasaun Orsamentu Duodésimu mós nia implikasaun ba numeru dezempregu tanbá setór privadu ne’ebé mak empreza timoroan servisu sei para hosi servisu tanbá rendimentu setór privadu laiha hodi selu servisu nain sira. Inklui mós sai problema ida mak Timor-Leste kontinua dependensia ba importasaun hosi rai liur hodi kontinua kria problema dezempregu iha rai laran tanbá importa sasan ne’ebé uza deit no la halo transformasaun hodi halo exportasaun.

“Orsamentu Duodésimu sei la kontribui ba setór privadu iha rai laran maibé Duodésimu sai oportunidade ba malae sira hosi estranjeiru hodi bele dezenvolve setór privadu ida ne’ebé mak iha ita nia rai no ita labele dezenvolve ita nia setór privadu rai lara.” Informa nia. Maske antes ne’e iha Programa no Politika governu da Ualu nian konsege hakerek programa ida ba ida atu oinsa bele ajuda dezenvolvimentu nasaun nian lao ba oin programa hirak mak hanesan Dezenvolvimentu Ekonomia rai laran.

Apoiu Setór privadu, apoiu instituisaun bankaria sira oinsa bele fasilita setór privadu maibé realidade ohin loron la akontese iha governuasaun ida maibé kontinua nafatin nakunun ho krize governasaun hodi fó implikasaun ba situasaun ekonomia rai laran. (BT)