DÍLI----Ohin-loron utilizasaun eletrisidade iha Timor-Leste, folin hahú sai ona preokupasaun ba públiku sira tanbá gastu ba sosa pulsa elektrisdade nomós selu elektrisidade hahú sae ba beibeik iha Timor-Leste no hahú amiasa rendimentu Negosiu komersiu nomós industria sira iha rai laran. Preokupasaun hirak ne’e barak liu mai hosi empreza sira ne’ebé halao investimentu iha area industria no area Komersiu hanesan loja sira.

Rajaun sai preokupasaun ba investor sira tanba kompara kustu selu ba iha EDTL hahú sae ba dala-2 iha tinan 2019 no halo komparasaun iha tinan hirak liuba. Maské konsumidor sira utilizasaun eletirisdade ba sasan sira laiha mudansa iha item balun ka la aumenta sasan elektroniku ruma maibe kustu ne’ebé konsumidor sira selu kontinua sae ba beibeik iha Timor-Leste.

Tuir jerente Supermerkadu W4 Leoniza C. Ximenes infórma katak iha tinan 2019 iha mudansa boot ba selu presu elektrisidade iha EDTL tanba ohin loron ne’e presu sae dratis tebes hodi preojudika tebes ba investimentu rai laran.

“Iha tinan 2018 loja W4 selu eletrisidade kada fulan dollar Amerikanu rihun neen ($6.000), maibé iha inisiu tinan 2019 folin eletrisidade sa’e ba dollar Amerikanu rihun ualu ($8.000), foin lalais iha fulan kotuk folin sa’e ba dollar Amerikanu rihun sia ($9.000).’’ Dehan Jerente W4 Leoniza ba Business Timor (BT) iha Edifísiu Supermerkadu W4, Audian, Díli, Kuarta-Feira (18/12/2019).

Alende ne’e mós nia afirmá katak ho kustu ne’ebé sae no iha fulan rua ikus ne’e eletrisidade hahú mate-lakan, no Tékniku EDTL sira, halo ona manutensaun ba liña ne’ebé avaria sira maibe mósu kestaun balun ba konsumidor sira mak hanesan Sistema EDTL no deskonfia EDTL hasae folin eletrisidade ne’ebé laiha justifikasaun ba iha públiku.

Ho problema ne’ebé mak iha, parte supermerkadu W4 ba hato’o ona ba iha parte EDTL kona-ba problema kustu nomós problema ahi mate maibe parte EDTL responde katak EDTL seidauk halo mudansa ba iha Presu no kustu selu sae tanba kompaña aumenta item balun iha kompaña mak halo hodi selu aumenta presu ne’ebé mak iha.

“Sira responde katak presu ne’ebé hatudu husi sistema eletrisidade nian, maibé justifika katak hosi supermerkadu durante nee la aumenta kapasidade eletrisidade no utiliza ba items iha loja ne’ebé nafatin hanesan maibé selu presu ne’ebé diferente iha kada fulan,” haktuir nia. Nune’e mós nia preokupa mós katak ho problema eletrisidade ne’ebé mate lakan durante ne’e fo afeitasaun ba iha jerador iha supermerkadu laran mak avaria barak no hosi avariasaun ne’e konsege estraga produtu fresku sira estragus mak barak.

“Afeita hosi ahi lakan mate hodi halo jeradór barak iha supermerkadu laran, ida ne’e hatudu pontu negativu tebes hosi parte governu la kontribui ba setór privadu atu halo investimentu hodi loke kampu de traballu ba joven dezempregu sira” lamenta nia. Problema ne’ebé empreza sira hasoru, nia dehan bainhira governu la apoiu sistema ne’ebé diak hodi fornese energia eletrisidade ba setór privadu sira mak sei afeita ba iha ekonomia rai laran hodi halo enkonomia laiha sustentabilidade iha Timor-Leste.

“Husu atu governu bele kontrola sistema hodi identifika presu eletrisidade ida ne’ebé mak fiksu no justu atu nune’e labele fó todan ba komunidade ki’ik ida, liu-liu ba setór privadu sira ne’ebé mak hala’o investimentu boot hodi suporta ba kresimentu ekonomia rai laran,” dehan Leoniza.

Nia informa katak Sistema presu no pagamentu ba eletrisidade ne’ebé oras ne’e EDTL iha, presiza iha manutensaun tanba karik iha ona implikasaun hosi ahi lakan mate, ou avaria iha fatin-fatin no mós karik deskonfia ligasaun ilegál ne’ebé mak enerjia la’o la stabel no laiha balansu hodi fó todan fali ba parte balun ho presu ida ne’ebé mak la justu.

Ho problema refere Business Timor halo konfirmasaun ba iha diretora Jerál Elektrisidade Enga. Arlinda M.R.F.F Miranda hateten katak Presu elektrisidade kontinua nafatin tuir sistema ne’ebe mak durante ne’e implementa no EDTL la inventa presu iha sistema. “EDTL la halimar ho kustu tanba bainhira konsumidores sira aumenta sasan eletronik otomatis kustu eletrisidade han maka’as no otomatis pulsa nia kustu tenke aumenta,” Diretora jerál Arlinda M.R.F.F Miranda ba jornalista Business Timor (BT) iha nia kna’ar fatin, Kaikoli, Kuarta-Feira (18/12/2019).

Nia esplika katak bainhira konsumidor ida la aumenta sasan elektroniku ruma maibe kustu kontinua sae ne’e nia impaktu husi vanzamentu (Kebocoran) Fiu eletrisidade nia ka ekipamentus balun mak a’at hodi afeita ba pulsa konsumidor sira nian. “Ha’u dehan kestaun tekniku kebocoran iha fiu ka iha ekipamentus ne’ebé mak uja la’os tanba folin setingan iha EDTL mak sa’e, mais iha ne’e sistema estabil laiha perubahan (mudansa) iha folin eletrisidade ida, la’os ami mak aumenta iha ne’e, ba sistema ita labele book,” hateten diretora.

Diretora EDTL dehan Bainhira Empreza sira utilize aumenta bebeik sasan eletrisidade balun hanesan eletrisidade, komputer ka AC ho fo impaktu ba kustu utilizasaun ne’ebe mak iha.
Nia afirma katak durante ne’e EDTL aplika kustu tuir kategoria 3 mak hanesan Kategoria Sosial ho nia kustu centavus 0,12, ba kategori industria no Komersiu nia kustu sentavos 0,22. Nia dehan Maské ohin loron ema preokupa kona kustu ne’ebe hotu lalais no boot ne’e laos signifika EDTL mak muda sistema maibe ida ne’e dala ruma kestaun tekniku balun ne’ebe mak mósu iha konsumidor sira hanesan vanzamentu (Kebocoran) Fiu eletrisidade balun mak a’at hodi halo pulsa eletrisidade hotu lalais.

BT husu kona-ba kustu ohin loron tanba halo komparasaun iha tinan kotuk ema sasa pulsa dollar $5 bele utilize too fulan ida maibe ohin loron aumenta ba dollar $10 maibe Diretora ne’e kontinua defende katak EDTL la halo mudansa iha Sistema inklui mós EDTL la halimar presu Eletrisidade. “Tidak mungkin iha EDTL ne’e atu ba halimarn kustu eletrisidade” hateten fila Diretora.

Alende ne’e nia mós rekuinese kona-ba kustu ne’ebe ohin loron iha hanesan kategoria Sosial ho kustu Sentavus 0,12 no Industria nomós Komersiu ho kustu centavus 0,22 nudar kustu ida ne’ebe karun tan ne’e EDTL oras ne’e elabora hela lei balun hodi haruka ba iha governu atu oinsa bele hamenus kustu ne’ebe ohin loron iha.

“Agora ami sei elebora hela lei kona-ba kustu mais sei iha ne’e hela no seidauk lori ba konsellu Ministru I nomós seidauk implementa. Tanba nemak sei kuandu lei mak lori ba tiha ona Konsellu Ministru justru nemak atu reduz tan, tanba ema hot-hotu kestiona dehan kustu eletrisidade folin karun. Ne’ebe atu reduz mais buat ne’e seidauk halo sosializasaun mais seidauk,” Informa diretora. (BT)