DĺLI----Vitima Pascoal ne’ebe mak foin lalais hetan soke husi NGO Internasional JICA konsege hetan ona seguru (Asuransi) husi kompaña Sinarmas. Vitima hetan soke husi kareta JICA nian konsege hetan ona seguru husi kompaña Sinarmas tanba NGO JICA nu’udar kliente husi kompaña Sinarmas nian.

Tuir Diretor kompaña Insurance Sinarmas Irwan Wiyanto hatete husi asidente ne’e vitima Pascoal konsege asina akordu ho NGO JICA hodi hetan seguru (Asuransi) husi kompaña Insurance tanba iha konkordansia husi vitima rasik.

“Ohin sira mai hamutuk iha ne’e entre Sinarmas, Suspeitu no Vitima atu assina karta legal ida, atu vitima hetan garantidu ida hosi Sinarmas tanba foin dadauk iha asidente ida, iha postu Administrativa Maubara, Munisipiu Likisa,” hateten Diretor Sinarmas ba jornalista BT iha Salaun Sinarmas, Bidau Lesidere, Sexta-Feira (15/11/2019).

Nia afirma katak husi asidente ne’e NGO JICA laos deit fo seguru iha parte saude nian maibe mos ba iha vitima nia sasan hanesan transporte nudar komprensifu nian. Nia dehan asidente nunka espera husi ita ema humanu tanba ne’e maske ho asidente ne’ebe iha vitima iha konkordansia ho suspeitu hodi hetan seguru husi Kompaña maske ida ne’ebe soke mak selu maibe instituisaun mak fo garantia seguru ba vitima rasik.

“Ne’ebe garantidu ne’e hanesan Pascoal nia Motor a’at atu hadia fila-fali no hanesan bele hola Aimoruk hodi hadia nia kondisaun saude ne’ebe mak afeita iha nia ain hodi resulta tohar ka tramentu saude nian,” katak nia. Alende Irwan Wiyanto mos dehan husi asuransi ne’e laos deit ba iha Motor maibe mos ba rekoperasaun saude vitima ninian maske ho osan uituan mos.

“Kona-ba osan hosi Assuransi Sinarmas labele fo sai nia montante tanba orsamentu ne’e bazeia ba saida mak iha insidente a’at sei hadia fali deit no fo osan itoan deit atu bele hola Aimoruk, kuida diak liutan nia saude,” hato’o nia. Tan ne’e nia klarifika katak akordu ne’ebe iha nudar paket ida hanesan seguru ba saude vitima ninian nomos ba iha transporte ne’ebe mak vitima uza.

Bainhira vitima hetan ona seguru signifika katak laiha ona prosesu seluk liu-liu ba dalan legal tanba iha konkordansia husi vitima ho Autor ne’ebe lori Kareta. “Nune’e Sinarmas selu Garantidu ida ne’e hanesan hetan livre ba justisa, ne’ebe ohin loron hamutuk ho vitima no Suspeitu hodi halo legal ida ba asuransi ho nune’e bele evita problemam” informa nia.

Atu taka nia mos agradese ba iha Vitima ho NGO JICA ne’ebe konsege uza Sinarmas nudar seguru ba moris. Alende ne’e Vitima Pascoal de Jesus Alvaro agradese ba NGO JICA ne’ebe fo ona nia promesa ne’ebe iha. “Hau agradese ba JICA no Assuransi Sinarmas tamba fo ona garantidu mai hau hodi atende hau nia kondisaun saude ne’ebe mak hetan afeita kanek iha ain, nune’e liu hosi garantidu ne’e hau bele hadia fali hau nia Motor no hola Aimoruk atu kontinua kuida saude hau nian rasik,” hateten nia. (BT)