DÍLI----Prezidente Autoridade-Rejiaun Espesial Oe-Cusse Ambenu (RAEOA), Interino Sesante Arseino Bano deklara prontu servisu hamutuk ho Prezidente Autoridade foun durante Tranzisaun.

Hanesan Prezidente Interino Sesante sujere ba Prezidente Autoridade foun atu halo karta ida, hodi husu tok ba Prezidente Autoridade Sesante atu nune’e bele iha kolaborasaun hodi lori rai Ambenu ba Oin. 

Prezidente Autoridade Interino Sesante Arsénio Paixão Bano hateten hanesan Prezidente Interino Sesante prontu para oinsá bele Koopera ho Prezidente Autoridade Foun durante tranzisaun tanba dezenvolvimentu iha Oe-Cusse balun la’o diak ona maibe balun la’o seidauk loos. Alende ne’e, nu’udar Prezidente Autoridade Interinu durante loron 120, hahú iha loron 1 Agostu 2019, hodi troka mandatu Prezidente Autoridade Sesante Marí Alkatiri, ne’ebé remata ninia mandatu iha loronb 30 fulan Jullu 2019.

“Ha’u agora respeitu Prezidente foun, tempu ba nia kna’ar, ha’u husu ona atu ami na’in rua bele kolia minutu balun, atu diskute saida mak atu halo ba oin durante prosesu tranzisaun. Ha’u laiha problema no sempre pronto servisu hamutuk,” hateten Prezidente Autoridade Interino Sesante Arsénio Paixão Bano ba jornalista sira depois de Serimónia toma de Posse ba Prezidente RAEOA Foun, iha Palasiu Governu, Kuarta-Feira (13/11/2019).

Nia dehan, Hanesan Eis Prezidente Autoridade Interino Sesante ohin sujere ba Prezidente Autoridade Foun atu hakerek karta ba Prezidente Autoridade Sesante hodi bele apoiu. “Ha’u sujere ba nia atu bele hakerek karta ba Prezidente Autoridade Sesante, Marí Alkatiri hodi husu apoiu maibe ida ne’e hanesan sujestaun ida no ha’u hanoin laiha, laiha problema,” katak nia.

Tanba ne’e, antes seidauk hetan fiar sai Prezidente Autoridade Interino, assume kna’ar hanesan Sekretariu Rejionál Adjunto Prezidente Autoridade ba Area Edukasaun, Sosial no Saude iha Oe-Cusse. Nia Afirma, iha Planu ne’ebé atu aprezenta ba Prezidente Autoridade Foun hanesan ohin Primeiru Ministru Taur Matan Ruak hateten.

“Sim…. Ha’u iha planu hanesan ohin Primeiru Ministru hateten buat ne’ebé diak kontinua, buat ne’ebé mak ladiak presiza hadia, ha’u la rai segredu ba ha’u a’an,” tenik nia. Nia hateten, Agora tempu ba Prezidente Autoridade foun nia kna’ar, Eis Prezidente Autoridade Interinu sesante respeitu no pronto par bele kolabora ho PA Foun. La’os deit tanba Interino sesante deit maibe hanesan nu’udar Oe-Cusse Oan pronto kolabora hodi lori Oe-Cusse (Ambeno) Ne’e ba oin iha Timor-Leste nian.

Nune’e, nia iha Esperansa ba Prezidente Foun hodi kontinua nafatin servisu ne’ebé durante la’o ona. “Ha’u hakarakkontinua servisu ne’ebé mak ita iha ona, presiza urjentemente halo buat ruma atu osan bele sirkula fali, nune’e modo no na’an sira bele folin no sasan iha kios sira mos bele folin hotu,”Akresenta nia.

Nia kontinua hateten, hanesan iha Oe-Cusse ne’eba, dezenvolvimentu balun la’o ona maibe buat balun seidauk la’o hanesan Estrada no bee-moos mak to’o agora seidauk bele finanaliza tanba espera iha Prezidente foun ne’e bele kontinua no ba finalize ba necessidade povu nian. 

Alende ne’e, kona-ba eletrisidade laiha probléma, iha Oe-Cusse kuaze 24 horas la’o nafatin maibe dadaun ne’e povu Oe-Cusse presiza liu mak Bee-moos, Edukasaun no Saude inklui Turizmu mos bele la’o. “Ita hakarak Oe-Cusse Sustentavél no Auto Finansiamentu tanba ne’e ita tenke hadia Infraestrutura hodi halo Oe-Cusse sai furak liutan, hodi loron ida iha reseitas sufsiente.

Reseitas ne’ebé agora iha ona millaun $34, bele halo tan, loron ida Oe-Cusse bele kontribui mos ba reseitas nasional. Ida ne’e maka ita hakarak,” Tenik nia. Iha biban ne’e mos, nia prefere liutan kona-ba Dezenvolvimentu Ataúro ne’ebé presiza lejislasaun. “Atu dezemvolve Ataúro, ita presiza Prezidente Autoridade no Governu Sentral atu halo Estatuto nune’e bele hahú dezenvolve iha Ataúro,”Afirma nia. (BT)