DÍLI----Lider Nasional Resistensia Xanana Gusmão hamutuk ho Governu liu-liu Sekretariu Estadu Kooperativa no Autoridade Munisipiu Likisa halao kolleta dahuluk Sorghum hamutuk hektares 38 iha munisipiu Likisa.

Tuir Sekretariu Estadu Koopertiva (SEKoop) Arsenio Pereira hatete Lider Nasional Kay Rala Xanana Gusmão ho parte Governu Liu hosi SEKoop ofisialmente halo Lansamentu Nasional dahuluk ba Sorghum (Batar Kay Rala) hamutuk hektares 38 iha suku Gisu, Postu Adminnistrativa Maubara, Munisipiu Likisa.

“Ita hamutuk iha ne’e la’os tan buat seluk no lalet ida maibe ita hakarak muda ita nia moris liliu ita sira ne’ebe moris iha area remotas no area rural tanba ohin ita hamutuk halo Lansamentu Nasional ba Batar Kay Rala iha suku Gisu hamutuk hektares 38,” heteten SEKoop Arsenio Pereira ba Jornalista sira depois de remata Serimonia Lansamentu ba Sorghum, iha suku Gisu, Postu Administrativa Maubara, Munisipiu Likisa, Tersa-Feira (29/10/2019).

Nia dehan Sorghum ne’ebe fo naran Batar Kay Rala ne’ebe mak nia bele utiliza hodi transforma ba produtu oin-oin hanesan Fos inklui mos bele produz ba hahan alternative seluk hodi faan iha merkadu. Husi Batar Kay Rala ne’e mos bele utiliza iha programa Merenda Eskolar ne’ebe mak iha. “Ami Garante katak sei fornese Batar Kay Rala iha tinan oin, SEKoop sei halo koordensaun ho Ministra Edukasaun hodi fornese ba merenda eskolar tanba Batar Kay Rala nia nutrisaun diak ba saude,” katak nia.

Nia espera Batar Kay Rala fornese ba merenda eskolar sei to’o, tanba volume fornese ba merenda eskolar sufisiente tanba kada hektares ida hosi Batar Kay Rala tonelada 2.5. Nia mos klarifika katak tuir komprimisiu iha tinan ida liuba SEKoop wainhira simu pose kompromete kedan katak, sei hamutuk ho povu iha teritoria laran tomak atu oinsa bele dezenvolve diak liutan produsaun iha rai laran.

“Mezmu loron, mezmu kalan, mezmu loron bo’ot sempre hamutuk nafatin ho komponezes sira iha territoriu laran tomak ita bo’ot sira deside, kuandu iha tempu sei duodesimu hau ba vizita ida-idak ita bo’ot sira halo deklarasaun katak sei sai parseiru permanente iha VIII Governu Konstituisional tanba ida ne’e ohin hau simu ita bo’ot sira nia deklarasaun katak sei ita halo mudansa social, mudansa ekonomia, mudansa povu no mudansa moris diak liu hosi dalan kooperativa,” Tenik nia.

Kooperativa ne’ebe produz mai hosi kamponezes sira hosi area rural no area remotas sira tanba ida ne’e mak ho imi nia prezensa halo SEKoop fiar an liutan hodi hatete no hateke ba sei deit katak, “Ho ita nia programa ho ita sira ne’e hotu, ita sei halo mudansa iha ita nia rai ida ne’e, Mudansa ba rai ida ne’e hahu hosi area rural, hahu hosi area remotas ba iha kapital,” hateten nia.

Nia Afirma liutan, “hahu ohin ba oin ho alerta katak ita alerta ba ema hot-hotu ba kamponezes sira hot-hotu liliu komponezes sira ne’ebe produz ba produtos agrikola, no produz produto sira ne’ebe ita rasik mak produz ne’ebe mak babain ita dehan katak mai hosi nia hun ho nia lahan katak hahu hosi nia preparasaun halo produsaun no ita ka’er merkadu no industria,”

Alende ne’e iha parte seluk Administrador Munisipiu Likisa Domingos da Conceição haktuir Autoridade Munisipiu Likisa Louva SEKoop nia servisu tanba komesa dudu kooperativa rai laran nune’e louva mos esforsu Movimentu Kamponezes Timor-Leste tanba hamutuk ho povu bele komesa organiza populasaun hodi partisipa iha ekonomia rai laran. “Hau lori komunidade Likisa nia naran hodi fo obrigadu ba Governu tanba hili Likisa sai hanesan Munisipiu ba Lansamentu Nasional Batar Kay Rala.

Alende hau mos apresia MOKATIL sira nia servisu tanba ho kolleta Batar Kay Rala bele dehan komesa book an hodi esforsu atu hasa’e produsaun hodi kore a’an hosi dependensia produto rai liur,” hateten Presidente Administrador Munisipiu Likisa Domingos da Conceição. Nune’e iha Parte seluk mos, Lider Karizmatiku Kay Rala Xanana Gusmão mos louva durante servisu hosi parte MOKATIL halo tanba bele ajuda ona Governu liliu SEKoop hodi dudu dezenvolvimentu Kooperativa iha Timor-Leste.

Nia dehan, Esforsu ne’ebe mak MOKATIL halo dadaun ne’e, nu’udar meius ida atu dezenvolve ekonomia Timor-Leste liu hosi MOKATIL rasik hahu mobiliza ona populasaun atu halo produsaun ba setor agrikula rasik. “Hau kontente tanba timoroan komesa hare no ka’er servisu dadauk ona hodi produz rasik hanesan lansamentu dadauk ne’e ba kolleta Batar Kay Rala (Sorghum), ne’ebe nu’udar primeiru passu ba positive tebes i hau fo parabens ba imi MOKATIL,” hateten eis Primeiru Ministru Xanana.

“Tanba ne’e iha lansamentu nasional ne’e, hetan partisipasaun hosi Sekretariu Estadu Ambiente (SEA), Deométrio do Amaral de Carvalho, Sekretariu Estadu Komunikasaun Sosial (SEKOMS), Merício Juvinal dos Reis, “Akara” nomos Ajensia Relevante sira Inklui Autoridade Lokal no parte Seguransa,”. (BT)