DÍLI----Governu Timor-Leste liu husi Sekretáriu Estadu Formasaun Profisionál no Empregu (SEFOPE) Asina Memorandum Of Understanding (MOU) ho Sekola Tinggi Pariwisata Bali Indonézia (STP).

Objetivu husi asina Memorandu refere atu oinsá bele ajuda Timoroan sira hodi tuir formasaun iha area Ospitalidade iha Eskola STP tanba durante ne’e iha Timor-Leste numeru joventude iha area ospitalidade sei menus tebes.

“Objetivu Asina MOU SEFOPE ho STPB hodi fo formasaun iha Área Ospitalidade ba Joven timoroan sira ne’ebé mak iha interese atu tuir Formasaun iha Area Ospitalidade Bali ho durasaun tempu Fulan 6. Teória Fulan Tolu (3) no Prátika Fulan Tolu (3) iha Bali Indonézia.

Tanba durante ne’e Governu Timor-Leste liu husi Sekretáriu Estadu Formasaun Profisionál no Empregu (SEFOPE) haruka Joven Timoroan ba servisu iha Australia, maibe númeru ne’ebé sei mínimu ba servisu Area Ospitalidade iha Austrália, tanba ita seidauk bele halo kontribuisaun ho Nasaun illa pasífiku sira,” hatete Diretor Jerál (SEFOPE) Paulo Alves, iha Salaun SEFOPE Kaikoli, Segunda-Feira (28/10/2019).

Nia haktuir programa ne’e trasa tinan ida ona, maibe proposta ne’e foin apasa iha tinan ida ne’e ne’ebé formasaun ba timoroan sira ne’e hala’o sei finansia husi Fundu Dezenvolvimentu Kapital Umanu (FDCH). “Tanba ne’e programa ida ne’e trasa kleur ona no ita nia proposta ne’e tinan 2019 nian, ne’ebé liu husi Fundu Dezenvolvimentu Kapital Umanu, ne’ebé mak ita prepara ona,” dehan nia

Nia esplika orsamentu ne’ebé mak fo hodi apoiu ba Joven nain 10 ne’e, sei halo selesaun ne’ebé rigorozu, atu nune’e sira bele tuir forrmasaun iha Bali Indonezia ho diak. Tanba ne’e enkontru Tékniku ne’ebé mak sira halo kleur, husi Diretor Formasaun Profisional no husi Novu Turizmu ne’ebé mak fasilita ba programa proposal ida ne’e, oinsá ita atu prepara ita nia joven sira liga mos nesidade servisu ba rai liur nian.

Alende ne’e mos Diretor Nasionál Formasaun Profisionál (DNFP) Mateus Elfrus Dos Santos Talo afirma SEFOPE Asina mós MOU ida ho Novo Turizmu hodi bele fó oportudade ba Timoroan hirak ne’e atu halo estájiu iha Novo Turzmio. “Aktividade ohin ne’ebé mak ita Asina MoU ho Novu Turizmu ne’e aktividade no programa SEFOPE nia trasa ona, ne’ebé mak liu husi Programa Estajiu Nnasional no Estajiu Internasional,” nia afirma

Diretor ne’e haforsa tan SEFOPE ho liga Parseiru Industria sira ne’ebé mak halo kontaktu, oinsá bele simu ita nia graduadu sira husi Sentru Formasaun Akreditadu, ne’ebé mak bele simu hodi aprende iha servisu fatin. Nia dehan Novu Turizmu sei fasilita entrega direta ne’ebé sira remata ona ba sira nia estajiu no programa ne’ebé mak estajiu iha rai liur, no benefisiariu sira sei diretamente halo selesaun iha Novu Turizmu.

Nia esplika Programa Estajiu Nasional ne’ebé mak halo husi Novu Turizmu servisu hamutuk ho STP Bali Indonezia, programa ne’e nia sei hala’o Prátika Fulan Tolu no Teória Fulan Tolu ne’ebé kompleta Fulan 6. Tanba ne’e sei finaliza formasaun ne’e sei emprega direta husi Novu Turizmu bazeia ba MOU ne’ebé mak asina ona. Montante ba Orsamentu ne’ebé mak preve husi Orsamentu planeadu ba tinan ida ne’e hamutuk $51 mill. (BT)