DÍLI----VIII governu Timor-Leste ne’ebé lidera husi Primeiru Ministru Taur Matan Ruak hahú fo orientasaun esklusivu ba iha Ministru Koordenador Asuntu Ekonomia (MAKE) ne’ebé mak tau matan ba iha asuntu ekonomia iha nasaunm atu oinsá bele apoiu setór privadu rai laran liu husi Orsamentu Jeral Estadu tinan 2020 ninia.

Ho orientasaun ne’ebé iha MKAE ne’ebé lidera husi Ministru Fidelis Magalhães hahú propoin Orsamentu balun ba iha OJE 2020 hodi apoiu Instituisaun Camara Comersiu Industria Timor-Leste (CCI-TL) oinsá bele dezenvolve diak liu tan iha Futuru.

Orsamentu ne’ebé governu ajuda oras ne’e propoin ona husi Ministeriu Kordenador Asuntu Ekonomia (MAKE) ba iha Komité Revisaun Orsamentu 2020 nian no sei aprezenta ba Parlamentu Nasional iha tempu badak hodi deskuti no aprova. Tuir Ministru Coordenador Asuntu Ekonomi (MCAE) Fedelis Magalhães hateten katak Governu iha tinan 2020 sei apoiu orsamentu balun ba iha setór privadu liu husi Camara Comersiu Industria Timor-Leste (CCI-TL).

“Orsamentu ba iha setór Privadu ita tau tiha ona no halo hotu ona dotasaun no prepara tiha ona ba setór privadu maibe mai to’o iha parlamentu mak foin diskute,” Dehan Ministru Kordenador Asuntu Ekonomia Fidelis Magalhães ba Jornalista sira iha Parlamentu Nasional Tersa-Feira (24/09).

Maske orsamentu ne’e governu popoin ona maibe Ministru Fidelis Malagalhães seidauk fo sai numeru loloos ne’ebé sei aloka ba iha CCI-TL iha tinan 2020 nudár apoiu institusional oinsá bele dezenvolve diak liu tan CCI-TL iha futuru. “Buat ne’ebé ita halo mak iha komponete ida atu apoiu CCI-TL nudár apoiu Institusional, kona-ba montante osan hau seidauk ko’alia, orsida mai fali iha parlamentu mak deputadu sira deskorda fali mos ladiak,” katak nia.

Nia mos afirma katak alende apoiu governu nian iha institusional, governu mos sei tau rejerva osan ba projetu oinsá bele haburas tan setór privadu iha TL. Alende ne’e Prezidente Camara Comersiu Industria Timor-Leste (CCI-TL) Oscar Lima hateten katak CCI-TL nudár parseiru importante ba governu no hahú husi establesementu CCI-TL konsege hetan apoiu másimu husi husi Governu hahú kedas iha Mandatu eis Primeiru Ministru Xanana Gusmão, Eis Primeiru Ministru Rui Maria de Araujo inklui mos Eis Primeiru Ministru Mari Alkatiri.

Tan ne’e iha tinan 2019 CCI-TL kontinua hetan novidade diak husi governu Timor-Leste liu-liu iha VIII governu Konstitusional ne’ebé lidera husi Primeiru Ministru Taur Matan Ruak mos sei tau orsamentu hodi apoiu CCI-TL rasik.

“CCI-TL hetan apoiu makas husi Governu Timor-Leste tanba hahú kedas husi Eis Primeiru Ministru Maun Boot Xanana Gusmão, nune’e mos iha Tempu Primeiru Ministru Rui Maria De Araujo inklui mos Iha tempu Primeiru Ministru Mari Alkatiri, no agora mos ami rona informasaun katak iha Konsellu Ministru Konsege aprova ona no atu lori ba Parlamentu hodi halo diskusaun,” dehan Prezidente CCI-TL Oscar Lima ba BT iha nia knar fatin, Comoro, Kuarta-Feira (25/09).

Nia esplika katak Camara Comersiu Industria Timor-Leste nudár Organizasaun ida ne’ebé harii sai mahun ba iha setór privadu hotu iha Pais ne’e, inklui sai parseiru importante ba governu hodi dezenvolve Ekonomia nasaun nian, tan ne’e CCI-TL presiza hetan apoiu husi instituisaun Estadu tanba Camara Comersiu laos Instituisaun lukrativu.

“Sin ami iha ona I’is katak tinan oinsá governu tau osan ba iha CCI-TL tanba hau rasik hasoru ona primeiru Ministru no Primeiru Ministru fo ona Orientasaun Esklusivu ba iha Ministru Koordenador Asuntu Ekonomia hodi hare asuntu ne’e,” afirma Oscar Lima. Nia mos afirma katak Orsamentu ne’ebé mak Governu tau ba CCI-TL laos propoin husi CCI-TL maibe CCI-TL aprezenta deit nia programa ba MKAE ligadu ba planu ne’ebé mak iha.

Oscar Lima mos Informa katak orsamentu ne’ebé iha sei tau peoridade liu ba dezenvolvimentu Rekursu humanu hanesan treinamentu inklui mos oinsá bele apoiu mos ba iha CCI iha munisipiu bele funsiona diak liu tan hodi tau atensaun ba iha Emprezariu sira iha Munisipiu. (BT)