DÍLI----Timor-Leste nudar nasaun ne’ebé ninia orsamentu estadu kada tinan kontinua dependente maka’as ba iha fundu mina rai maibé seidauk lori moris di’ak ba povu tomak. Kuaze total orsamentu ne’ebé mak utiliza husi governu durante ne’e atinji ba $11 biliaun maibé to’o oras ne’e povu barak mak sei moris mukit no menus tebes ba kampu de traballu.

Diretór organizasaun naun governmental Core Group Transparancy Juvenál Dias hateten VIII governu konstitusionál tenke seriedade utiliza orsamentu mina rai atu bele kria kampu de traballu atu nune’e povu bele hetan rendimentu permanente hodi nune’e povu bele hetan moris di’ak.

“Orsamentu Jerál do estadu ne’ebé kada tinan governu utiliza la fó fali retornu ida di’ak ba nasaun tanba governu rasik ladún foka ba investimentu rai laran atu bele fó funan fali osan estadu. Governu sempre konsentra ba gastu to hotu maibé la tau importánsia ba setór produtivu sira,” dehan Juvinal.

Tuir nia loron ida mina rai nu’udar Timor-Leste nia riku soi sei maran tanbane’e governu tenke utiliza osan mina nian ho transparénsia no kuidadu tebes no bele investe ba area produtivu sira hodi bele hatama fali osan ba reseita estadu. Oras ne’e governu hahú ona hatama reseita doméstiku ba kofre estadu maibé kada tinan la liu husi $150 millaun no ida ne’e sei la sufisiente tanba atu hala’o de’it mákina estadu ba tinan ida mós la bele. Dehan Diretora CORE Juvenál Dias ba jornalista sira iha Salaun IOB Fomentu Dili, Kinta-Feira (25/09).

Nia akresenta tan katak, sistema tenke transparénsia no tenke tau potensialidade ba setór produtivu sira. Planu governu tenke fiksu tanba dala barak governu falla atu realiza promesa ba povu. Oitava governu la bele realiza promesa atu loke kampu de serbisu ba timoroan hamutuk 60.000 tanba planu ba polítika la transparénsia. Governu tenke kompremetivu atu bele uza osan mira rai ho transparénsia atu nune’e bele hetan apoiu husi ministerial tomak hodi bele fo duni serbisu atu povu ne’ebé kore aan husi mukit no ki’ak. (BT)