DÍLI----Ministru Reforma Legislativa no Asuntu Parlamentare (MRLAP), no Ministru Koordenadór Asuntu Ekonómiku (MKAE) Interinu Fidelis Manuel Leite Mangalães VIII Governu Planeia ona atu Konstrui Parke Industria iha Munisipiu Likisa ho rai medida hektar 64.

Tuir Ministru Reforma Legislativa no Asuntu Parlamentar (MRLAP), no Ministru Koordenadór Asuntu Ekonómiku (MKAE) Interinu Fidelis Manuel Leite Mangalães hatete VIII Governu iha ona planu tinan 2020 atu loke konstrusaun parke iha Munisipiu Likisa ho Rai Medida Hektar 64 hodi nune’e Investór Internasionál sira bele lori Fabrika hodi investe iha Timor-Leste atu nune’e bele fo servisu ba timoroan sira.

“Governu Planu hela tinan oin hahú konstrusaun iha Munisipiu Likisa, hodi avansa ho hektar 64, ne’ebe hotu hodi bele lori investor sira bele mai loke fabrika iha Timor-Leste, no loke industria iha ita nia rai atu nune’e bele fo servisu ba timoroan sira,” dehan Ministru Reforma Legislativa no Asuntu Parlamentare (MRLAP), no Ministru Koordenadór Asuntu Ekonómiku (MKAE) Interinu Fidelis Manuel Leite Mangalães, hafoin enkontru ne’e ba Jornalista sira iha Edifísiu Tradelnvest Kolmera Díli, Kinta-Feira (05/09).

Governante ne’e hatutan Governu iha proposta ba Orsamentu ne’ebe mak atu planeia iha tinan oin, hodi bele hotu iha tinan tolu nia laran, ho parke industria nian iha Munisipiu Likisa. Nia dehan Planu hirak ne’e iha hela diskusaun, semana oin mak hahú komisaun revisaun ba Orsamentu, ne’ebe Orsamentu sira ne’e sofre alterasaun bele aumenta no bele menus, hanesan ideia ne’ebe mak hodi diskuti hadiak diak liutan.

Fidelis haforsa liutan planu fiksu mak parke industrial ne’e por volta 15 Miloens hanesan ne’e, maibe ida ne’e sei la’o hela iha diskusaun nia laran, ida ne’e turizmu, parke industria no sentru treinamentu ne’ebe mak sei lao ho tinan oin. Governante esplika tinan oin ba hala’o promosaun iha internasionál sira inklui Expo iha Dubai, ita lori Master Plan ne’e hodi konvida investór sira mai investe iha ita nia rai.

Nia hatutan tinan oin mos Governu sei produs ba sira ne’ebe Master Plan sei hotu ba tinan oin no sei prontu, sei hare ba iha projeitu sira atu halo embelezamentu iha Kapital Díli no Sentru Turistiku sira, ne’ebe mak embelezamentu la’o ho par ida ho Sentru Formasaun ba Turizmu nian, no fatin Fabrika sira.

Nia dehan Parke industria la’os parke Jardin atu halimar nian, fatin hodi atrai fabrika sira bele mai, no fatin sentral ne’e ema husi rai liur bele no husi rai laran mos bele loke sira nia fabrika, iha ne’eba hodi nune’e sira bele asesu ba Bee Moos, Rai, no asesu ba Lina Eletrisidade.

Fidelis realsa tan relasaun kriasaun ho empregu mos sei fokus, tanba turizmu ne’ebe mak hanesan Master Plan, Master Plan ne’ebe mak define klaru ona zona sira problema rai sira rezolve tia ona iha Master Plan. Tanba ne’e Bainhira sira mak hatene tia ona no rai balun rezerva ba iha Hotel Fitun Lima no rai balun aprova deit iha Turizmu Komunitariu, maibe buat hirak ne’e deside ona husi Master Plan. (BT)