DÍLI----Ministru Koordenadór Asuntu Ekonómiku (MKAE), Interinu Fidelis Manuel Leite Magalhães, realiza enkontru ho institutuisaun relevante sira, husi Sentru Treinamentu Tibar no Sentru Treinamentu Senae Bekora hodi ko’alia kona-ba Orsamentu Jerál Estadu (OJE) tinan 2020.

Ministru Koordenadór Asuntu Ekonómiku (MKAE) Interinu Fidelis Manuel Leite Maghalães hatete enkontru ida ne’e MKAE orienta ba instutuisaun relevante sira ne’ebé mak MKAE nia okos, hodi tuur hamutuk atu ko’alia kona-ba OJE tinan 2020 nian.

“Enkontru ho institutuisaun relevante sira hanesan IADE Sentru Treinamenntu Tibar ho Senae Bekora, ne’ebé mak ohin oportunidade ne’ebé mak MKAE Orienta sira, ko’alia kona-ba prioridade Orsamentu Jerál Estadu (OJE) tinan 2020 nian,” hatete Ministru Koordenadór Asuntu Ekonómiku (MKAE) Interinu Fidelis Manuel Leite Maghalães hafoin enkontru ne’e ba Jornalista sira iha Edifísiu Tradelnvest Kolmera Díli, Kinta-Feira (05/09).

Governante hatutan orientasaun ida ne’e atu hadia atividade diak liuba sira nia kualidade, no atu rejista klaramente ba sira nia kontribuisaun ba Setór, la’ós ba Mina Rai ne’ebé mak ema na’in hira mak treinu no empregu hira mak sira kria ona. Nia dehan ajénsia hot-hotu ne’ebé mak MKAE nia okos, tenki iha rejistu informasaun klaru ba sira nia kontribuisaun, ho meta iha empregu ne’ebé mak VIII Governu iha.

Tanba ne’e haree ba númeru hirak ne’ebé mak sira treinu, hanesan iha Sentru Tibar nian $4 mil resin, ne’ebé mak sira treinu, no sira seluk oinsá empreza sira, hanesan IADE apoiu ne’ebé mak konsege la’o, no emprega sira ne’ebé fo servisu ba Timoroan nain hira ona. Fidelis argumenta tau hanesan prioridade atu hare didiak, oinsá sira nia kontribuisaun ba iha Ekonómia Nasionál, ba diversifika ekonómia mak saida, no sira kontribui to’o ona iha ne’ebé no seidauk karik tanbasá.

Tanba ne’e mak iha tempu badak sei avansa no hanesan Ministru Koordenadór Asuntu Ekonómiku (MKAE), ne’ebé mak ko’alia ona mos fo orientasaun dala ida, ba iha Sentru Treinamentu Tibar no Sentru Treinamentu Senae Bekora, atu tuur hamutuk hodi ko’alia ho MKAE no SEFOPE, atu nune’e bele haree didiak proposta ida atu avansa ho Sentru Treinamentu ida deit.

Nia esplika Sentru Treinamentu ida deit atu nune’e bele konsentra ba ita nia rekursu umanu no treinadór sira, atu konsentra osan ne’ebé mak bele tau iha fatin ida deit, selae ita despreza ba ita nia kapasidade, atu fornese ba treinamentu ne’ebé mak diak no rezultadu iha. Tanba ida ne’e ita tenki haré didiak no polítika ida ne’e ita sei avansa, no atu hare avaliasaun hanesan IADE, IADE hamrik iha fati-fatin no iha Munisípiu hotu, no ita tenki husu.

Governante haforsa tenki harii iha Munisípiu hotu, treinadór sira mos la to’o tanbasá mak halo Sentru Rejional, atu nune’e bele konsentra rekursu, no husu fali apoiu sira ne’ebé durante halo atu fortifika, emprezáriu lokál sira ne’e efisiente kalae, no emprejáriu hira mak kontinua no emprejáriu hira mak hetan ona benefísiu.

Nia dehan tenki halo avaliasaun ho klean no dezenvolve no koñesimentu ne’ebé mak ita nia frakeza rasik, no ita nia forte rasik atu nune’e ba oin labele halimar no ita tenki konsentra diak hodi dudu Setór ekonómia bele ba oin. Tanba ne’e Governu hanoin iha oportunidade ne’ebé mak barak liu, ita bele aproveita hodi bele hadiak diak liutan ba oin no susesu. (BT)