DÍLI----Ministru Obras Públika (MOP) Salvadór Eugénio Soares Dos Reis Pires hamutuk ho Diretor Jeral husi Agua Saneamentu ho Diretor no kargu xefia sira, realiza reuniaun dahuluk ho Interministeriál hanesan Ministra Finansas no Minisitru Justisa hodi ko’ali kona-ba projetu konstrusaun drainajen no saneamentu iha kapital Díli.

Objetivu husi enkontru ne’e, oinsa atu muda komunidade sira ne’ebé agora dadauk hela iha Kapital Díli, oinsa atu muda komunidade sira ne’ebé afeita husi proejetu drainajen no Saneamentu.

Ministru Obras Públika (MOP) Salvadór Eugénio Soares Dos Reis Pires hatete enkontru ida ne’e bazeia despaisu husi Primeiru Minsitru nian, ne’ebé mak atu Interministeriál sira atu enkontru hodi nune’e bele haree problema husi Projetu Drainajen no Saneamentu iha Kapital Díli.

“Ohin ami hala’o reuniaun Interministeriál ne’ebé mak bazeia despaixu husi Primeiru Ministru nian, atu kria entre Ministeriu Obras Publiku, Ministeriu Justisa no Ministeriu Finansas atu nune’e bele haree problema resententamentu husi Projetu Drainajen no Saneamentu husi kapital Díli, ”hatete ministru Salvadór Eugénio Soares Dos Reis Pires.

Governante hatutan projetu ne’e rasik konklui ba planemanentu ne’ebé mak hala’o husi Agua de Portugal (ADP), dezeñu sira agora tama ona preparasaun prosesu resententamentu ba Sistema Drainajen no Saneamentu iha kapital Díli. MOP haforsa tan projetu importante ne’e atu kria ambiente ne’ebé mak saudavél ba abitante tomak iha kapital Díli, atu nune’e tempu udan labele afeita ba populasaun no labele kria moras oi-oin, orsamentu ba projetu ne’e hamutuk $200 Miloens hanesan ne’e.

Nia esplika VIII Governu ida ne’e hanesan Governu kontinuidade ne’ebé husi Governu anterior sira seluk, iha tinan 2011 trasa Planu Estratéjiku Dezenvolvimentu Nasionál 2011 ne’eb’e sei atinje rendimentu médiu altu iha 2030. Salvador realsa Governu iha hanoin katak, pilar ne’ebé mak importante ba Governu investe mak hanesan kapital Sosiál Ekonómia no Infraestrutura.

Nia hatutan infraestrutura ne’e rasik VIII Governu iha desizaun ba oin, ita iha infraestrutura ida ne’ebé mak Sustentavél, Kualidade Saudavél no Seguru ba povu tomak no fo benefísiu ba povu tomak, tarjetu ba liu-liu labarik no maluk defisiensia sira no grupu vulneravel sira seluk.

Nia dehan iha prosesu ne’e rasik Governu hakarak kria kampu servisu ba hasa’e kualidade ba povu nia moris, fo asesu ba fasilidade husi rezultadu prosesu dezenvolvimentu ne’e rasik, fo kresimentu Sósiu Ekonómiku ba ita nia rai no dezenvolvimentu ba Setór Privadu sira ne’ebé mak liga ho kria kampu servisu.

Ministru ne’e realsa problema ambiental no mudansa klimátika ne’ebé mak nia efeitu ita bele senti ba bebeik udan oituan, maibe bailoron naruk ne’ebé mak nia volume bot, tanba ita laiha planu setoral sira, atu nune’e bele akomuda mudansa no klimátika ho ita nia kresimentu ida demokrátiku ne’ebé fo impaktu ba ita nia ambiente fiziku, no ita nia sidade ita sei hasoru problema barak.

MOP agradese tebes ba prezensa ne’ebé mak husi Ministériu tolu hanesan husi Ministeriu Obra Públika (MOP), Ministériu Justisa (MJ), Ministériu Finansas (MF) no Ministériu relevante sira seluk, ne’ebé mak bazeia despaisu husi Primeiru Ministru nian.

Alende ne’e mos Diretor Jerál Agua no Saneamentu Gustavo da Cruz hatete komisaun Interministeriél ne’ebé mak iha grupu tékniku husi Diretor Jerál Liña Ministérial hotu, ne’ebé mak sei nomeia husi tutela, atu halo diskusaun ba asuntu, oinsa atu ita halo muda ba ita nia populasaun sira ne’ebé mak afeita husi Projetu Drainajen ho Saneamentu.

Tanba ne’e MOP invia ona karta ba Ministru Tutela sira, atu halo nomeasaun ba Diretor Jerál ho kargu Sefia sira ne’ebé iha relasaun ho servisu, atu muda ita nia populasaun sira husi Area afetadu Projetu husi Drainajen no Saneamentu. (BT)