DÍLI----Potensialidade boot ba riku soin iha teritóriu Timor-Leste dada kompañia IRON FORTUNE Husi Australia ho interese ida boot atu mai investe iha Timor-Leste hodi bele explora rikeza mineral ne’ebé nasaun foun ne’e.

Kompañia IRON FORTUNE hetan ona esperiénsia barak ba esplorasaun mineral iha nasaun balun mak hanesan iha nasaun Brazil, Ghana, Indonesia, Africa do Súl no Gabon hamosu interese boot hakarak mós atu bele partisipa iha explorasaun ba riku soin balun iha nasaun Timor-Leste.

Diretór Iron Fortune Ian Sinclair hateten Objetivu husi IRON FORTUNE hakarak atu asiste iha nasaun Timor-Leste hodi bele fó rendimentu ba nasaun no liu-liu ba komunidade Timor-Leste atu bele hetan moris di’ak, liu husi hetan oportunidade ba explorasaun mineral iha país ne’e.

“Tuir siénsia jeolojia katak nasaun Timor-Leste kategoria ba nasaun ida iha potensialidade tebes ba mineral no riku soin seluk tan ne’ebé mak kompañia IRON FORTUNE mós hakarak hetan oportunidade iha tempu ruma ba prosesu explorasaun nian hodi bele produs fatuk sai besi no bele mós uza ba bateria no seluk tan ne’ebé mak bele atu hetan valor iha merkadu,” dehan diretor IRON FORTUNE Ian Sinclair iha nia esplikasaun ba Konvidadu sira iha Timor Plaza, Kuarta-Feira (28/08/2019).

Oras ne’e daudaun kompañia IRON FORTUNE sei hala’o hela estudu hodi identifika potensialidade riku soin mineral ba iha munisípiu balun maibé enjeralmente seidauk bele identifika hotu tanba foin mak hetan husi parte balun Oe-Cusse, maibe fiar katak Timor-Leste iha potensiál boot ba mineral nian.

Manager Diretór & CEO Hamish Bohannan mós hatete katak IRON FORTUNE sai mós parseria no GULF Manganese hodi bele hala’o estudu ida ho kle’an atu nune’e bele prepara relatóriu hodi hato’o ba autoridade kompetente Mineral husi parte governu hanesan IPG, Timor Gap no mós ANPM atu bele haree.

“Oras ne’e sei halo de’it esklaresimentu badak ba Autoridade kompetente sira hodi bele hetan mós rekonesementu ruma tuir estudu ou peskiza ne’ebé mak oras ne’e sei hala’o daudaun hela iha nasaun Timor-Leste,” Dehan Manager Diretór & CEO Gulf Maganese Hamish Bohannan iha Timor Plaza, Kuarta-Feira (28/08).

IRON FORTUNE no Gulf Manganese sai parseiru ida ne’ebé mak sei hatudu kualidade serbisu ho di’ak atu bele fó rezultadu ne’ebé mak di’ak no benefísiu ba komunidade tomak no mós ba nasaun Timor-Leste. Tuir esperiénsia ne’ebé mak IRON FORTUNE iha ba explorasaun sei la fó impaktu boot ba ambiente tanba sei hala’o programa re-environmental ba iha area tarjetu sira.

Ida ne’e maneira ida atu proteje ambiente hodi la hamosu erupsaun, poluisaun no rai halai hodi labele fó implikasaun ba mudansa klimátika. Manager Diretór & CEO Gulf Maganese Hamish Bohannan hateten sei sinte kontente bainhira parte kompetente no Governu Timor-Leste bele kria lei ruma hodi fó dalan atu bele halo explorasaun ba riku soin Timor-Leste nian tanba bele lori benefísiu boot nasaun no bele kontribui ba Povu Timor-Leste nian moris di’ak. (BT)