DÍLI----Transporte aero hosi Indonesia ne’ebé halo operasaun tama sai Timor Leste porsentu 100 rejistratdu iha Servisu Rejistração E Verificação Emprezarial (SERVE).

Diretór Ezecutive SERVE, Florencio Sánchez hatete aviaun Indonesia ne’ebé mak hala’o operasaun mai aeroportu Nicolau Lobatu Comoro, Dili hodi tula pasajeiru sira tama sai Timor-Leste 100% rejistu ona iha SERVE liu husi ajénsia lokál ne’ebé mak koopera ho kompañia aviasaun Indonesia mak hanesan Trans Nusa no Sriwijaya.

Nia dehan Ajénsia lokál hanesan Aero Dili ne’ebé mak serbisu hamutuk ho sira halo aproximasaun ho SERVE no durante fulan tolu nia laran SERVE konsege finaliza prosesu rejistrasaun ba transporte aero ba kompañia Trans Nusa no Sriwijaya atu bele hetan lisensa hodi hala’o opersaun mai aeroportu iha Timor Leste.

Nia haktuir iha tinan 2014 liu ba kompañia aviasun hirak ne’e hatama pedidu mai governu Timor Leste maibé labele semo tanba seidauk rejistu iha SERVE, Maibé oras ne’e transporte aero husi nasaun Indonesia 100% kumpre ona buat ne’ebé mak ita nia lei haruka tan ne’e sira oras ne’e hetan ona lisensa legal hodi bele hala’o operasaun mai Timor Leste.

Entretantu kona-ba aviaun ne’eb’e mai hosi nasaun seluk hanesan aviaun husi Singapura nian hanesan City Link mak seidauk iha ligasaun no seidauk tama fali mai halo operasaun iha ne’e.

“Kestaun ne’e presiza ita nia governu mak bele halo negosiasaun ho kompañia seluk atu bele hala’o fali operasaun mai Timor Leste, tanba nia kustu ba alugér mak boot tebes no husi parte SERVE rasik la iha kbiit atu determina ba asuntu ne’e,” Dehan Diretór Executive Florencio Ba Jornalista Business Timor iha knaar fatin Tersa (23/07).

Florencio salienta tan katak realidade hare katak aviaun husi nasaun Australia Air North kontinua hala’o operasaun iha Timor Leste, no hakerek ona karta ofisial ida mai no iha vontade hakarak atu halo rejistrasaun iha SERVE maibé presiza tebes atu hala’o lei ruma husi parte ita nian. “Ita hare katak sira hatudu duni hakarak atu kumpre kona ba prosedimentu saida mak aplika iha ita nia nasaun,”dehan nia

Atu responde bainhira mak presiza atu rejista hodi fó legalidade ba aviaun Australia nian ne’ebé mak atualmente hala’o hela operasaun iha ita nia nasaun mak, oras ne’e hein hela ba lei tributária ne’ebé mak oras ne’e hato’o hela ba parlamentu atu diskute no pasa ona mak, iha tempu barak ita bele realiza prosesu rejistrasaun ba aviaun Air North nia operasaun mai iha SERVE.

Oras ne’e Air North halo operasaun mai Timor Leste rotina hela tanba hetan kontratu husi parte seluk liu-liu husi parte tasi Timor nian. Tan ne’e SERVE la bele intervein ba serbisu ne’ebé mak la’ós kona ba parte SERVE ninian kompeténsia. Maibé oras ne’e parte SERVE sei hein ba lei tributária ne’ebé sei pasa mak, sei konvida fali parte husi Air North atu bele diskute kona ba rejistrasaun hodi hetan legalidade no lisensa ba operasaun.

Nia Subliña tan katak husi parte Australia iha vontade di’ak atu hala’o diskute hodi resolve iha SERVE, no oras ne’e husi parte SERVE nian hala’o hela preparasaun hodi ko’alia ho parte Australia kona ba prosesu tomak labele hala’o prosesu balun maibé husik hela balun, no iha tempu barak sei realiza asuntu hirak ne’e.

Nia haktuitr depois de estabelese SERVE iha tinan 2012/2013 ho polítika ida atu resolve problema rejistrasaun legal ba atividade negósiu hotu hodi bele hetan legalidade Tuir Dekretu Lei Lima mak hanesan Dekretu lei No 35/2012, dekretu lei No 7/2007, dekretu lei No 16/2017 no seluk tan mak dekretu lei No 34/2017 no inklui mós ho Lei inan No3/2017. Lei hirak ne’e fó hela kompeténsia ba SERVE atu hala’o legaliza no fó lisensa ba kompañia hotu.

SERVE nu’udar Serbisu Verifikasaun e Rejistu Emprezariál, sai fatin ba emprezária sira atu bele hala’o rejistrasaun hodi hetan lisensa legal atu kria investimentu hodi hala’o atividade negósiu ho legalidade no seguru.Serve nia papél importante mak atu promove nafatin setór privadu sira tuir lei haruka.

Lideransa SERVE ne’e husu ba parte emprezariál no kompañia sira atu bele hakatba iha SERVE hodi halo rejistrasaun tuir lei ne’ebé mak vigora ona, tanba sekarik la rejistu iha SERVE mak sei konsidera katak ilegál no bainhira identifika mak sei selu multa. (BT)