DÍLI----Konstrusaun ba Terminal Portu Pasajeiru ne’ebé konstrui hosi Japaun Internasionál Cooperation Agency (JICA) ohin loron atinji ona 95% no iha tempu besik sei entrega ba Governu Timor-Leste.

Xefí Reprezentante JICA iha Timor-Leste Nagaishi Masafumi hatete, prosesu konstrusaun Terminal Portu Pasajeiru Dili dadauk ne’e atinji ona 95% ne’ebé iha tempu badak sei entrega ba Governu Timor-Leste hodi fasilita komunidade sira halo viazen ba Oe-Cusse no illa Ataúro ho seguru.

“Progresu konstrusaun Terminál ida ne’e, agora tama ona 95% ne’ebé mak tinan ida ne’e to’o fulan Setembru no Outubru hanesan ne’e hodi finaliza ona, atu bele entrega ba Governu Timor-Leste, atu nune’e komunidade sira bele utiliza hala’o viajen, ”dehan Xefí Reprezentante JICA Nagaishi Masafumi, hafoin remata vizita Portu refere ba Jornalista sira iha Portu Pasajeiru Díli, Segunda-Feira, (08/07).

Xefí Reprezentante JICA ne’e hatutan, ita hatene katak JICA implementa hela konstrusaun no realokasaun ba Terminál, objetivu husi Terminál ida ne’e, atu halo familiarismu JICA ho nia staf, no APORTIL sira kona-ba konstrusaun ida ne’e rasik.

Nia esplika Portu Terminál ida ne’e, depende ba kordenasaun entre Governu Timor-Leste liu husi Ministériu Transporte no Komunikasaun (MTK) no APORTIL, hodi kontrator no konsultor sira, maibe konstrusaun ida ne’e kompletu di’ak liu mak atu entrega lais ba Governu Timor-Leste atu nune’e bele utiliza.

Nagaishi Masafumi dehan orsamentu ba konstrusaun ne’e husi Governu Japaun liu husi JICA rasik hamutuk $20 mil hodi konstrui Portu Pasajeiru ne’e. Portu ne’e bele utiliza ho Ró rua, tanba kapasidade Portu ne’ebé ki’ik, Portu ida ne’e nia luan 20 Metru no nia Naruk metru 100.

“Tanba ne’e Terminál no Portu ida ne’e halo ba Ró deit, sorin ne’e mak hamutuk ho sasan sira, no transporte ne’ebé mak atu tama sai, tanba Portu ida ne’e utiliza ho sistema remot deit, mak bele regula sasán, ”esplika nia. Iha fatin hanesan Prezidenti APORTIL Flavio C. Neves hatutan ohin loron APORTIL hamutuk ho JICA ne’ebé mak dadauk ne’e iha Timor, hare prosesu Konstrusaun Portu Pasajeiru Díli, tanba ita hotu hatene, Portu Díli kuaze tama iha faze finalizasaun.

“Tanba ne’e mak APORTIL mai hamutuk ho JICA haree posibilidade ba Portu ida ne’e, atu nune’e bele prepara planu, transfere sasán sira ne’e ita atu uza ho di’ak, oinsa mak ita prepara rekursu bele iha responsablidade.

Konstrusaun ida ne’e hotu, ita entrega ba Governu no ba APORTIL, atu halo mak ita prepara ba traballadór sira, ida ne’e sesaun ida ne’ebé mak treinamentu atu prepara, traballadór sira ne’ebé mak iha kapasidade, tanba dadauk ne’e balun iha ona Portu nia laran atu bele fo treinamentu.

Nia hatutan sasan sira instala iha ne’e sasan mesak modernu hotu atu nune’e bele fasilita ita hotu, tanba ne’e ita presiza treinamentu, tanba ita identifika hotu ona, ikus mai tenki utiliza sasan sira ne’e ho di’ak, atu nune’e bele fasilita komunidade sira bele utiliza Portu ida ne’e hala’o viajen ba Oe-Cusse no Illa Atauro.

Tanba ne’e ita depende ba nesesidade dadauk ne’e ita iha Ró Nakroman tinan oin mai ho Haksolok no Nakroma rua ne’ebé mak sei mai atu utiliza Portu ida ne’e. Kona-ba Infraestrutura ida ne’e ita espera hanesan apoiu ne’ebé mak Governu Japaun fo Governu Timor-Leste, atu uza ho reponsablidade atu nune’e futuru oin mai ita bele dezenvolve mós Portu sira seluk. (BT)