DÍLI----Rotan nu’udar tali ida ne’ebé mak koñesidu mós iha mundu inklui mós Timor-Leste, hahú husi tempu beiala sira to’o mai ohin loron.

Iha tempu Portugues Rotan koñesidu tebes iha Timor-Leste tanba liu-rai sira bele uza hodi baku emar sira bainhira hetan kastigu no bainhira halo sala, nomos rotan bele uza ba kesi Babadok nomos Tanbor nia matan, maibe iha tempu Indonesia Rotan bele transforma ba kreatividade oin-oin maske sei la’o ho Tradisional ho nia durasaun ne’ebé mak badak tebes, no husi modelu Rotan ema matenek nain sira konsege foti nia ezempu hodi muda ba indústria maske la’ós uza Rotan maibe uza nia modelu deit.

Depois Timor-Leste hetan tiha ninia indepedensia liu husi Ajensia internasional nomos nasional, inklui mos kompañia internasional sira balun konsege transforma Rotan hodi sai produtu mobiliariu oin-oin hanesan Meza, Kadeira, Hafahe fatin inklui mos transforma mós ba iha produtu seluk tan ho nia folin ne’ebé karun tebes.

Husi transformasaun refere konsege hafanu timoroan balun maske ohin loron ita bele sura ho liman fuan ba ema ne’ebé kontinua dezenvolve Rotan iha Timor-Leste no parte ida hodi kria servisu ba-an rasik inklui mós responde ba nesesidade moris lor-loron. Maske timoroan balun konsege dezenvolve Rotan maibe timoroan balun lakon sentimentu atu hadomi produtu rotan, maibe timoroan ida ho naran Laurindo da Cruz kontinua ho fuan boot hodi dezenvolve Rotan sai ba mobiliariu ne’ebé ho kualidade di’ak inklui sai produtu oin-oin no bele uza ba hodi enfeita uma laran.

Iha semana liuba Jornalista BT konsege dada lia ho produtór mobiliariu hosi Rotan, Laurindo da Cruz iha nia knaar fatin Becora katak prosesu atividade produsaun Rotan sai mobiliáriu ne’e hahú hala’o iha tempu okupasaun Indonesia to’o Timor-Leste hetan Independénsia.

Ho liman badaen bele uza Rotan hodi halo Armáriu boot, médiu no ki’ik no mós Oratóriu, Kelu ho nia modelu oin-oin. Folin tuir nia medida ne’ebé hahú husi $15 to’o 60, makse prosesu fa’an sei manual no tradisionál tebes hanesan hulan iha kabas hodi lori tuir dalan no tama sai komunidade nia leet.

“Liu hosi ita ninia kriatividade mak bele hetan lukru balun hodi responde ba nesesidade báziku no haruka ona sira ba eskola,” Dehan Laurindo Da Cruz ba BT bainhira dada lia ho BT iha ninia hela fatin Suku Becora, Tersa-Feira (09/07)

Nia haktuir prosesu atu halo mobiliáriu ne’e presiza matéria prima mak hanesan, Rotan ki’ik no Rotan boot, Pregu, Tudik, Kado no Kompresór hodi pinta no material prima durante ne’e nia sosa husi komunidade ne’ebé mak sai fornesedor Rotan husi Postu Administrativu Laklubar.

Prosesu atu finaliza mobiliáriu ida presiza lori tempu loron tolu tanba oras ne’e material prima menus afeta husi programa tara balun ne’ebé mak implementa iha area refere. Laurindo haktuir durante ne’e seidauk hetan formasaun ou apoiu ruma husi parte Governu no instituisaun relevante maibé vontade rasik tuir kapasidade ne’ebé mak iha nafatin hala’o atividade ne’e hodi fornese ba merkadu tradisionál.

Nia afirma katak maske produsaun refere la’o mesak no la involve iha grupu ka organizasaun ruma inklui la hetan apoiu husi Governu no nafatin iha vontade di’ak hodi dezenvolve produtu Rotan ba mobiliariu sira ho kreatividade ne’ebé nia iha. “Oras ne’e serbisu rasik no la involve aan iha grupu ruma no sei kontinua ho maneira tradisionál, apoiu mai husi família rasik, maibé nia rezultadu hatudu kualidade no konsumidór balun mak utiliza ona iha durasaun tempu naruk,” haktuir nia

Nia mos klarifika katak dezafiu ne’ebé oras ne’e hasoru mak konsumidór barak prefere liu sosa sasán importasaun husi nasaun Xina tanba ho folin baratu no bele hetan iha Loja Xineza iha fatin-fatin.

“Ida ne’e sai dezafiu bo’ot ida hodi hamate vontade timoroan nia partisipasaun iha dezenvolvimentu negósiu inovativu, Tan ne’e presiza apoiu Governu hodi promove kriatividade ne’ebé mak iha, atu nune’e bele dezenvolve tan produtu lokál hodi fó benefísiu sustentablidade ba parte hotu iha nasaun Timor-Leste,” dehan nia.

Tan ne’e ho dezafiu no koñesimentu ne’ebé menus husu ba Governu atu bele apoiu formasaun no apoiu finanseiru hodi bele haboot liu tan kreatividade ne’ebé mak iha nune’e bele kompete iha merkadu rai laran. (BT)