DÍLI----Liu hosi investimentu Kompañia Star King ba area loja, Fabrika no Konstruksaun, konsege emprega ona traballadór timoroan hamutuk 437 ital, maibe hosi numeru ne’e ohin loron 180 ital maka sei ativu servisu iha investimentu kompañia Star King.

Diretor Kompañia Star King Lay Siu Hing hatete, kompañia Star King hahu harii iha Timor-Leste iha tinan 2001, hodi hahu uluk ho loke Loja hodi fa’an sasan nesesidade baziku ba komunidade maibe iha tinan 2007 Star King sai mos hanesan distributor, hodi distribui Foos no sasan sira seluk ba Governu liu hosi MCIA, inklui distribui kareta hodi fa’an iha Timor-Leste.

“Ami nia kompañia hari’i iha tinan 2001 hodi hahú negosiu hodi fan nesesidade báziku ba komunidade, maibe depois de ida ne’e iha tinan 2007 ami kontinua loke a’an hodi sai distributor ba Governu Timor-Leste liu hosi MCIA hodi distribui Foos no sasan sira seluk ba Governu,” dehan Lay ba Jornalista BT iha nia k’nar fatin Audian, Kinta-Feira (21/03).

Lay hatutan, liu hosi mehi ne’ebé bo’ot sira koko kore a’an hosi area negosiu no distributor, hodi harii tan kompañia konstrusaun para halo Fabrika ba Ekipmentus Eletrisidade (rin elektrisidade) no material konstrusaun nian ne’ebé komesa iha tinan 2010, inklui loke mos Delear Motor Yamaha. 

Tanba ne’e liu hosi harii Kompañia Konstrusaun, sira mos kompete iha tenderizasaun hodi halao Projetu Governu nian, hanesan hadia Estrada iha Timor laran. Lay subliña katak, traballadór ne’ebé Star King emprega iha parte Loja nian hamutuk na’in 64, kompostu hosi feto na’in 9 no mane na’in 55.

Maibé ba area Fabrika konsege emprega traballadór hamutuk 73, hosi numeru refere kompañia hapara ona traballadór hamutuk 50 resin, tanba impkatu hosi impase politik no agora kompañia seidauk emprega hikas sira tanba movimentu servisu iha timor seidauk la’o. Entertantu ba area konstruksaun antes kompañia konsege emprega traballadór hamutuk 300 resin, maibe agora hela 80 resin maka ativu tanba projetu la iha. 

Lay imforma katak, hosi devidas ne’e rasik kompañia timoroan sira maka involve, tanba ekipamentus ne’ebé sira uja ba hadia projetu hanesan monta elektrisidade no gorong-gorong inklui ekipamentus sira seluk, kuaze utiliza ekipamentus Star King nian no devidas ne’e rasik ho montante $2 milhõens ital, maka to agora kompañia sira seidauk selu, tanba governu seidauk selu sira nia devidas.

Entertantu liga ba politik ka vizaun hosi kompañia nian rasik ba futuru, nia dehan iha timor iha oportunidade barak maka bele halo investimentu no sira iha interese. Maibe agora dadaun sira seidauk bele loke tan investimentu foun, tanba sei hare’e ba situasaun rai laran, ne’e dunik ba oin kuandu situasaun garantido i sira sei loke tan investimentu foun, para bele dezenvolve diak liu tan nasaun Timor-Leste.

Entertantu iha parte seluk Lay mos sujere ba governu hodi tau mos atensaun ba area Fabrika, hodi nune’e area Fabrika ba Industria rai laran tenki fo oportunidade ba kompañia lokal maka zere. Tanba agora dadaun kuaze kompañia internasional mai loke rasik sira nia Fabrika iha timor, ne’e dunik ida ne’e hamate ona kompañia lokal atu lao ba oin, tanba mosu kompetisaun.

Tanba hare’e ba Fabrika ne’ebé sira halo, hare’e ba kualidade la dok hosi kompañia internasional nian. Tanba ne’e se kompañia internasional mai loke rasik sira nia Fabrika, hakarak ka lakoi timoroan sei sai penonton. (BT)