DÍLI----Ministra Finansas (MF) Sara Lobo Bristis, informa katak, Minitériu Finansas fó ona Orden ba Banku Sentrál Timor-Leste (BSTL) hodi Transfere Orsamentu ho Montante Millaun USD 650 Tanba BSTL rasik hanesan jestór hodi sosa Asaun ConocoPhillips no Shell.

“Servisu ida ne’e hala’o husi Parte tolu Ministériu Finansas, Sentrál no Timor Gap, husi parte Ministériu Finansas konklui ona, fó ona orden ba Banku Sentál, dadaun Banku Sentrál no Timor Gap estabelese hela akordu entre sira, mas ha’u fira katak sira to’o ona iha konkluzaun no sei transferé iha semana ne’e nia laran”, hateten Ministra ne’e ba jornalista sira iha Palasiu Governu Díli (13/03/2019).

Membru Governu ne’e mós esplika modelu husi tranferénsia orsamentu ne’e, katak, Banku Sentrál sei tranferé Orsamentu ne’ebé iha ne’e ba Timor Gap depois osan hirak ne’e Timor Gap mak sei aloka ba ConocoPhillips no Shell.

“Lalaok Transferénsia, Banku Sentrál jere Fundu Mina-rai tanba hanesan Jestór operasionál, pur tantu nia modelu tranferénsia bazeia ba regra interna ne’ebé aplika ona iha Banku Sentrál”,esplika nia.

Nia mós informa tan katak, Orsamentu ba Mina rain nian durante ne’e rai iha Banku Federál Estadus Unidus Amerika, ho ida ne’e Banku Sentrál sei komunika ho Banku Federál hodi informa transferénsia Osan ho montante ne’ebé Ministériu Finansas antes ne’e fó instrusaun. (BT)