DÍLI----VIII Governu ne’ebé Lidera husi Primeiru Ministru (PM) Taur Mata Ruak, kontinua deklara kontinua firmi hodi luta ba dada kadoras hosi mina matan greater sunrise mai prosesa iha Timor-Leste liu-liu iha tasi mane maske ohin loron ema balun sei kontinua preokupa.

PM Taur Matan Ruak hateten Timor-Leste (TL) sei kontinua manán no susesu ba operasaun dada kadoras mai Timor-Leste tanba governu mais preparadu ona dada pipe line no sei fó benefisiu ba ekonomia rai laran. “Ha’u fiar timor sei kontinua manán no susesu ba operasaun ida ne’e tanba ita prepara an loos ba dada pipe line mai timor komesa esplorasaun to’o finiliza,” dehan PM Taur atan Ruak ba jornalista sira iha kapela Bidau Leçidere hafoin partisipa Misa Sinza (07/02).

Xefe governu ne’e hateten, ohin loron ema barak preokupa maibe bainhira TL dada kadoras mai to’o timor mak foin hakfodak katak TL nia investimentu dada kodoras mai timor sei fo benefisiu ba jerasaun sira liliu ba joven sira ne’ebé mak barak dezempregu. Nia Afirma tan, TL nia preokupasaun sira ne’e hodi atinzi ita nia mehi no ba nasaun nia futuru, ba tempu naruk tanba TL hotu-hotu hakfodak ba situasaun tomak iha ita nasaun ho poliotiku sira nune’e ita hotu mós hakfodak no laran tarridu ba fundu petroliofeiru.

Tuir PM Timor-Leste nia fundu petroliofeiru labele aguenta sei wainhira la produz tan, la buka investe ka aumenta tan entaun ita nia governu, ita nia nasaun halo esforsu no prepara an hodi dezenvolve investimentu ida ne’e di’ak liu tan hodi nune’e bele fó benefisiu ba nasaun.

Tanba ne’e PM hateten tan, risku bo’ot ba timor oan sira mak mate, mate mak ba hasoru halo invazaun hodi manán funu no ikus mai ita hetan ukun-an no tanba saida mak ita la liu husi Indonesia tanba ita risku laiha nune’e semak la barani simu risku nia nunka bele susesu iha nia vida.

PM esplika tantu ba pessoal, tantu ba individual nomós ba nasaun no povu tomak nia preokupa tanba ita Timor ne’e preparadu loos, besik hotu ona loron ida ita boot sira sei hakfodak katak ConocoPhilips ho Shell simu tiha ona osan ona. Entretantu tuir programa governu ba Petróleu ho Rekursus Minerais sai Pilar ida mós ba dezenvolvimentu ekonómiku futuru Timor-Leste nian, mak setór Petróleu ho Rekursus Minerais, ne’ebé sei garante katak rikeza (ka rikusoin) husi rekursus naturais sei utiliza hodi konstrui (ka harii) Nasaun no proporsiona progresu no bein-estar ba povu timor tomak.

Vizaun nasional, ne’ebé temi iha Planu Estratéjiku Dezenvolvimentu (2011-2030), mak ida ne’ebé dehan katak infraestrutura ne’ebé nesesária (ka presiza tebetebes) ba dezenvolvimentu Petrolíferu, tenki implementa iha Kosta Sul, ne’ebé sei serve hodi kria dividendus ekonómikus, nebé diretus ba populasaun tomak, liuhosi atividades indústria petrolífera ho kriasaun postus trabalhu koneksus (ka ne’ebé iha ligasaun ba malu), no mos liuhosi dezenvolvimentu infraestruturas apoiu ba Kosta Sul Timor-Leste.

Dezenvolvimentu ida ne’e, ne’ebé temi ho naran Projetu Tasi Mane, hanesan programa plurianual ida ho vizaun atu kria polus (ka sentrus) industriais tolu, ne’ebé konsidera hanesan espiña dorsal (ka suporte prinsipal) ba indústria petrolífera timor-nian. Ba kurtu-prazu, atu konkretiza vizaun ida ne’e, Governu sei kontinua haka’as-an iha negosiasoens ho emprezas ne’ebé envolve iha prosesu Greater Sunrise nian, hodi konkretiza rejime espesial ba Kampu Greater Sunrise, ne’ebé prevê tiha ona iha Tratadu kona-ba delimitasaun fronteiras marítimas entre Timor-Leste ho Austrália, ne’ebé asina iha Marsu 2018.

Projetu Tasi Mane ne’e sei kontribui la-ós de’it ba dezenvolvimentu kosta sul ein-jerál, no liu-liu ba indústria petrolífera, maibé mos sei abranje (ka kobre) impaktus ekonómikus, diretus no indiretos, lubun boot ida, iha nível nasional, rejional no lokal, hodi fó benefísius ne’ebé mai husi explorasaun rekursus naturais Timor-Leste nian.

Projetu ida ne’e sei aumenta Produtu Internu Brutu (PIB) nasional ho lukrus husi exportasaun, no mos sei kria oportunidades ba empregu durante konstrusaun ho operasaun infraestruturas ne’ebé koneksas (ka ligadas), aleinde funsiona hanesan katalizador (ka dinamizador) ida ba dezenvolvimentu Kosta Sul.

Prevê katak sei hamosu to’o 10.000 postus de trabalhu diretus, husi projetu Tasi Mane, no liu 50.000 postus de trabalhu indiretus sei bele kria ho transformasaun setor petrolíferu, husi faze atual hanesan halo de’it extrasaun, ba faze avansada liu ho ona industrializasaun ho kriasaun valór akresentadu (katak sei hamosu tan benefísius seluk no reseitas).

Aleinde ne’e, Projetu Tasi Mane ne’e sei fó benefísius indiretus, hodi influensia dezempeñu ekonómiku ne’ebé boot liu ba País, hanesan rezultadu husi dinamizasaun setóres industriais seluk.

Investimentu ne’ebé partisipantes, iha projetu ne’e, halo, no husi trabalhadores sira, husi Governu no husi benefisiárius privadus sira, sei produz “efeitus multiplikadores” (ka barak tebes), tanba atividades ekonómikas ne’ebé asosia ho projetu ne’e sei fó impaktu ba ekonomia ein-jerál, ne’ebé sei mai husi akizisaun ba beins no servisus adisionais, husi trabalhadores, no mos husi emprezas, ne’ebé direta ka indiretamente, envolve-an iha projetu.

Investimentu iha ativus fízikus ne’ebé produtivus (hanesan instalasoens ba produsaun enerjia elétrika, estradas ho aeroportus) ho ativus sosiais (hanesan ezemplu, konstrusaun pólus (ka sentrus) foun, tantu urbanus no mos ba ensinu no hadi’a servisus edukasaun ho saúde), sei bele mos benefisia ekonomia liuhosi maksimizasaun iha produtividade husi fatores ekonómikus oioin.

Impaktu signifikativu ida mós, husi projetu ne’e, mak hanesan oportunidades ne’ebé sei mosu ba negósius lokais. Oportunidades hirak ne’e, inklui subkontratasaun ba servisus hanesan restaurasaun, enjeñaria, seguransa, fornesimentu kombustível, servisus jestaun, profisionais ho téknikus.

TIMOR GAP sei kontinua hala’o mandatu husi Governu, atu jere no administra projetu Tasi Mane. Empreza Públika ida ne’e sei apoia kriasaun indústrias de suporte, no apoia dezenvolvimentus rekursus umanus nesesárius ba operasionalizasaun ne’ebé efisiente husi setor petrolíferu.

Prevê katak konstrusaun infraestruturas bázikas hirak ne’e, bele impulsiona (ka dudu) no insentiva investimentus komersiais iha projetus seluk no áreas ne’ebé inkorpora (ka tama hotu) iha área ne’ebé hetan impaktu husi Tasi Mane. Realidade ida ne’e transforma karáter atual setor petrolíferu Timor-Leste nian, ne’ebé ho dimensaun (ka karakter) extrativa deit, hodi permite nia evolusaun ba setor petrolíferu ida ne’ebé ho valor akresentadu boot, no ho karíz (ka natureza) industrial no diversifikadu liu, inklui dezenvolvimentu refinaria ida ho pólu indústria petrokímika, no fábrika Gás Natural Likefeitu (“GNL”).

Governu Timor-Leste, núdar proponente no promotor ba projetu integradu Tasi Mane, sei partisipa iha finansiamentu ba projetus balun, no mos iha infraestruturas bázikas, hanesan ezemplu, aeroportu ho baze lojístika Suai. Projetus seluk iha Tasi Mane sei konstroe no dezenvolve ho baze iha rejime ‘project finance’ no ho formas investimentu privadu seluktán no investimentu mistu.

Nune’e, Governu sei kontinua dezenvolve estudus ho planus investimentu, hodi konsidera envolventes (ka buat) hotu-hotu ne’ebé presiza ba realizasaun projetu ne’e, inklui estudus kona-ba impaktu ambiental, atu bele minimiza impaktus negativus iha meiu ambiente no umanu. Projetu Tasi Mane ne’e konstituídu (ka kompostu) husi pólus dezenvolvimentu hanesan tuir mai:

Dezenvolvimentu Baze Lojístika ida
Sei konstroe no operasionaliza baze lojístika ida iha Suai, nia fatin mak iha Camanasa, Munisípius Covalima, ne’ebé sei inklui konstrusaun instalasoens lojístikas no marítimas. Baze ida ne’e sei serve atu apoia atividades petrolíferas tomak, ne’ebé hala’o iha Área Eskluziva Timor-Leste nian no iha áreas adjasentes iha Tasi Timor, no mós atividades ekonómikas jerais, komersiais no industriais seluktán.

Baze Lojístika iha Suai ne’e sei serve mos hanesan pontu entrada ida ba jestaun kadeia (ka rede) abastesimentu (ka fornesimentu) atividades husi agrupamentus industriais rua seluk, hanesan, refinaria ho kompleksu petrokímiku ida ho fábrika GNL ida. Baze lojístika ida ne’e sei abranje mos:

Instalasoens terrestres – edifísius ba operasoens nian, armazéns kobertus, mini bazes terrestres, parke armazenajen kombustível nian, depózitus armazenajen bee nian, sistema jestaun ba rezíduus ka lixu, zonas estasionamentu, instalasoens rekreativas no komunitárias, entre buat seluk;

Instalasoens marítimas - ponte-kais tolu mak hanesan ponte-kais prinsipál, ponte-kais ba ró-barkasas no rampa (ka fatin) ba embarkasoens dezembarke nian, ne’ebé apoia ho postu atrakasaun ba rebokadores, postu akostajen (ka sadere nian) ba embarkasoens pasajeirus ho kebramar (ka muru boot) ne’ebé liga ba Kosta, hosi sátan no fahe laloran, hodi portu ida ne’e bele kalmu (ka hakmatek), seguru no protejidu ba instalasoens iha rai-laran;

Projetu ida ne’e sei iha impaktu sosial boot tebetebes, tanba sei sai hanesan plataforma impulsionadora ida, hodi loke oportunidades trabalhu, jera/kria postus de trabalhu atus-ba-atus, hodi apoia dezenvolvimentu ekonómiku nasional, no hadi’a maka’as kompetênsias maun-de-obra lokal, iha áreas hanesan fabriku besi-asu, konstrusaun sivíl, konstrusaun marítima, enjeñaria mekânika no elétrika, entre buat seluk. Prevê mos katak indústrias naun-petrolíferas seluk, hanesan peska komersial, bele mos benefisia ho instalasoens marítimas hirak ne’e.

Halo tiha ona estudus kona-ba impaktu ambiental ho mós hala’o ona konsultas públikas, relasiona ho projetu ne’e, no mos hetan ona lisensa ambiental, iha 2013 no hafoin renova fali iha 2015.

Dezenvolvimentu Refinaria Petrolífera ho Kompleksu Petrokímiku ida
Pólu dezenvolvimentu Daruak ba Projetu Tasi Mane, kompostu husi Refinaria Petróleu no Kompleksu Petrokímiku iha Betano, ne’ebé lokaliza iha kosta Munisípiu Manufahi nian. Instalasoens hirak ne’e mak sei konverte (ka transforma) Mina-rai kondensadu, ne’ebé mai husi Tasi Timor, ba kombustíveis oi-oin no ba produtus petrolíferus refinadus seluk.

Prevê mos katak projetu ne’e sei halo Timor-Leste sai autosufisiente, relasionadu ho fornesimentu gazoliona, ne’ebé la iha xumbu, ho diezel, ho marjen (ka espasu) atu satisfaz (ka responde ba) aumentu iha prokura doméstika, iha futuru.

Kompleksu refinaria ne’e, harí iha área boot ida ho serkade 230 ektares. Instalasaun prinsipal refinaria ne’e nian, konsiste husi unidade prosesamentu ida no unidades apoiu, hanesan unidades ba utilidades, unidade ba tratamentu rezíduos, rezervatórius ba matéria prima nian no produtus petrolíferus, rezervatório bé ba kombate insêndius no aterru ba jestaun rezíduos sólidus (ka maran).

Kompleksu ne’e sei iha instalasoens apoiu, hanesan armazéns, edifísiu operasoens, edifísiu administrasaun, laboratóriu, gabinete seguransa no kombate insêndius ho refeitóriu (ka han-fatin). Bé, ne’ebé hodi halo operasoens refinaria, sei kanaliza husi bee-matan ne’ebé dok 10 km husi refinaria.

Iha etapa inisiál faze dezenvolvimentu ida ne’e, sei estabelese refinaria ida ba produsaun kombustíveis, tantu ba konsumu doméstiku (diezel, gazoliona, GPL ho Nafta), nune’e mos ba exportasaun. Pólu refinaria iha Betano sei konkretiza, liuhosi parseria komersial, ne’ebé TIMOR GAP mak sei dezempeña papel prinsipal, hanesan dinamizadór ba dezenvolvimentu projetu ne’e.

Estudus viabilidade kona-ba projetu ida ne’e dezenvolve tiha ona, nune’e mos estudus kona-ba impaktu ambiental, no realiza mos ona konsultas públikas. Oras ne’e daudaun, hein hela lisensa ambiental, atu hahú projetu.

Dezenvolvimentu Fábrika Gás Natural Likefeitu
Governu sei kontinua haka’as-an atu dezenvolve gás, ne’ebé mai husi kampu Greater Sunrise, liuhosi konstrusaun gazodutu (ka kadoras gás nian) ne’ebé liuhusi tasi okos to’o iha kosta Sul Timor-Leste, no konstrusaun no operasaun fábrika Gás Natural Likefeitu (GNL) ida, hodi hala’o prosesamentu.

Agrupamentu ida ne’e sei inkorpora kompleksu fábrika GNL nian, inklui instalasoens marítimas ne’ebé asosiadas (ka koneksas), nune’e mos ho áreas urbanas foun. Aeroportu iha Viqueque sei reabilita atu bele iha kapasidade atu opera (ka hala’o) dezlokamentus “fly-in-fly-out” (FIFO) ba trabalhadores ne’ebé servisu ba operadores GNL, hodi serve mos hanesan aeroportu rejional ida.

Dezenvolvimentu Zona Kosteira Sul
Sei konstroe no/ou operasionaliza infraestruturas ne’ebé nesesárias, hodi suporta indústria petrolífera, halo ligasaun entre agrupamentus ou pólus petrolíferus tolu né. Ida ne’e sei inklui:

Sidades foun, hodi aloja ka simu trabalhadores setór nian no hodi realoja rezidentes lokais; Autoestrada ida ho propózitu liga agrupamentus tolu ne’ebé refere no apoia kresimentu indústria petrolífera iha kosta sul tomak, hodi permite dezenvolvimentu ekonómiku jerál no hadi’a populasoens tomak nia moris. Autoestrada ida ne’e inklui mos serkade 28 pontes prinsipais lubuk ida; Portu multifunsional ida iha Suai, hodi apoia baze lojístika ida nebá;

Aeroportu iha Suai, ne’ebé halo hotu ona, ba operasoens seguras aeronaves lijeiras (ka ki’ik) ho elikópterus nian, hodi apoia atividades petrolíferas. Aeroportu ida ne’e sei reforsa transporte pasajeirus no merkadorias, inklui terminal ida ho instalasoens alfândegas ho imigrasaun nian, kuartél ba bombeirus, heliportu ida ho mós instalasoens servisus aéreus ba ambulânsia. Nafatin iha setór ida ne’e, Governu sei:

Kontinua forma kuadrus profisionais no téknikus no fó bolsas estudu ba áreas espesializada, ne’ebé iha ligasaun ho setor petrolíferu;
Kontinua kapasita komunidades iha Munisípius, ne’ebé envolvidus diretamente iha Projetu Tasi Mane ne’e; Dezenvolve mekanizmu ida kona-ba uzu gás natural iha atividades ekonómikas país nian;

Estabelsese kompañia nasional mineira Murak-Rai Timor-Leste S.A, ne’ebé sei tau-matan ba intereses Estadu nian, iha atividades explorasaun rekursus minerais país nian; Aumenta atividades estudu, peskiza ho promosaun ne’ebé halo nafatin iha rai-laran no rai-liur, atu bele maksimiza investimentu iha setor petrolíferu no mos iha setor mineiru;

Garante konformidade (ka kumprimentu) ba Transparênsia husi Indústrias Extrativas (ITIE), hodi kontinua hato’o relatórius nesesárius;
Asegura sinerjias ho kooperasaun internasional, iha âmbitu setor rekursus enerjétikus; Kontinua trabalhus de peskiza no dezenvolvimentu petróleu no gás nian, iha áreas terrestres no marítimas (ka tasi laran) Timor-Leste nian, liuhosi TIMOR GAP ho ninia parseirus, ou investidores interesadus seluktán;

Asegura katak reseitas ne’ebé mai husi explorasaun petróleu ho gás naturál bele kontribui ba industrializasaun país no ba dezenvolvimentu atividades ekonómikas nasionais seluk, no aumentu iha exportasoens; Dezenvolve lejislasaun adisional no regulamentasaun kona-ba jestaun ne’ebé efisiente no transparente, iha atividades tomak ne’ebé relasiona ho explorasaun rekursus petrolíferus ho minerais iha Timor-Leste, inklui:

Revizaun ba Lei kona-ba Atividades Petrolíferas ho lejislasaun komplementa seluk; Aprovasaun ba Kódigu Mineiru no kontratu modelu, hodi hala’o operasoens mineiras, ho lejislasaun no regulamentasaun komplementar; Aprova no implementa lejislasaun nesesária atu asegura implementasaun ba dispozisoens ne’ebé prevê ona iha Tratadu ba Fronteiras Marítimas entre Timor-Leste ho Austrália, hanesan kona-ba tranzisaun husi Kampus petrolíferus husi Área Dezenvolvimentu Konjuntu Petrolíferu ida uluk, ba fali jurisdisaun exkluziva Timor-Leste nian. Estabelesimentu Fundu Mineral ida, atu asegura administrasaun ne’ebé di’ak liu ba reseitas ne’ebé hetan husi atividades minerais iha País. (BT)