DÍLI----Politika Adezaun Timor Leste ba Organizasaun Association of South east Asian Nations (ASEAN) To’o oras ne’e kontinua lao hodi atinji politika ne’ebe mak Timor Leste iha oinsa bele hola parte mos iha Organizasaun refere.

Tinan-tinan Timor Leste kontinua kompri regulamentu ne’ebe fo sai hodi lori adesaun ne’e rasik tanba pedidu adesaun nian haruka ona ba iha tinan 2011 maibe to’o agora nasaun balun sidauk fo sira nia apoiu ba Adesaun Timor Leste hanesan nasaun Singapura.

Tan ne’e Timor Leste kontinua servisu makas tanba iha tinan 2016 Delegasaun ida ba iha Honolulu iha Havai (EUA), partisipa iha semináriu ida ne’ebé organiza husi Forum Rejionál ASEAN nian. Ne’e hanesan sorumutuk datoluk organizasaun ne’e nian, ne’ebé maka Timor-Leste partisipa iha tinan ne’e no sei sai nu’udar biban ida tan hodi hametin ba ninia prontu atu tama ba adezaun.

Partisipasaun tomak iha sorumutuk hirak ne’e nu’udar parte ida husi programa atividade sira nian lubun ida ne’ebé destina hodi halo preparasaun nesesária hotu-hotu ba adezaun Timor-Leste nian ba-iha Asosiasaun Nasoins Sudeste Aziátiku nian, ne’ebé koñesidu ho sigla ingleza, ASEAN tanba adezaun sei reforsa integrasaun rejionál no iha impaktu polítiku, ekonómiku no sosiál pozitivu sira ba Timor-Leste no ba nasaun membru sira seluk grupu ne’e nian.

Pedidu adezaun nian haruka ona iha tinan 2011 maibe agora kestaun tempu de’it ba destinu Timor Leste tanba Tuir jeografia Timor-Leste situa iha Sudeste Aziátiku, ne’ebé rekoñese nu’udar Estadu ida ne’ebé soberanu husi nasaun membru hotu organizasaun ne’e nian, dispostu atu respeita Karta ASEAN nian no prontu atu kumpre obrigasaun kona-ba adezaun nian, Timor-Leste prenxe kritéria ne’ebé hatuur tiha ona. Admisaun ne’e hetan desizaun liuhusi konsensu iha Simeira, liuhusi rekomendasaun Konsellu Koordenasaun Asosiasaun ne’ebá nian.

Hahú kedas iha tinan 2011, faze preparasaun nian balun inklui tiha ona programa sira nivel nasionál ba sensibilizasaun instituisaun sira nian no sosiedade sivíl kona-ba matéria ne’e, harii Pontu Fokál sira no Sekretaria Estadu ba Asuntu sira ASEAN nian, reforsa kompeténsia liuhusi formasaun no diálogu, partisipasaun iha Forum Rejionál no iha sorumutuk rejionál no globál sira seluk, harii no reforsa embaixada sira Timor-Leste nian iha nasaun hotu-hotu organizasaun nian.

Iha Governu nia laran, introdusaun no aplikasaun kona-ba “Modelu sira ASEAN nian” (“ASEAN Blueprints”) iha dezenvolvimentu polítika nasionál nian garante hela katak, polítika foun sira no kuadru regulamentár sira integra tiha ona ho modelu sira husi organizasaun nian.

Ho politika ne’ebe iha Ministériu Negósiu Estranjéiru no Kooperativa (MNEC) liu husi Diresaun Diretór Jerál Timor-Leste ba ASEAN Jorge Camoes hateten katak ba oin Timor lete tenke servisu makas nafatin hodi lori adesaun Timor leste bele involve iha Organizasaun refere. Diretór Jerál hateten ba oin TL tenke servisu atu nune’e atu nune’e Timor-Leste bele tama hotu membru Asean nian atu nune’e hala’o mapamentu bazeia ba Timor-Leste Aseam Mobilizasaun Programa (TLMP) ba Asean.

“Hanesan programa ida ba longu prazu programa ida molok ita ba ASEAN baze atu ita sai membru asean, iha ne’ebá ita sei halo, mapamentu bazeia ba programa ASEAN ninian no mós ita sei hare programa Timor ninian tanba tuir planu asaun ita nian no liña ministériais ne’ebé mak responsavel ba área espesifiku ninian, no mós tenta atu hare kuadru legal saida mak ita atu orienta atu hala’o programa sira ne’e, no mó ita presiza tempu hira mak atu hala’o programa sira ne’e,” dehan Diretór Jerál Timor-Leste ba ASEAN Jorge Camoes ba Bt iha nia knar fatin Ministériu Negósiu Estranjéiru no Kooperativa (MNEC) Praias do Kokeirus Pantai-Kelapa Dili, Segunda-Feira (18/02).

Nia esplika katak to’o agora Timor Leste halo ona enkontru ho liña Ministériais sira hotu ona, forma ona grupu sevisu, bazeia ba pilar tolu Asean nian hanesan Polítiku, Seguransa, no Sosiu Kultural lori ona rezolusan ida ba Konsellu Ministru atu oinsá bele futuru reforsa tan ba TL nia preparasaun adizaun ba ASEAN nian no rezolusaun ne’e rasik pasa tiha ona.

Ho rezulusaun ne’ebe pada TL kontinua halo servisu ba oin hodi hare área ekonómia nian, iha área polítika no mós iha área sosiu cultural nian. Nia mos afirma katak oras ne’e dadaun TL iha ona akordu balun ne’ebé mak presiza hare fila-fali akordu komersiu ninian, iha tratadu konabá movimentasaun, sertifikasaun orijen iha área ekonomia ninian.

Iha Governu nia laran, introdusaun no aplikasaun kona-ba “Modelu sira ASEAN nian” (“ASEAN Blueprints”) iha dezenvolvimentu polítika nasionál nian garante hela katak, polítika foun sira no kuadru regulamentár sira integra tiha ona ho modelu sira husi organizasaun nian.
Ministériu Negósiu Estranjeiru no Kooperasaun sei konklui análize ida luan ne’ebé kona-ba polítika sira hotu no kuadru regulamentár atuál sira Timor-Leste nian, ne’ebé sei aprezenta ba Konsellu Ministrus hodi halo aprovasaun.

Elaborasaun dokumentu, ne’ebé koñesidu ho Memorandu kona-ba Rejime Komérsiu Esternu, hatudu to’o iha pontu ne’ebé maka Timor-Leste deside ona hodi prenxe rekizitu sira ASEAN nian. Iha nia mak sei define pasu sira ne’ebé maka tenkesér foti hodi alkansa konfomidade kompleta ho buat ne’ebé pratika iha Asosiasaun.

Nune’e, Sekretariadu no membru sira organizasaun Nasaun Sudeste Aziátiku nian sei bele komprende ho di’ak estadu atuál enkuadramentu nasionál nian sira, hodi hatudu prontidaun no esforsu sira ne’ebé Timor-Leste halo ona to’o ohin loron, atu prepara an didi’ak hodi asumi obrigasaun sira nu’udar membru Asosiasaun nian.

Antese ne’e mos Ministru Estadu Agio Pereira, Portavós Governu nian konsidera ona katak, “adezaun ba ASEAN sai ona nu’udar prioridade polítika esterna nasionál hahú kedas iha TL restaurasaun independénsia nian. Governu Konstitusionál nafatin hametin iha prontidaun nasionál tan ne’e Timor-Leste hakarak partisipa lalais iha prosesu ida ne’e no fó kontribuisaun boot, hanesan foin-sa’e no dinámiku iha membru família Sudeste Aziátiku nian

La’o hamutuk Konsidera TL Seidauk bele adere ba ASEAN
Organizasaun Naun Governamental (ONG) La’o Hamutuk (LH) konsidera oras ne’e Timor-Leste seidauk prepara an didiak atu adere ba ASEAN maibé pratika Timor Leste nian iha ona hanesan sidadaun ASEAN balun mai tama ona Timor halo investimentu nomos buka servisu iha Timor Leste.

La’o Hamutuk nia hare katak Timor-Leste seidauk bele tama iha tempu badak tanba atu adere ba ASEAN Timor-Leste tenke hadia mak hanesan Setór Privadu, Ekonómia no mós dezenvolvimentu rai laran ne’ebé mak dadauk ne’e sei iha problema.

Tuir Mariano Ferreira nu’udar Diretor Organizasaun Naun Governamental (ONG) La’o Hamutuk (LH) hatete dadaun ne’e Timor-Leste seidauk bele atu Adere tama Asean, maibé pratika iha ona Asean nia laran, tanbá membru Nasaun ASEAN balun mai halo sevisu iha Timor hanesan traballador, no balun hanesan Investor.

“Maske ofisialmente ita seidauk adere ba Asean, tuir lolos problema ida katak ita seidauk tama Asean, situasaun Ekonomia ita nian sorin mak ema sei kaer, tanbá ita sei prepara ne’ebé mak diak tinan oin mai tanbá ne’e tuir planu husi Guvernu nian, susar liu atu tama Asean, tanbá buat barak mak ita seidauk prepara,” Dehan Mariano Ferreira ba BT iha nia knar fátin Bairo-Pite Tersa-Feira (19/02).

Mariano esklarese Seitor privadu mak nudar Ponte no forsa hodi kompete iha ASEAN maibe realidade ohin loron seitór Privadu barak seidauk iha kapital ne’ebé forte atu bele kompete ho Setór Privadu husi Nasaun sira iha Asean sira no Setór Privadu barak depende ba orsamentu husi estadu.

Tanbá ne’e mak situasaun politika foin lalais laiha orsamentu sai preokupasaun bot ba setór privadu sira no hatudu katak, sira seidauk forti atu bele hamrik hanesan setór privadu hanesan nasaun ASEAN ninian tan ne’e TL tenki forti iha kapital no mós rekursu humanu hodi bele kompete iha ASEAN.

“Agora ita nia Agrikultura ita koalia ba parte Ekonómia no mós hare parte husi setór agrikultura ita seidauk dezenvolve an diak, guvernu agora tau fokus liu ba dezenvolve projeitu bót sira, husi Tasi Mane Suai Supply Bes, Zona Ekonómia Espesial, Aeroportu Estrada, maibé la fó preoridade atu bele dezenvolve Setór Agrikula iha rai laran,” kestiona nia.

Nia mos ketiona ho kualidade edukasaun liu-liu eskola publiku sira ne’ebe ohin loron iha Timor leste tanba to’o agora sei sai perguntas boot hodi prepara rekursu humanu kualifikativu hodi kompete iha Merkadu no to’o oras ne’e sidauk garantia.

Nia dehan bainhira TL adere tama ba ASEAN, sei konvida mos investor sira atu halo investimentu iha Timor Leste maibe realidade ohin loron laos konvida ema mai halo investimentu maibe loke oportunidade estrajeiru hodi kompete iha atividade negosiu kiik sira ne’ebe mak Timor oan sira iha hanesan loke kios no tunu Sate. Tan ne’e nia sujere ba governu atu bele kria kondisaun diak ba povu iha nasaun liu liu iha nivel ekonomia laos deit iha nivel politika. (BT)