DÍLI----Relasiona ho politika Timor Leste Adere ba iha Organizasaun ASEAN tan ne’e Joventude Timoroan tenke prepara an ho kualidade hodi bele kompete iha merkadu ASEAN wainhira Desizaun Timor Leste involve.

Tuir reitor Universidade Dili (UNDIL) José A. Belo hateten Timor Leste Agora buka ligasaun no kooperasaun ho nasaun seluk oinsa ita atu sai membru ASEAN maibe joven sira seidauk prepara sira nia kualidade maksimu hodi kompete ho nasaun seluk, tan ne’e husu timoroan sira atu prepara an nune’e bele kompete iha merkadu ASEAN.

“Ita agora reuniaun tun sa’e tuir servisu ne’ebe ho ita nia ligasaun, ita nia kooperasaun ho rai barak entaun ita presiza hatene mak diak la’os deit tenke hatene inglesh, la’os deit nia hasai kursu hanesan lisensiatura ka doutoramentu, mestradu maibe ita nia atetude mos tenke hatudu hodi bele kompete iha merkadu ASEAN,” dehan Reitor UNDIL ba BT iha nia kna’ar fatin UNDIL, kinta (21/02).

Nia dehan nu’udar timorona tenke iha komportamentu diak, tenke hatudu boavontade ba servisu hodi nune’e bele prepara ita nia an hodi bele kompete iha ASEAN. “Ida ne’e mak hau hanoin nasaun ki’ik mas nakonu ho buat ida kualidade tamba ita hatene foin lalais konselu ministru aprova tan sira nia resolusaun oinsa para atu fortifika atu sai membru ASEAN, ne’ebe atu sai membru ASEAN la’os deit buat ida ema bolu dehan ita hamnasa deit ka ita kontente deit maibe kriteria sira tenke ita prense ne’e mak kualidade,” esplika nia.

Nia haktuir tan katak hatudu koalidade signifika joven sira tenke hatudu hahalok ida ne’ebe bele diak nudar ema respeitu nain inklui honestu. “Agora ida ne’e mak ita la honestu difikulta mos ita nia servisu oan ida hanesan oinsa para bele kompete ho rai seluk tamba kuandu tama ona ASEAN katak loke ona merkadu livre hanesan merkadu bisnis ekonomikamente no ema mos bele mai serbisu iha ne’e, badaen sira mos bele mai servisu iha ne’e,” dehan nian.

Nia mos enkoraja Timoroan hotu atu bele lao tuir dalan husi hahalok Munisipiu Oecuse Ambeno tanba ema ne’ebe honestidade respeitu nain inklui ema ne’ebe badinas tebes, rajaun tuir hahalok populasaun Oecusse tanba oras ne’e dadaun iha area Kontruksaun uma privadu ema fo fiar liu ba Oecusse oan sira.

Nia mos sujere ba SEPFOPE kona ba preparasaun traballador sira tenke iha area potensialidade hodi bele sai modelu ba iha joven sira nomos Munisipiu seluk hodi nune’e bele kompete iha ASEAN inklui bele dada mos ema husi nasaun seluk mai iha Timor Leste.

“Tamba ne’e mak agora dadaun sei hein hela ministeriu Ensinu superior tamba uluk ne’e ministeriu ne’e bo’ot liu demais iha sekundaria ninian ho tan sira husi eskola basiku ne’e tau hamutuk deit ho ensinu superior entaun laiha fokus i servisu oinsa atu bele hadia, Sei agora ita fatin ne’ebe hanesan livre eskola ita aprende liu tan tempu naton ba ita, laiha ema ida hanesan impata ita, entaun ita tenke hanoin ida kediak liu sira, ida ne’e maka hanesan UNDIL, UNTL, Universidade seluk ita hot-hotu agora kualidade ne’e mak sai ita nia preoridade tamba agora laos kualidade ba timor oan deit kualidade oinsa para bele tama ba merkadu nasional, merkadu orizontal ho merkadu mundial,” katak nian.

Nia mos husu ba Ministeriu Edukasaun atu bele hadia kuri-kulum eskolar hodi bele prepara rekursu humanu ne’ebe diak liu tan iha futuru tanba bainhira hadia no implementa kurikulum ne’ebe diak mak ba futuru TL nia rekursu sei kualifikadu hodi kompete iha merkadu Internasional. (BT)