DÍLI----Ministru Reforma Lejislativa no Asuntu Parlamentar Fidelis Magalhaens Informa, iha tempu badak nia laran governu sei foti osan miliaun $650 iha Banku Central Timor-Leste hodi sosa asaun husi kompañia internasional Conocophilips no Shell.

Tuir Fidelis katak, iha tempu badak nia laran governu sei informa ba Parlamentu Nasional bainhira foti osan hodi sosa asaun refere. Iha tempu badak tuir prosesu bainhira governu atu avansa ho inisiativa ne’e tenke informa ba iha Parlamentu Nasional bainhira governu husu ba iha Banku Central atu bele halo prosesu ne’e.

“Tanba ne’e iha tempu badak ita bele dehan iha tempu badak ami husi parte governu nian sei mai iha PN kona-ba governu nia intensaun hahu husu ba iha BCTL hodi foti osan $650 milhoens,” dehan nia ba BT iha Parlamentu Nasional (11/02). Governante ne’e esplika, lei labele prolonga tanba iha prosesu ida kontra lei ida lei ne’e so la vale bainhira lei foun altera tiha nia.

“Bainhira lei ida envigor hela entaun lei ne’e maka ita aplika tanba ne’e halo prosesu fiskalizasaun husi tribunal no prosesu la’o depois sei hetan resposta husi tribunal maibé ita labele koalia lei ida ita tenke prolonga tiha lai tanba iha prosesu fiskalizasaun ne’ebé la’o hela ne’e la funsioa hanesan ne’e,” esplika nia.

Nia dehan, bainhira lei ne’e inkonstitusional ne’e buat seluk fali fiar katak lei ida ne’ebé maka iha konstitusional tuir rkejitu konstitusional sira hotu. “Desizaun tuir mai ne’e desizaun ba tribunal maka atu desidi maibé pozisaun governu nian ne’e konstitusional tanba ne’e maka governu apoia inisiativa atu altera LAP ne’e,” katak nia.

Nia realsa tan katak, bainhira lei refere inkonstitusional maka sei lori hikas ba PN hosi halo prosesu. “Bainhira buat ida inkonstitusional entaun depois lori fali mai prosesu iha PN maibé se lei ne’e vigora hela la bele mai hapara tanba de’it prosesu fiskalizasaun iha tribunal,” tenik nia. (BT)