DÍLI----Governu liu husi Ministériu Obras Públiku sei prepara Lei hodi Transforma Eletrisidade Tmor-Leste (EDTL) ba empreza públika iha tempu badak.

“Agora dadaun ami prepara hela lei hodi transforma EDTL. Ep, ida ne’e mak agora dadaun ami halo hela, ita boot sira hatene katak, atu sustenta operasaun liu-liu hasa’e rendimentu ho reseitas iha parte EDTL ne’e faz parte reforma fiskal intergradu ne’ebé Governu hanoin atu halo,” dehan Minsitru Obras Públikas, Salvador Soares dos Reis Pires, ba jornalista sira iha Palasiu Governu (13/02/2019).

Membru Governu ne’e realsa tan katak, transforma EDTL ba empreza públika ne’e di’ak tanba bele aumenta tan reseitas ba EDTL no importante liu mak fornese enerjia ho di’ak ba povo hodi nune’e povo labele moris ho di’ak. “Ida ne’e importante Governu hanoin katak, reforma instituisional halo EDTL sai empreza públika sei aumenta reseitas ba EDTL rasik, liu-liu mak sustentavelmente fornese enerjia ba Povo,” tenik Ministru ne’e.

Ministru ne’e mós esplika katak, sei esforsu-an no tenta nafatin hodi rezolve transforma EDTL ida ne’e iha tempu badak. Entretantu, nia mós informa katak, bainhira EDTL transforma EDTL ba empreza públika sei la hamosu problema tanba ninia parte ko’alia ona ho Funsaun Públika hodi prepara estratejia atu labele mosu problema iha ikus mai.

“Ko’alia kona-ba rekursu umanu, ami ko’alia ona ho parte Funsaun Públika ami sei prepara estratejia depois ita sei implementa, depois funsionariu sira mós sei hetan opsaun rua, ida hakarak nafatin sai funsionariu públiku ida bele hetan fali kontratu ho empreza públika hanesan EDTL,” informa ministru ne’e.

“Atu labele mosu problema ita sei halo destakamentu tanba ne’e mak ami kopera hela ho Funsaun Públika hodi prepara estratejia destakamentu ne’e hodi indentifika instituisaun sira ne’ebé mak bele akomoda sira,” dehan nia. Asuntu hirak ne’e presiza halo preparasaun antes hodi nune’e labele mosu problema tanba sei fó opsaun rua ba funsionáriu EDTL sira hodi hili no desizaun iha sira nia liman.

“Ida ne’e tenke halo inísiu, bainhira transforma sira ba Empreza Públika mós sei la iha problema ruma, opsoens rua ne’ebé fó ne’e fila ba ita nia funsionáriu públiku sira ne’ebé agora dadaun iha EDTL”deklara nia. (BT)