DÍLI----Ministru Obras Públikas, Salvador Eúgenio Soares dos Reis Pires hateten sei hasai Orsamentu ho montante $10 Milloens hodi dezenvolve Estrada, Planeamentu Urbanu, Bee moos, Saneamentu inklui Eletrisidade.

“Planu ba 2019 ida ne’e MOP sei tau osan ho montante $10 Milloens hodi dezenvolve ba iha setór Eletrisidade, Estrada, Planeamentu Urbanu no Bee moos, Saneamentu, iha $10 milloens ne’e ami foti porsaun uitoan ba Eletrisidade hodi estabelese nia Design ida ne’e iha 2020 ita komesa implementa ona liu-liu ba iha suku sira hamutuk 17%”, dehan Ministru ne’e ba jornalista sira iha Palasiu Governu Díli (13/02/2019).

Membru Governu ne’e mós informa tan katak, dadus ne’ebé Minitériu Obras Públiku hetan katak, populasaun hamutuk 83% mak asesu ba Eletrisidade no falta 17% mak seidauk ho ida ne’e sei esforsu hodi implementa maibé presiza tuir regras.

“Tuir dadus ne’ebé ita hetan, ita nia populasaun sira hamutuk 83% asesu ona Eletrisidade no 17% ne’ebé seidauk asesu ne’e ita halo planu hodi nune’e 2020 ita bele implementa, tanba ita nia Primeiru Ministru pronunsia buat hotu tenke tuir regras, entaun Governu mak dezenvolve planu, depois ita hetan manán na’in ba halo implementasaun,” tenik nia.

Prosesu implementasaun ne’ebé Ministériu Obras Públiku hala’o sei la hanesan programa antes tanba antes ne’e halo ezekusaun direita, ho ida ne’e MOP sei la kontinua programa eletifikasaun nasional ne’ebé antes ne’e hala’o hela. “La’ós hanesan uluk programa eletifikasaun nasional ne’ebé ita halo ezekusaun direita de’it, ida ne’e para ona revogadu tiha ona iha dekretu numeru 42 iha 2017 ida ne’e ita la halo ona” esplika MOP.

MOP realsa tan katak, ho programa hirak ne’e planu Ministériu Obras Públiku nian sei haree liu ba iha Planeamentu depois loke tender hodi hetan manán na’in no sei halo implementasaun. “Agora daudaun ita sei halo de’it mak preparasaun ba planeamentu, tender, depois hetan manán na’in ita komesa halo implementasaun fíziku,” deklara Ministru ne’e. (BT)