DÍLI----Relasiona ho kandidatu membru governu na’in 9 ne’ebé to’o oras ne’e dadauk seidauk simu posse, Ministru Reforma Lejislativa Asuntu Parlamentar, Fidelis Leite Magalhães hatete, governu laiha alternativu seluk atu troka kandidatu hirak ne’e.

Tuir Fidelis katak, maske membru governu seidauk kompletu maibé governu esforsu aan nafatin hodi fó apoiu ba Ministériu sira ne’ebé seidauk iha nia Ministru rasik.

“Iha senáriu ideal governu hotu-hotu iha senáriu maka iha kompozisaun ne’ebé xáve tanba ita iha tutela polítika ba iha Ministériu idak-idak maibé ita nia fator maka agora governu ida ne’e seidauk kompletu maske governu halo esforsu ne’ebé boot atu apoiu malu atu nune’e Ministériu sir abele funsiona ho di’ak,” dehan nia ba BT semana ne’e iha nia knar fatin Palaciu Governu.

Ministru hatete, iha supervizaun kontrolu polítika ne’e kontinua manten iha knar Ministériu sira nian ida ne’e maka akontese tanba ne’e husi parte governu fiar iha orientasaun ne’ebé klaru husi Priemriu Ministru (PM). “ Ha’u fiar katak, apezar ita nia kontekstu maka hanesan maibé governu ida ne’e hanesan governu ida ne’ebé iha kompetensia tomak no sólidu ne’ebé naton atu hasoru dezafiu sira ne’ebé maka governu ida ne’e hasoruida ne’e la’os ideal maibé nia forma metin no di’ak hela”

Governante ne’e informa katak, pozisaun husi PM seidauk muda no kandidatu sira ne’e manten nafatin laiha alternativa seluk atu troka kandidatu na’in 9 ne’e tanba ne’e sira hein nafatin por enkuantu rekonfirma fali katak, kandidatu sira mantein nafatin. Antes ne’e Presidente Repúblika Francisco Guterres Lu-Olo hatete, nia sei fó posse ba kandidatu membru governu na’in 9 bainhira iha ona kandidatu seluk ne’ebé atu subtitui, tanba tuir Xefi Estadu, ida ne’e maka sei fó solusaun ba nasaun nia di’ak.

PR infroma katak, laiha problema bainhira fó posse ba kandidatu ne’ebé seidauk simu posse maibé kandidatu hirak ne’e la iha substituisaun husi ema seluk maka sei la fó posse. “karik subtitui ona ema hirak ne’e ha’u fó tomada de posse ne’e laiha problema maibé bainhira sei nafatin ha’u sei la fó tomada de posse” dehan nia.

Iha okaziaun ne’e Xefi Estadu ne’e mós afirma katkak, Solusaun ba membru governu ne’e solusaun partidu koligasaun nian, ne’e la’os pozisaun Prezidente Repúblika nian. “Hau hakarak atu hatete de’it, atu rejolve solusaun ba membru governu na’in 9 nian ne’e maka di’ak liu ga? solusaun nasaun nian maka di’ak liu ida ne’e maka ha’u husik hela” katak PR.

Nia realsa katak, desizaun kona-ba situasaun konkreta bele hola desizaun maibé desizaun ne’ebé hloa atu bele hadia povu nia moris ne’e tenke liuhusi planu ida no programa ida atu oinsa setor populasaun sira ne’ebé kiak liu bele hadia sira nia moris.

“La’os de’it hili foer atu han maibé iha municipiu sira seluk mós povu ne’e terus nafatin tanba ne’e presiza haree atu bele hadia povu ni moris ne’e konviksaun ha’u nian. Ha’u fiar katak, PM ema ida ne’ebé husi rejistiensia no nia iha konsiensia kona-ba ida ne’e atu bele hadia povu ne’e nia moris Xefi Estadu deklara,” tenik nia. (BT)