OSSÚ----Komunidade Postu Administravitu Ossú Munisipiu Viqueque to'o oras ne'e dadauk kontinua halerik ba kondisaun estrada tanba difikulta tebes aktividade negósiu. Timor-Leste restaura nia independensia durante tinan 17 ona maibé kondisaun estrada iha fatin ne'ebá kontinua halerik ba estrada tanba durante ne'e governu seidauk tau prioridade ba estrada diresaun Munisipiu Viqueque. Estrada ne'ebé agora dadauk komunidade sira utiliza maka estrada ne'ebé uluk invazor Indonesia sira husik hela.

Tuir Administrador Postru Administrativu Ossú Cándido da Silva katak, estrada refere durante ne'e seidauk halo konstrusaun husi governu TL. "Durante tinan 17 ona ita ukun aan maibé estrada ne'e seidauk tau matan husi governu. Estrada agora dadauk komunidade sira utilija ne'e estrada ne'ebé uluk governu Indonesia husik hela " Dehan nia ba BT iha nia knar fatin Ossú (31/10).

Nia dehan, kestaun ne'e sira hato'o bebeik ona ba governu maibé to'o oras ne''e seidauk iha intervensaun husi govenu. "Ami hato'o bebeik proposta ba governu uluk primeiru governu to'o agora laiha interrvensaun husi parte governu ita nia nai ulum sira mós liu ba mai iha ne'e maibé nunka tau konsiderasaun ba ami nia estrada, no difikulta tebes komunidade sira nia aktividade" dehan nian. Alende ne'e Fransisco da Costa nu'udar kondutor Bus diresaun Dili ba Viqueque hatete, kondisaun estrada difikulta tebes sira atu halo viajem lor-loron.

"kondisaun estrada ne'e difikulta tebes ba ami nia aktividade nu'udar kondutor ha'u sente triste tebes tanba dala barak estraga ami nia transporte hanesan roda dalaruma ami fila husi Dili mai Ossú tuir dalan dalaruma roda kuak dala rua ka tolu maka ami to'o Viqueque tanba de'it kondisaun estrada ne'ebé grave tebes" nia informa.

Nia mós realsa tan katak dala barak mós kareta baku fila hodi rejulta ema kanek tanba ne'e nia parte husu ba VIII governu konstituisaun atu bele tau matan netik ba estrada refere atu nune'e sira bele hala'o aktividade lor-loron nian ho di'ak. "Ami husu ba governu ida ne'e atu tau matan netik ba estrada ami nia munisipiu Viqueque nian ami husu liliu ba Primeiru Ministru Taur Matan Ruak atu haree no tau mós prioridade ba ami nia estrada ne'ebé oras ne'e sai difikuldade boot tebes tanba fatin ida ne'e mós uluk senhor PM nia subar fatin tanba ne'e tau matan netik ba kondisaun estrada ida ne'e" dehan nia.

Iha fatin hanesan Balbina da Silva nu'udar negòsiante hatete, estrada ne'e sai problema boot ba sira nia aktividade negósiu. "Ami atu ba Dili hodi sosa sasan atu mai faan fali iha Ossú maibé estrda difkulta tebes dala barak halo ami tauk atu halo viajem ba mai tanba kondisaun estrada ne'ebé grave tebes dalaruma Bus sira baku fila tanba ne'e halo ami tauk atu halo viajem ba maii" katak nia. Entretantu nia husu ba governu atu tau matan netik ba kondisaun estrda iha mumisipiu Viqueque nian atu nune'e kominidade sira bele hala'o sira nia aktividade negósiu. (BT)