DÍLI----Bazeia ba desizaun Prezidente Repúblika Francisco Guterres Lu-Olo iha semana kotuk hodi avansa ba eleisaun antesipada no disolve Parlamentu Nasional (PN), oras ne’e dadauk komisaun permanente maka funsiona hodi asegura servisu PN nian.

Komisaun permanente ne’e harii tiha ona bainhira mandatu IV lejislatura hahú funsiona, no komisaun refere kompostu husi deputadu sira husi bankada lima hanesan FRETILIN,CNRT, PLP,PD no KHUNTO. Tuir sekretáriu jerál PN Mateus Ximenes Belo katak, agora ba oin komisaun permanente sei funsiona to’o lejislatura foun tama.

“Parlamentu Nasional dissolve tiha ona no tuir lei ne’ebé iha tenke asegura ho komisaun permanente agora aparir sidolusaun komisaun permanente maka sei funsiona Kona-ba komisaun permanente ne’e iha inisiu IV lejislatura ho nia kompozisaun maka hamutuk deputadu na’in 26 no presidente PN no nia vice na’in rua hamutuk na’in 29 maka sai komisaun permanente” dehan nia ba jornalista sira iha PN (29/01).

Nia hatete hirak ne’ebé inklui iha komisaun permanente Deputadu mai husi bankada FRETILIN hamutuk na’in sanulu, bankanda CNRT na’in sanulu PLP na’in haat PD na’in tolu no KHUNTO na’in rua .Komisaun permanente nia servisu atu asegura funsionamentu PN no nia kompeténsia haree rejimentu.

“Estabelesimentu komisaun permanente ne’e iha rejolusaun ida iha deliberasaun PN númeru 3/2017 konsituisaun komisaun permanente” nia hatete. Sekretáriu jerál ne’e mós esplika katak, deputadu sira ne’ebé la tama iha komisaun permanente mós sei ativu nafatin iha PN to’o mandatu IV lejislatura remata.

“Deputadu sira seluk neébé la tama iha komisaun permanente sei mai nafatin to’o lejislatura foun iha maka foin sira nia mandatu remata.Bainhira iha urujente ruma bele iha plenária no sei prejide husi PPN” nia esplika. Ho nune’e nia informa katak, Agora dadauk komisaun permanente la’o ona no sira labele husik PN monu no sira sei rejolve problema sira iha PN tuir sira nia kompeténsia.

Kona-ba saláriu deputadu sira orsa ne’e dadauk sei simu hela bainhira to’o lejislatura foun tamak maka hapara sira nia saláriu. “Tuir rejimentu bainhira lejislatura ida komesa halo ona reuniaun maka foin hapara sira nia saláriu tanba ita laiha regra ka rejimentu ida kona-ba ida ne’e” tenik nia. (BT)