DÍLI----Ró Timor-Leste nian ho naran Haksolok ne’ebé Zona Espesiál Ekonomia Sosiál Merkadu (ZEESM) halo koperasaun ho kompañia Portugal hodi halo konstrusaun iha rai Portugal oras ne’e daudauk seidauk bele lori mai Timor-Leste tanba kompañia ne’e rasik sei iha problema maibé tuir planu ró refere sei lori mai TL iha tinan ida ne’e.

Primeiru Ministru Mari Alkatiri nu’udar mós presidente ZEESM hatete Ró refere seidauk bele lori mai TL tanba kompañia ne’ebé halo konstrusaun sei iha problema.

“Timor-Leste hanesan estadu ita hasoru ona tirbunal dala hira ona no ida ne’e la’os estadu no la’os governu maka hasoru maibé ne’e problema entre empreja rua maibé ida ne’e nia maka iha kontratu ho Timor-Leste atu atu halo Ró ne’e entaun sira dehan Ró ne’e labele sai lai tanba dévida mai husi halo Ró ne’e” dehan PM ba Jornalista sira iha Palaciu governu semana ne’e.

PM hatete, Ró ne’e labele sai lai ne’e maka bolu aresto tanba sira hatene Ró ne’e atu besik sai ona tanba ne’e sira seidauk bele fó sai tanba sei liuhusi Tribunal tanba konpaña ida halo keixa ba ona tribunal no hein prosesu iha tribunal tanba ne’e asuntu seidauk hotu. “Agora hela loron ida ga rua tan sei nomeia advogadu atu akompaña de’it maibé Timor-Leste la’os parte iha konflitu ne’e, Sempre iha retensaun so falta retensaun no laiha dévida ZEESM laiha dévida ho kompaña.

Alende ne’e Vice ministru obras públika Inacio Moreira mós hatutan tan katak, kompaña ne’ebé halo konstrusaun ba Ró refere sei iha problema. “Ita nia Ró duni maibé ita iha informasaun rasik no agora dadauk ita mós prepara ona advogadu atu ba akompaña problema ne’e sekarik iha relasaun ba Ró ne’e entaun ita mós tenke defende Ró ne’e tanba Ró ne’e iita nian” nia hatutan.

Maibé problema ne’e entre estaleiru ne’e no nia sub kontraktor ida ne’ebé kontrata ba halo ró ne’e tanba la selu osan ida ne’e maka sai problema maibé sei prosesu hela semana oin maka estaleiru ne’e sei ba defende-an iha tribunal. “Públiku lalika jeneraliza tanba Ró ne’e hotu ona kuaze 88% no hela de’it ona 15% para bele finalize no la kleur nia bele mai ona no importante maka Ró ne’e tenke mai iha tinan ida ne’e,” vice ministru hatete. (BT)