DILI----Governu Timor Leste liu husi VII governu Konstitusional iha kinta feira (19/01) atribui sertifikadu investimentu ba empreza Pelican Paradice Unipesoal. Lda ne’ebé sei investe ho valor investimentu Millaun $700 iha Timor Leste.

Empreza Pelican Paradice nia diretor mak Datuk Adward Ong hamutuk ho parseiru sira sei investe iha Timor Leste ho valor investimentu mais menus millaun $700, total Traballadores direita ne’ebé sei emprega hamutuk 2000.

Pelican Paradice iha planu atu harii hotel Fitun 5 (5 Star) rezidensia ne’ebé kompletu ho fasilidade ba eventu nasionál no internasionál , hotel refere sei harii kuartu hamutuk 464 ho kualidade as, Lokalizasaun ba investimentu refere iha Tasi tolu (Dili)-Tibar Liquica ho totol area 554 Quadrado (554 Km2). 20% husi total investimentu iha Tasi tolu sei utiliza ba dezenvolvimentu atividade investimentu no husi 80% ba Konservasaun.

Investimentu Pelican Paradice mos sei harii eskola, sentru dezenvolvimentu ba foin sa’e nian, sentru komersiál, hotel Segundu, hospital ho standar international no area rezidensia ida. Pelican mos iha planu atu halo atividade reflorestasaun iha foho lolon tasi tolu ho total area hamutuk 350 Km2. Hare husi atividade investimentu refere mak sei lori impaktu posetivu ba ekonomia no sosial nasaun nian.

Iha atribuisaun Sertifikadu Investimentu, Xefe Governu Mari Alkatiri hateten katak investimentu refere mai hahú iha tinan 2006 bainhira sei iha krize nia laran maibé investor konsege pasiénsia to’o ohin loron. “Ha’u hasoru nia iha tempu krize ona no ha’u iha uma iha Faról, ha’u hatete ba nia katak agora situasaun susar uitoan maibé kontinua nafatin ba oin no agora 2018 mak ita fo serfitikadu investidór tanba durante tinan naruk nia kontinua durante tinan 10 nia laran,” dehan Primeiru Ministru Mari Alkateri iha nia diskursu uainhira atribui sertifikadau Investimentu ba empreza internasionál ne’e iha Timor Plaza kinta feira (18/01).

Primeiru Ministru konsidera katak Investor refere nudár lutadór ida tan ne’e tenke fo respeitu ba investor refere tanba investimentu importante tebes ba Timor Leste no Pelican Paradice nudár investor ne’ebé mak dahuluk investe millaun $700 iha Timor Leste. “ Investimentu importante tebes kuandu $700 milloens dollar no investimentu ida ne’e nudár primeiru parte importante tebes, se ita hare tuir mai investimentu minarai ne’ebé nudár investimentu boot liu maibé la fo servisu ba ema barak maibé ida ne’e sei fo servisu iha fase kontruksaun, fase funsionamentu operasaun no fo servisu ida ne’e primeiru rihun depois ba atus,” katak nia.

Nia mos dehan tan katak investimentu refere laos deit fo servisu iha area hotel nian maibé sei fo mos servisu ba timoroan iha area oin oin tanba investimentu refere nudár investimentu ne’ebé kompleksu tebes. Nia mos afirma katak investimentu refere sei loke dalan ba investimentu seluk tanba agora a dadauk governu simu hela potensiál investidores iha area oin oin no hatudu katak iha konfiasa ona ba rai ida ne’e tanba povu iha ona matoridade.


kona ba populasaun sira ne’ebé oras ne’e okupa hela area Tasi Tolu nian Primeiru Ministru dehan governu sei esforsu atu bele rezolve no sei kria kondisaun hodi nune’e bele moris ho dignu. Iha biban ne’e mos Diretor ezekutivu Tradinvest Arcanjo da Silva hateten katak investimentu Pelican paradice hetan ona sertifikadu investimentu hafoin hakat liu prosesu oin oin ho tempu ne’ebé naruk tebes hodi hetan certifikadau.

“Ohin loron investimentu Pelican Paradice bele hetan sertifikadu investimentu tanba servisu hamutuk diretor Geral, Diretor Nasional husi ministériu kompetente liu firetor Nasional Teras Propiedade, SERVE, Ambiente, SEPFOPE, Imigrasaun, Estatal, Turismu hodi tau hamutuk esforsu sira ne’e hotu ohin loron to’o iha asinatura no atribuisaun certifikadau ba kompana refere,” dehan nian. Nia afirma katak Atribuisaun refere nudár okaziaun importante Ministeiru hotu nia servisu liu-liu promosaun investimentu hodi buras iha Timor Leste.

Nia dehan Sermonia refere laos finalidade ona ba servisu Ministeriu nian maibé kontinua atu apoiu, sosializa, monitoriza nune’e bele to’o iha implementasaun tanba investimentu refere nudár investimentu ne’ebé boot iha Timor leste nune’e bele diversifika dezenvolvimentu ekonomia Timor Leste ba oin diak liu tan. Nia informa katak Investimentu Pelican Paradice nia investor hamutuk nain 18 hodi halo investimentu Pelican Paradice iha Area Tasi tolu nian ne’ebé sei empreza servisu nain sira liu rihun 2000.

Entretantu diretor empreza Pelican Pardice Datuk Adward Ong sente orgullu tebes ho boa vontade governu nia ne’ebé mak konsege fo ona sertifikadu Investimentu tanba nia dehan liu husi prosesu refere konsege halo esforsu barak hodi hare ba protesaun meu ambiente ne’ebé mak iha.

Tan ne’e nia mos lahaluha hato’o obrigadu ba Governu Timor Leste inklui mos eis Prezidente Jose Ramos Horta nomos linha Ministeriu sira seluk tan. Tan ne’e nia garante katak investimentu refere sei lori mos benefísiu ba povu no no nasaun Timor Leste iha futuru. Iha atribuisaun certifikadau marka Prezensa husi Primeiru Ministru, Ministru Planu Financas, Ministru Negosiu Estranjeiru, Ministru Turismu, Sekretariu Estadu Joventude Traballu inklui entidade sira seluk tan. (BT)