DÍLI----Transporte aero nudár parte ida ne’e mak bele fo kontribuisaun boot ba reseitas nasaun nian, tanba iha nasaun barak nia rendimentu as liu husi setór Transporte Aviasaun nian.

Liga ho problema refere haree fila fali ba Timor-Leste ne’ebé nudár nasaun ukun-an ona durante tinan 15 nia laran maibé iha setór transporte liu liu iha Aviasaun nian to’o oras ne’e sei iha problema tanba seidauk dezenvolve di’ak.

Tan ne’e atu oinsá bele dezenvolve sitor refere Ministru Dezenvolvimentu Transporte no Komunikasaun (MDTK) Realiza semináriu loron ida hodi halibur hanoin sira husi públiku ho objetivu atu oinsá bele suporta prosesu sertifikasaun Aeroportu iha territóriu Timor laran tomak tanba transporte aero sai hanesan papél importante ba Timor Leste maibé to’o oras ne’e seidauk dezenvolve.

Tuir Prezidente Konsellu Administrasaun de Civil Aviation Authority of Timor-Leste. (AACTL) Sabino Henriques hatete liu husi seminariu ne’ebé bele fahe informasaun ba malu kona-ba problema ne’ebé durante ne’e TL infrenta, tanba ne’e AACTL husu ba auturidade lokal sira atu suporta servisu transporte aero nian, tanba transporte sai hanesan papél importante ne’ebé tenke dezenvolve.

“Ha’u hanoin liu husi sorumotu ida ne’e, atu fahe defikuldade no dezafiu saida maka durante ne’e ita hasoru liu - liu iha transporte aero nian,” dehan Prezidente Konsellu Administrasaun de Civil Aviation Authority of Timor-Leste. (AACTL) Sabino Henriques iha Salaun Enkontru Kaikoli Kuarta (27/12).

Sorumutu refere nudár parte preparasaun ida Timor Leste nian ba futuru tanba ligadu ba polítika ne’ebé iha katak oras ne’e TL mos preparaan atu oinsá bele adere ba iha ASEAN nian tan ne’e hakarak ka lakohi Timor Leste tenke dezenvolve setór refere. “La kleur tan TL sei tama ASEAN hodi asesu ba merkadu tan ne’e tenke,” dehan nian ba jornalista sira.

Sabino mós afirma katak preparasaun Timor Leste iha setór Aero la’ós haree de’it ba iha infranstrutura maibé mós ba iha reskursu umanu ne’ebé adekuadu nune’e bainhira dezenvolve ona infranstrutura rekursu uumanu mós prontu atu utiliza.

Kona-ba futuru nia dehan atividade aviasaun sivil iha TL oras ne’e tuir ona estandarte internasionál no hein tinan lima mai sei hatudu duni ninia progresu ne’ebé di’ak hodi bele kompete iha merkadu livre bain hira TL tama ASEAN, maibé importante tenke prepra rekursu umanu.

Iha fatin hanesan Vise Ministru Dezenvolvimentu Transporte no Komunikasaun, Inacio Moreira hateten, TL presiza halo diskusaun atu nune’e bele prepara-an, hodi bele tama iha merkadu internasional iha área transporte aeros nian. Tan ne’e atu involve an iha Merkadu Internasional TL tenke prepara planu ne’ebé di’ak nomós tenke dezenvolve rekursu umanu nomós infranstrutura ba transporte aviasaun sivil nian.

“Ha’u hanoin governu tenke tau nafatin importansia ba área refere ,”tenik nia. Vise Ministru mós Rekoñese katak rekursu umanu iha Timor-Leste oras ne’e sei la’o neneik hela no tenke fó duni importansia hodi hadi’a servisu aviasaun nian sai di’ak liu tan iha futuru. (BT)