DILI----Maske durante ne’e governu Timor-Leste konsidera setór privadu mak nudár parseiru importante ba dezenvolvimentu Timor-Leste nian tanba durante ne’e governu konsege fo fiar ba kompañia sira hodi implementa obra governu nian ho remata.

Maibé hare fila fali ba servisu empreza nian konsege kompri ona nia devér hodi implementa obra sira ne’ebé governu fo ho susesu no devér hirak ne’e kompañia implementa efisiensia no efikasasia maibé kompañia seidauk hetan nia direitu to’o oras ne’e.

Tuir Prezidente Camara Comersio Industria Timor-Leste (CCI-TL) Oscar Lima hateten kada tinan iha fulan Novembru no Dezembru sempre hetan pagamentu husi governu kona ba implementasaun projetu sira maibé tinan ida ne’e kontradís ho tinan hirak liu ba tanba to’o oras ne’e kompañia sira seidauk simu nia direitu husi governu.

“Normalmente tinan–tinan fulan Novembru no Dezembru iha pagamentu tanba ami halo tiha ona servisu barak ona no hein katak ami nia pagamentu ne’e mosu mais la akontese,” dehan Prezidente CCI-TL Oscar Lima ba Jornalista sira iha edifísiu Monte Viado, Comoro Foin lalais ne’e.

Nia fo rajaun katak to’o agora kompañia seidauk hetan direitu husi governu tanba dinamika polítika ne’ebé lao iha Parlamentu hodi fo impaktu ba kompañia sira hodi hetan nia direitu. Oscar dehan ho situasaun polítika ne’ebé iha kompañia kontinua komprende hodi hein maibé sai perguntas boot ba sira mak bainhira bele hetan sira nia direitu.

“ami komprende maibé komprende ne’e to’o iha ne’ebé”, kolia ho Triste ba jornalista sira. Ho situasaun ne’ebé iha empreza sira espera katak sei hetan nia direitu no wainhira lahetan direitu iha tempu badak mak sei iha problema boot ho rajaun sei afeita ba ekonomia nasaun nian no ida ne’ebé mak la afeita mak sira ne’ebé laos iha area emprezariu nian. (BT)