DILI----Relasiona Kooperasaun servisu entre Banku Mandiri ho Camara Comersio Industria Timor Leste (CCI-TL) ba implementasaun projetu pilotu Kreditu ne’ebe implementa iha munisipiu Ermera (Gleno) lao ho sucesu. Tuir Oficial Dezenvolvimentu negosiu Banku Mandiri Muhammad Arif hateten katak implementasaun projetu pilotu ne’ebe mak halao iha fulan februari liu ba oras ne’e lao ho sucesu tanba benifisiariu sira kompri rekezitu ne’ebe mak banku Mandiri fo.

“Sampai sekarang dari 4 bulan itu semuanya lancar, semua mengikuti plan, mengikuti jadual pembayaran dengan baik sekali ( To’o agora husi fulan 4 nia laran buat hotu lao diak, buat hotu tuir planu, Tuir orariu selu nian ne’ebe diak tebes,” dehan Oficial Dezenvolvimentu negosiu Banku Mandiri Muhammad Arif ba BT iha edifisiu Banku Mandiri kinta (08/06).

Nia esplika katak Projetu pilotu ne’ebe mak implementa iha munisipiu Ermera tanba kooperasaun entre Banku Mandiri ho Camara Comersio Industria Timor Leste hodi apoiu negosiu kiik sira liu husi kreditu ne’ebe ho funan kiik no husi implementasaun refere laiha problema entre benifisiariu sira ho Banku rasik. Arif mos afirma katak projetu pilotu ne’ebe iha Banku Mandiri fasilita kreditu ba negosiante kiik sira hamutuk 11 bazea ba proposta ne’ebe mak banku Mandiri simu husi CCI-TL.

Nia mos dehan katak liu husi programa refere tuir planu banku Mandiri nian sei hasae tan nia kreditu ba negosiante kiik sira Ermera tanba Mandiri hare katak benifisiariu sira hatudu rekorde ne’ebe mak diak tebes. “Planu ita nia tanba hare ba rekor sira nian diak tebes, tanba ne’e sei hasae tan kreditu iha oin 2 , primeiru parte total tanba ema nain hira ne’ebe foin lalais simu ita sei aumenta tan osan, segundu mak ita sei aumenta tan kreditu ba ema barak sei aumenta tan,” afirma nian.

Projetu pilotu ne’e implementa deit iha munisipiu ermera tanba proposta ne’ebe mak Mandiri simu mai husi deit Munisipiu Ermera hamutuk proposta 25 no Banku Mandiri apoiu uluk ona benifisiariu nain 11 no planu sei aumenta tan negosiante sira seluk. Nia informa katak jurus keditu ne’ebe mak Banku Mandiri fob a benifisiariu sira 1% kada fulan no selu durante tinan 1 nia laran.

Nia mos informa katak Mandiri planu mos sei habelar tan ba iha Munisipiu sira seluk bazea ba rekomendasaun ne’ebe mak husi CCI-TL tanba implementasaun projetu ne’e sempre halo koordenasaun ho CCI-TL rasik hodi kontinua apoiu negosiu kiik sira iha rai laran hodi kontribui ba dezenvolvimentu ekonomia TL maibe sei tuir prosedimentu ne’ebe mak iha.

Mandiri pronto tuir Politika governu
Banku Mandiri kontinua hein disizasaun husi Banku Central relasiona ho Sistema garantian ne’ebe mak Governu aprova iha semana liu ba. Tuir Oficial Dezenvolvimentu Negosiu Banku Mandiri Muhammad Arif hateten manidiri kontinua hein informasaun klaru husi Banku Central Timor Leste kona ba Implementasaun Sistema Garantia.

Nia dehan Banku Mandiri Kontinua kompri disizasaun husi Governu liu-liu BCTL no Mandiri iha komitmentu hodi tuir planu Governu nian ho sucesu. Nia informa katak ba implementasaun sistema garantia ne’ebe iha sei tuir kondisaun Merkadu ne’ebe mak iha. (BT)