DILI----Parlamentu Nasionál halo ona aprovasaun ba planu ordenamentu territóriu ne’ebé sai sasukat ida ba dezenvolvimentu ekonomia nasaun ne’e nia iha futuru.

Ministru Planeamentu Investimentu no Estratéjiku (MPIE), Kay Rala Xanana Gusmão hatete liu husi planu ordenamentu territóriu sai hanesan modelu ida atu oinsá bele Analiza hodi nune’e bele implementa tuir dalan ne’ebé mak iha.

“Ha’u hakarak hatete ba ita boot sira katak ohin hahú ona halo aprovasaun ba Planu Ordenamentu Teritoriu hodi bele haree ba setór sira ne’ebé mak importante,”dehan Ministru Xanana Gusmão iha lansamentu Sensus fó fila fali iha Centru Convensaun Dili (CCD) Kinta – Feira (02/03). Nia esplika liu husi planu ne’e atu oinsá bele haree kona-ba munisipiu ka distritu ne’ebé mak potensiál ba setór sira seluk atu bele dezenvolve iha Timor Leste.

“Husi ida ne’e mak ita bele haree katak fatin ida ne’ebé mak ita bele hakiak animal, hakiak manu, hakiak karau susu been liu husi planu ida ne’e ,”Dehan Xanana. Nia mós afirma katak importante mós tenke dezenvolve mós munisipiu hodi nune’e populasaun sira bele fila fali ba iha munisipiu hodi bele dezenvolve di’ak iha munisipiu tanba polítika governu hakarak dezenvolve mós Munisipiu hodi nune’e bele la’o di’ak liu tan.

Nia dehan atu dezenvolve munisipiu presiza orsamentu ne’ebé mak boot maibé governu kontinua esforsu atu oinsá bele dudu munisipiu la’o ba oin. Liu husi kreximentu populasaun ne’ebé mak oras ne’e kontinua aumenta governu planu daudaun hodi dezenvolve projetu kosta súl oinsá mak empreza timoroan sira bele servisu hodi minimize dezempregu iha rai laran.

Iha serimónia lansamentu ne’e Xanana preokupa mós munisipiu balun to’o oras nee seidauk dezenvolve maske governu halo esforsu hodi fó hanoin ba munisipiu sira atu bele dezenvolve maibé to’o agora seidauk la’o ho di’ak. Xanana husu ba Administradór no autoridade munisipiu inklui xefe suku atu bele servisu maka’as hodi dudu munisipiu bele la’o ba oin ho di’ak hodi kontribui ba dezenvolvimentu ekonomia nasaun foun ne’e nian. (BT)