DILI----Iha tinan ne’e sei lori kontente boot ida ba Timor Leste tanba durante ne’e emprezariu sempre hasoru problema asesu ba finanseiru iha banku sira maibe tinan ida ne’e iha banku ida ho naran 3A Timor Sei loke iha Timor Leste.

Maske durante ne’e iha banku balun ne’ebe mak halo operasaun iha Timor Leste hanesan Banku BNU, Mandiri no ANZ fasilita ona kreditu ba emprezariu sira maibe sei kiik tebes.

Tan ne’e liu husi 3A timor sei fasilita diak liu tan kreditu ba emprezariu sira ho jurus kiik hodi ajuda emprezariu sir abele halo investimentu. “Banku sira hanesan BNU, Mandiri sira fasilita kreditu no hau hatene maibe fo karik mos uituan teb-tebes maibe tinan ida ne’e sei harii banku ida atu bele ajuda seitor privadu sira iha Timor Leste,” dehan Ministru Planiamentu Investimentu no Estratejiku  (MPIE) Xanana Gusmao iha Centru Convensaun Dili (CCD) kinta – feira (02/03).

Nia dehan Banku refere sei apoiu seitor privadu sira importante mak tenke servisu diak nomos tenke hadia gestaun tanba durante ne’e gestaun mak sai problema boot ba emprezariu sira. “Tanba dala ruma si la ba banku tanba funan makas no sira ba fali banku seluk ne’e iha maibe emprezariu sira la iha gestaun ne’ebe diak tanba ita nia mentalidade laiha no ida ne’e akontese iha fatin – fatin,” dehan Xanana.

Tan ne’e liu husi banku foun refere sei apoiu liu tan emprezariu sira hodi bele asesu ba kreditu ho jurus ne’ebe mak diak. Tuir informasaun ne’ebe BT hetan katak Dadaun neé Banku Internasional 3ª Timor submete ona dokumentus ba Banku Central Timor Leste (BCTL) liu husi investor nain tolu, ne’ebe oras nee iha ona empreza foun ida iha Timor Leste, mak “3A Timor S.A”, ho objetivu atu hetan licensiamentu ba lalaok atividade bankaria iha Timor Leste.

Pedido licensa ida ne’e atu loke banku ida, katak wainhira iha autorijasaun atu fo sai hanesan primeiru banku ho capital ne’ebé privadu ho sede iha Dili. 

Nain ba Banku 3A Timor Mak hanesan Masoud Al Harthy, Gilles Assouline, Laurent Imbert. Tanba ne’e Investor no fundador Banku nian mos oras ne dadaun iha ona grupu sociedade Timorense nian ho naran “3A Timor S.A”, ne’ebé sai parte husi grupu sociedade internacional nian, iha ne’ebé hakarak valoriza husi nia investidor no fundador banku nian durante liu tinan sanulu (10) iha “Ázia-Arábica-África” .

Ligasaun forte setor públiku ho privadu, ne’ebé investidores sira hetan iha regiaun 3, refere ona atu hili naran “3A”. Tuir fundador sira, futuru banco “3A Timor, SA” sira mai atu harií banku ida atu haforsa setor finanseiru ho setor banku nian iha Timor-Leste, nomos atu bele opera iha nivel internasional, no kanaliza kapital investimentu nian. 

Investor hirak neé mai halo proposta atu hetan capital ne’ebé disponivel iha zonas globo, kanaliza mos ba projetus investimentu iha Timor Leste, ho ninian objetivus balu mak iha parte 4 nian.

Objeitvu iha parte hat mak hanesan Oferese taxa de juro ne’ebé kiik liu ba empresarios neébe hakarak atu dezenvolve ninia atividade iha Timor Leste no populasaun Timor Leste tomak, tuir akordo pratika internasional ne’ebé diak liu, Fo asesu ba servisu bankario nian ne’ebé dadaun neé banku seluk iha Timor Leste sedauk bele fornese ba empresa no ema timor oan sira, Kontrola ninia operasaun tuir objetivu Dezenvolvimentu Sustentavel ne’ebé define husi Konferensia dala rua nulu resin ida husi Nacões Unidas kona ba alterasaun klimátikas (COP 21) iha Paris no husi konferensia (COP 22) iha Maraquexe, nomos Loke ninia atuasaun no aproveita potensial ne’ebé boot husi relasaun estrategika Timor nian ho nasaun sira seluk, katak pertense iha CPLP no G7+ hanesan mos ligasaun ekonomika ho nasaun membro ASEAN no komunidade sul pasífiku.

Governu Timor Leste, liu husi Ministério do Planeamento e Investimento Estratégiko, akompanha prosesu importante ba investimentu estrangeiru ba Timor Leste ida nee.

Ministru Planeamentu Investimentu no Estratégiku Xanana Gusmao konsidera fundamental ba dezenvolvimento no fortalesementu ekonomia empresa nasional, katak Timor Leste tenke iha setor banku ne’ebée kompetitivu, iha kapacidade atu apoia diak liu empresa kiik no boot, ne’ebée buka solusaun finanseira ba sira nia negósiu.

Pretende mos atu bele fo posilidade ba Timor oan asesu ba kondisaun banku nian atu sira bele loke sira nian primeiru “negosiu” no hadia sira nia kondisaun moris loron-loron. (BT)