GLENO----Estrutura Camara Comersio Industria Munisipiu Ermera (CCI-Ermera) iha loron tersa, (16/02) semana ne’e simu tomada depose hodi asumi mandatu durante tinan 4 hahu husi tinan 2015 to’o 2019. Tomada depose ne’e dirizi direitamente husi prezidente Camara Comersio Industria Timor-Leste (CCI-TL), Oscar Lima ba estrutura foun CCI-Ermera ne’ebe mak halao iha knua CCI-Ermera.

Objetivu husi tomada depose refere oinsa mak bele orienta estrutura CCI-TL hodi halo servisu  ho diak atu bele haree  ba dezenvolvimentu iha Munisipiu Ermera rasik. Bainhira atu tama ba toma de pose estrutura tomak hodi deklara sira nia akta kona-ba sira nia mandatu   nomos halo juramentu hodi kumpri estatutu termo CCI-TL nomos Munisipiu Ermera, kumpri rejimentu CCI nian.

Durante sira nia mandatu promete atu tau interese nasional iha interese privadu nia leten, sira mos promete sei hadook an husi KKN no bainhira la kumpri deklarasaun  tuir estatutu CCI-TL artigu 9, sira prontu atu hatan. Depois de remata promesa sira direitamente hodi asina akta deklarasaun ne’ebé mak diriji husi prezidente CCI-TL. Iha diskursu Presidente CCI-Ermera Luis Alves Tilman hateten estrutura ne’ebé mak nia lidera prontu atu kopera ho institusaun hotu iha Timor-Leste liu-liu iha munisipiu Ermera hodi haree ba dezenvolvimentu.

“Ha’u hahakrak hateten deit   knar ne’ebé mak hau simu hamutuk ho estrutura tomak sei servisu hamutuk ho entidade hotu-hotu hodi haree ba dezenvolvimentu Munisipiu Ermera tanba iha ha’u nia kampaña ha’u promitivu  tuir politika ne’ebé mak iha ohin  konsege ita realiza,” dehan Prezidente Munisipiu Ermera ne’e. iha nia diskursu iha edifisiu CCI-Ermera tersa (16/02). Nia afirma katak ho kapasidade ne’ebé mak iha kontinua esforsu hodi lori dezenvolvimentu sustentavel ba Ermera ba oin ho diak liu  tan.

“Tan ne’e ho kapasidade ne’ebé mak iha hodi lori sustentavel dezenvolvimentu Ermera ba oin diak  no sei kontinua servisu hamutuk ho entidade hotu iha Ermera nomos Nasional hodi bele haree ba Dezenvolvimentu munisipiu ida ne’e,” dehan nia. Nia mos promote katak ho estrutura ne’ebé mak iha kontinua involve setór privadu hotu iha munisipiu Ermera hahu husi empreza ki’ik to’o iha empreza boot sira hodi hamutuk bele dezenvolve Ermera.

“Prezidente CCI hahu ohin ba oin pronto koopera ho institusaun hodi bele lori dezenvolvimentu Eremra lao ba oin, tanba ne’e ha’u sei involve husi Empreza pequena hahu husi sira ne’ebé halo aktividad kuda modo, halo dosi to’o iha emprezariu bo’ot sira hodi bele hamutuk bele lori dezenvolvimentu munisipiu ne’e lao ba oin,” afirma nia. Luis mos enkoraja Ermera oan tomak atu bele iha komitmentu bele halo investimentu iha munisipiu refere tanba setor privadu mak sai save ba dezenvolvimentu nasaun foun ne’e nian.

Nia informa katak CCI laos fatin atu buka lukru maibe fatin oinsa mak bele organiza malu hodi bele kapasita malu hodi bele dezenvolve kapasidade hodi haree ba  setor dezenvolvimentu tomak. Iha fatin hanesan reprezentante Administrador Munisipiu Ermera, Danilo Ozorio  M. Babo  hateten setór privadu mak nudar parseiru governu nian hodi haree ba dezenvolvimentu TL tanba bainhira setór privadu la forsa mak dezenvolvimentu mos sei lalao. “Ha’u fó parabens ba ita boot sira konsege hetan pozisaun balun iha CCI Ermera, CCI nudar parseiru ba governu hodi haree ba Dezenvolvimentu Timor Leste,”dehan Belo.

Nia mos sente triste uituan tanba durante ne’e projetu balun ne’ebé mak governu fó ba iha setór privadu maibe emprezariu sira laiha komitmentu atu implementa diak. “Tan ne’e  tuir ha’u haree iha buat balun lao hela no balun lalao tanba iha projetu balun iha tinan 2015 konsege emprezariu sira husik hela tanba ne’e liu husi estrutura ne’ebe mak iha bele koopera hamutuk bele realiza projetu ne’ebé mak iha tanba setór privadu mai hodi bele halo investimentu hodi kria kampu servisu ba timoroan sira,  setór privadu nia papel importante tebes,” dehan nia.

Nia husu ba emprezariu Ermera labele sai penonton ba uma rasik maibe oinsa mak bele jere ka ezekuta projetu boot sira bele to’o iha ninia finalidade. “Ha’u mós sente laran triste uituan tanba iha projetu balun konsege abandona husi setór privadu maibe bainhira kontaktu hetan tolok maibe ha’u husu servisu nafatin hodi bele finaliza projetu sira ne’ebé mak iha,” katak nia. Entretantu, Vise Presidente CCI-TL Asuntu Institusaun Finanseiru,  Rui Manuel Castro hato’o parabéns ba membru CCI-TL Ermera no nia husu atu membru sira tenke konsidera negosiante ki’ik too bo’ot maka sai nu’udar motor atu lori dezenvolvimentu hodi hatun númeru dezempregu iha TL.

“Ha’u fó parabéns ba presidente CCI-TL Ermera, ha’u hein katak imi hotu sei servisu makas atu halo mudansa durante imi nia servisu,” katak nia. Reprezentante Emprezariu nu’udar mós Veteranus, Ernesto Dudu dehan, Ermera oan tenke servisu hamutuk hodi halo buat diak ba rai Ermera. Nia dehan, atu halo dezenvolvimentu, setór privadu TLsei fraku iha finanseiru no presiza kapasita setór privadu. “Ami sei fraku tebes, tanba ne’e ami hakarak tuir formasaun para kapasita ami atu la’o ho di’ak,” katak nia.

Nia dehan, setór privadu Ermera kuaze 200 liu, maibé dezenvolvimentu iha Ermera seiduak la’o ho di’ak. Iha biban ne’e mos prezidente CCI-TL, Óscar Lima hatoo parabéns ba membru sira ne’e no husu atu servisu makas dezenvolve setór privadu nia program  hodi bele dezenvolvimentu ekonomia Ermera. Nia dehan, Ermera oan konsege halo buat di’ak hodi harii edifisiu CCI-TL, tanba iha munisipiu 13 edifisiu rasik seidauk iha inklui mos CCI-TL rasik.

Nu’udar prezidente CCI-TL, Oscar dehan nia parte sei kontinua esforsu maka’as atu servisu hadia vida setór privadu TL. Politika CCI-TL koordena ona ho governu no koordena ona ho baku BCNTL no banku sira atu fó kreditu ho jurus ki’ik. Maibé ba setór privadu sira ne’ebé atu hetan kreditu tenke liu husi formasaun klean foin bele hetan sertifikadu kreditu. “Ha’u sei husu ba banku atu hatun too funan 8%, tanba se ema foti osan ho jurus boot mak sei la halo buat ida,” katak nia.

Oscar hato’o agradese, tanba governu tau ona osan millaun 5 hodi fó kreditu, maibé CCI-TL propoin se hasa’e osan to’o millaun 10 hodi fó kreditu ho jurus kiik to 5%. Tuir Oscar katak, iha nasaun ne’ebé de’it banku sempre fó kréditu ba setór privadu hodi loke industria ki’ik too industria boot sira tanba banku no setór privadu sempre sai parseiru importante hodi hakbiit dezenvolvimentu TL lao ba oin ho diak liu. (BT)