Claricia Lay
Claricia Lay

Claricia Lay
DILI----Ho moto “Matadalan ba Dezenvolvimentu Ekonomia” jornal Business Timor haree liu ba iha area sosio-ekonomku no negosiu iha rai laran no mos iha rai liur. Ho otas tinan lima ne’e, tuir kliente ka lee-na’in sira nia haree servisu nain sira iha jornal ne’e atu bele hadia kualidade linguajen ba notisia no mos sirkulasaun tenke kobre ba iha distritu 13 nia laran atu populasaun sira iha area sira ne’e bele asesu ba iha informasaun.

Kliente Business Timor ne’ebe durante ne’e sempre akompaña informasaun, Claricia Lay  husu tenke servisu fokus ba iha area kobertura tuir matadalan hafanu populasaun sira iha Timor Leste hodi hare ba iha dezenvolvimentu ekonomia neebe lao iha Timor-Leste. Tuir nia Business Timor nudar jornal ne’ebe uniku, haree liu ba area ekonomia nian hodi halo promosaun ba emprezariu rai laran liu-liu ba iha area negosiu.

“Business Timor ita hare liu ba negosiu iha rai laran. Tujuan husi Businees Timor mak atu halo promosaun ba empreza entaun jornal ne’e servisu hamutuk ho emprezariu timoroan ou emprezariu international ne’ebe iha fatin ida ne’e hodi halao promosaun. Liu husi promosaun imi bele hetan lukru, liu husi lukru ne’ebe mak imi hetan hodi investe no hasae kapasidade jornal Business Timor rasik,” katak Claricia Lay ba BT iha Timor Plaza tersa-Feira (05/05).

Nia dehan jornal Businees Timor presiza atu hadia tan nia kualidade. “Konaba  jornal nia kualidade presiza hadia mak tenke servisu hamutuk ho emprezariu lokal no international hodi bele ema barak atu asesu tenke hare ba iha asuntu ne’ebe uniku uitoan hodi ema bele hatene no hare tan. Business Timor tenke hare kona ba ida,” sujere Claricia.

Tuir nia, Businees Timor tenke hadia linguajen ba iha notisia no tenke fo sai informasaun ne’ebe kompletu hodi labele fo konfuzaun ba publiku. “Kona-ba kualidade notisia tuir hau nia hare sei problema mak kona ba lingua hakerek dala ruma hato’o ladun kompleta tanba bainhira atu publika notisia ida tenke fo sai kompletu hodi bele ema lee labele konfuzaun no tenke hakerek klaru,” dehan nia. Iha fatin seluk Sekretariu Estadu Politika Formasaun Profisional no Empregu  Ilidio da Costa Ximenes fo parabens ba jornal Business Timor  ne’ebe halo ona tinan  lima. 

“Hau mos fo parabens ba Business Timor  tanba hatutan informasaun no habelar informasaun  ba ita nia komunidade sira iha pais ida ne’e no mos ba sosiedade tomak. Hau nia mensajen ba jornal Business Timor atu kontinua sai mata dalan no ba joven sira liu-liu ba inan-aman, hau husu ba jornalista sira katak, jornal ne’e labele para iha  Dili maibe distribui mos ba 13 munisipiu atu nune’e ita nia populasaun bele asesu ba informasaun hotu-hotu,” dehan Sekretariu Estadu ne’ebé baibain sai fonte informasaun no mos kliente ka lee-na’in jornal Business Timor nian. 

Sekretariu Estadu hatete, SEPFOPE mos  prontu atu fasilita jornal Business Timor  atu fahe ba suku  ida-idak wainhira SEPFOPE ba distritu,  tanba duranre  ne’e sira kompara ba media hotu-hotu jornal Business Timor  diak liu. Tuir Ilidio rasik nia haree iha failansu ki’ik ida deit mak tenki hadia   ba kualidade hakerek, kuandu hakerek notisia ho lian tetun tenki  hakerek ho tetun lolos. “Hau husu ba editor sira  kuandu atu edit notisia  editor tenki edit didiak ba liafuan sira ne’e tanba hakerek lia fuan sala afeita ba kontiudu  informasaun ne’ebe mak imi fo sai.

Hau nia mensajen mak ne’e, presiza kapasita imi nia an atu nune’e jornalista sira mos sai profisionalismu ba imi nia an rasik,” nia fo hanoin. Entretantu Xefe Gabineti SEPFOPE Begnino Humberto da Cruz katak, jornal Business Timor ne’ebe halo aniversariu ba dala lima ne’e katak hatudu komitmentu atu sai nudar mata dalan sosiedade iha Timor laran tomak. Nia mos haree katak failansu ne’ebé tenke hadia mak kualidade jornal atu nune’e jornal ne’e bele sai diak liu tan. “Hau mos husu ba imi katak jornal ne’e tenki muda ba jornal harian atu notisia sira labele basi maibe tenke apdeit (up date) loro-loron,” nia hatete. (BT)