DILI-Dili Institute of Technology (DIT) tama ona ba otas da-12 ne’ebé tuir termu akademika nian dehan Dies Natalis XII ne’ebé monu iha 10 Maiu tinan-tinan. Ba loron moris da-12 ne’e, Sabadu (10/05), familia boot DIT selebra ho simples maibe ho atividade oioin no mos hetan entuziasmu maka’as husi civitas akademiku tomak DIT nian durante loron rua tuir malu, Sesta no Sabadu.

Molok tama ba loron moris ne’e, iha eventu lubuk ida hanesan kompetisaun no festival arte no kultura hanesan babiduk (dansa) tradisonal, hananu no mos kompetisaun desportu hanesan tebe  bola mane, basket bola feto no mane, futsal feto no mane entre departementu sira ne’ebé eziste iha DIT. Reitor DIT Dr. Estanislau Saldanha iha nia disakursu, sabadu (10/05) iha kampus DIT  Aimutin Dili hatete loron ne’e familia boot DIT nian presiza halo reflesaun  hodi hare ba kotuk, bainhira harii DIT no avalia kondisaun DIT to’o agora atu DIT hakat ba oin, hodi asegura instituisaun ne’e la’o diak kualidade no sustentavel.

Nia hatete atu asegura DIT, laos deit sai fatin hodi aprende siensia teknologia no etika moral, maibe institutu mos  hanesan fatin formasaun ida  buka solusaun kreativu  no inovativu hodi rezolve problema nasaun nian no buka forma futuru lider  iha sentidu estadu no sentidu servidor ba povu moris diak iha edukasaun, formasaun, investigasaun sentifiku. Reitor ne’ebé nu’udar fundador ida mos ba DIT hatutan katak DIT mos tenke  difini nia sientifiku funsaun atu la’o,  la’os deit sai hanesan instituisaun  atu eduka ema sai tukan ho forma ema sai eskunsibiliti labele sai makina ba sosiadade. Maibe DIT fo imparsialidade forma ema ne’ebe matenek iha responsalidade social, promove boa governasaun hodi kombate korupsaun, promove valor demokratiku, justisa ba ema hotu ho dezenvolvimentu nasional ne’ebe sai kualidade.

Nia fo hanoin fila fali ba familia DIT oinsa iha tinan 2002 DIT hari’i ho kondisaun ida ne’ebé minimu tebes falta rekursu finanseiru, fasilidade no rekursu umanu. “Maibe DIT riku tebes iha nia fiar, ideias, espiritu servisu hamutuk, hodi haraik an halo servisu parseria ho governu, universidade ho instituisaun edukativu seluk iha rai laran no rai liur,” katak Estanilau iha nia diskursu. Nia dehan espiritu sira ne’e mak aten boot hodi lori DIT mai to’o ohin loron hamrik iha nasaun Timor Leste. Nia hato’o agredese ba fundador nain sira hotu iha nasaun ne’e, hodi eduka, forma timor oan sira  sai matenek no iha sensibilidade ho responsablidade sosial. Tuir  avaliasaun panel internasional ba DIT, tuir Estanialau, husi anual rite hetan skor porsentu 93,64 ne’ebe hetan iha tinan-tinan 2008, DIT mos hetan rekoñesimentu instituisional husi universidade seluk iha Austalia hanesan Victoria Univercity Australia, no universidade sira iha Indonesia no universidade iha Portugal.

Oras dadaun DIT iha fakuldade haat (4) no departamentu sanulu resin rua (12) iha knua Dili no knua Oekusi no formasaun halao mos Baucau. DIT hamuk staf nain 165 no 80% husi Staf sira ne’e hanesan Staf Akademiku, hodi serve no hanorin estudante hamutuk 8.500 husi knua DIT Dili no knua Oekusi. Numeru estudante ne’e la inklui estudante ne’ebe tuir formasaun no estudante programa naun baixarelatu ho lisensiatura. “Tan ne’e loron ohin wain ida, ohin hakarak tebes husi laran ho fuan, ami ho staff tomak, estudante tomak nia naran hakarak hato’o hatudu ami nia sentiment ami nia laran ksolok ba fundador sira,” nia hatete.  

Lia setidu hirak ne’e hodi oferese ba fundador DIT matenek nain husi timoroan nain sia (9) ne’ebé iha tinan 2002 harii DIT hodi fo mahon  boot ba hodi tane matenek atu servi nasaun rai doben Timor Leste. “Iha tinan sanulu resin rua nia laran susar no terus oioin DIT hasoru ksolok no hamnasa DIT goza susesu no onra rekoñesimentu. DIT buras ba nafatin belar ba nafatin, naran morin liu tan lemo lemo rai tomak, murak tomak hirak ne’e DIT hetan duni ona, tanba lideransa kmanek ida lia nain matenek no servi lolos,” katak reitor hodi informa  katak diskursu ne’e nudar diskursu ikus nian nu’udar reitor DIT tanba nia mandate sei hotu iha fulan Novembru tinan ne’e.
Reitor DIT Estanislau de Sousa Saldanha, informa objetivu hosi eventu festival arte kultura ne´ebé DIT halo primeiru atu selebra Dies Natalis DIT nian ba dala 12, segundu iha festival kultura ida ne´e hodi bele sensibiliza foin sae sira nia hanoin, sentimentu konaba nia kultura rasik, tamba tempu agora foin sira iha tendensia hakarak liu atu adopta kultura ho valor sira hosi rai liur. “Liu hosi kompetisaun ida ne´e halo ita nia jovem sira bele hadomi i bele konheserva hodi hametin liutan kultura iha ita nia rai hodi kompete fali ho ema seluk.


Ho nune´e estudante sira labele hanoin livro hodi estuda deit, labele hanoin siensia no teknolojia deit maibe estudante tenki aprende mos aspektu seluk hanesan kultura, valor, ho mal buat sira ne´e hotu hanesan parte integrante para estudante sira aban bainrua bele sai ema ida ne´ebe holistiku bele hare problema interligadu i bele rejolve problema ne´e interligadu sem nia hamosu problema seluk” Diretor afirma. Manan nain ba kompetisaun festival ne´e, ida ne´ebe sai hanesan primeiru lugar mak Eskola Sekundaria Saun Pedro, segundu lugar Eskola IT Vidau, terseiru lugar STM Becora, no kuartu lugar mak Eskola Saun Miguel. Nelson Sousa Guterres partisipante kompetisaun estudante hosi Saun Pedro hatete, nia sente kontenti teb-tebes tamba sira sai hanesan primeiru lugar, iha tinan kotuk sira hetan primeru lugar no sira bertahan nafatin ohin mos hetan fali primeru lugar. Sira nia preparasaun treinu durante semana 2 nia laran.

Iha parte seluk estudante IT Vidau,,, dehan mesmo sira hetan segundu lugar nia sente haksolok no orgulho tebes tamba iha tinan kotuk ne´e sira hetan terseiru lugar, significa katak ho sira nia esforsu ne´ebe mak iha ikus mai sira hakat sae tan eskada ida. Tempu preparasaun durante semana 2 liu. Ba aniversariu da-12 ne’e DIT konvida mos Universitas Katolik Widya Mandira Kupang ne’ebé reprezenta husi Vise Reitor ida no estudante balu. Iha eventu Dies Natalis ne’e, estudante universitariu ne’ebé reprezenta Unika Kupang ne’e sa’e mos palku leten hodi hananu aikananuk Timor Lorosa’e nian. Iha fatin hanesan dosente UNIKA Kupang nian, Flora Cempin ba BT dehan, sira haksolok tebes tanba hetan konvite hodi bele mai tuir serimonia ne’e, liuliu mai iha Timor-Leste.

Tuir nia katak liu husi dalan ne’e sira ho ensinu superior sira iha ne’e bele aprende malu, tulun malu entre komunidade Timor-Leste ho Indonezia espesial ho provinsia NTT. Nia temi numeru estudante husi UNIKA ne’ebé mai hamutuk na’in 20, na’in 10 feto no na’in 10 mane. Sira ne’e hotu husi departementu Sendratari, Seni Drama, Tari, Musik, Fakuldade ba Profesores no Siesnsia Edukasaun, ho dosente na’in 2 akompaña no Vise Reitor ida. Sira mai husi Kupang loron Kuarta 7 Maiu dader tuku 4 oras Kupang nian no  to’o iha  Dili tuku 10 kalan. Sira fila iha domingu (11/05). Estudante husi Unika Kupang ne’e feto sira lori babiduk (tarian) oin rua  hanaran tari Hegon no tari Dika Sasando. Tari Hegon husi Sika Maumere (Flores) ne’ebé haktuir babain uza ba simu liurai, entretantu tari Dika Sasando hanesan kreatividade babiduk ne’ebé foti husi bidu tradisional sira iha Rote, (Foti,Taibenu, no Keblai). (Business Timor)