Agustinho Gomes

Agustinho Gomes
DÍLI—Konstrusaun estrada protokolu husi Comoro mai Palásiu Prezidenti nia oin inklui trotoar halo komunidade hotu iha Kapitál Díli preokupa loos maibé ladauk ramata. Komunidade preokupa tanba projetu ne’ebé kaer husi kompañia sira grupu Konsórsiu Nasionál Timorense (CNT) ne’ebé halo rehabilitasaun iha tinan kotuk liu-ba (2012) ho durasaun fulan 3 de’it hodi prepara ba loron restaurasaun independénsia ba dala 10 no tomada de pose ba atuál Prezidenti Repúblika Taur Matan Ruak. Maske nune’e, tuir Diretór kompañia Tinolina nu’udar mós Vise prezidente CNT Agustinho Gomes esplika, projetu ne’ebé temi ne’e emerjénsia maibé nia karater diferensa. Agustinho Gomes ba jornalista BT iha edifísiu Ajénsia Dezenvolvimentu Nasionál (AND), Palásiu Governu, esplika katak projetu nia karater urjente tanba komemora 20 Maiu, maibé projetu emerjénsia katak antes fó dezeñu maibé projetu nia karater maka emerjénsia.

Nia esplika, rejistamentu tenke aprovasaun depois maka kontinua projetu hotu ne’ebé la’o iha Díli laran hanesan trotoar, estrada no median line (liña klaran). Nia dehan, trotoar ita hotu hatene katak iha fatin balun problema kona-ba rai no ema nia moru. Problema sosiál la’os fásil para ita atu rezolve tanba trotoar ne’e komplikadu teb-tebes no ita presiza tempu. Entretantu, diretór ADN hateten, konstrusaun estrada tuir duni estandar tanba estrada protokolu, ne’ebé hahú husi Comoro mai Palásiu Prezidenti nia oin no diresaun tasi ibun ne’e nia mahar 8 céntimu ne’ebé fiar katak sei dura.

Samuel Marcal

Samuel Marcal
Intrega ponte Aitarak-Laran
Iha oportunidade ne’e, Diretór KompañiaTinolina Agustinho Gomes informa katak uluk sira promete iha 20 April sira tenke intrega ponte iha Aitarak-Laran ba governu soké sira seidauk carload ponte kuak. Nia hatutan, ponte Comoro tuir oráriu tenke loke 20 Maiu, soké PM seidauk iha tempu atu disidi. Purtantu, iha dia 17 tenke prontu ona, maibé atu open tariff ne’e ita haree ladun di’ak halo fali seluk para ita inagura fali. Depois inagura hotu tiha maka halo open traif dala ida.

Nia esklarese tan katak, iha open tariff ne’e 20 Maiu, maibé tanba sr. PM sei ba Manatuto halo komemora loron restaurasaun independénsia iha ne’ebá (Manatuto), maibé sira sei tenta atu halo konfirmasaun ho sr. PM para projetu iha fulan ne’e tenke intrega ona. Nia hateten, PM maka sei inagura ponte ne’e. Inagura hotu tiha maka ita halo kontestu dala ida kona-ba estrada instituisaun fulan rua, tanba ita haree problema udan, sosiais nune’e ita presiza tempu.

Gomes esplika tan katak ponte Comoro II tuir duni tipu dezeñu, tanba ponte ida uluk ne’e sei sobu para foti ás halo hanesan.“Orsamentu ne’ebé halo projetu konstrusaun maka ponte Comoro II maka U$ 8.70,000.00 (Oitusentus seticentus mill), ponte Aitarak-Laran osamentu hamutuk 270,000.000 (duzentus setenta mill) no osamentu ba estrada no trotoár hamutuk 29,000. 000 (Vinte Nove mill),” nia tenik.  Iha parte seluk, Diretór ADN Samuel Marçal hateten, atu halo desizaun estensaun depende husi obras públikas atu foti desizaun ka lae. “Ami ADN ne’e só atu halo verifikasaun de’it ba kustu ou kualidade, agora kestaun kontratu atu mate ka moris ne’e só Ministériu Obras Públikus (MOP) maka kontrola,” Samuel dehan.

La’os la’o tarde
Diretór Ajénsia Dezenvolvimentu Nasionál hatutan katak konstrusaun edifísiu Minstériu Finansa (MF) la’o tarde oituan tanba problema ho rai. Rai komunidade sira ne’ebé uluk hela iha ne’ebá atu muda la muda. Nia hatutan, tanba ne’e maka ita atu muda ema ida husi fatin ida ne’e susar teb-tebes. Ne’e maka negosiasaun ne’e kuaze tinan ida resin, foin implementa tanba impaktu ne’e konstrusaun la’o tarde la’os problema tékniku.  Kona-ba persentajen ba konstrusaun edifísiu (MF), Samuel hateten, ninia tékniku sira seidauk fó dadus ba nia maibé nia prosesu sei la’o nafatin. Ema servisu loron no servisu kalan.(Fredy)