DÍLI----Timor-Leste nudar territóriu Timor-Leste konstituidu/kompostu husi parte loromonu tomak ilha Timor nian, ilha Ataúru ne’ebé hamriik iha parte norte kosta Díli nian, ilhéu ka ilha kiik Jako, iha liu ponta leste, no enklave Oekusi-Ambeno, iha kosta norte, parte Timór Indonézia.

Territóriu ne’e nia área totál mak besik 15 mil km², ho populasaun serka de 1,066,409 (Sensus 2010), i nia kapitál mak sidade Díli. Hare ba geografia ne’ebe iha, liga ba iha karateristiku Populasaun iha Timor-Leste ninian iha area Finanseiru defisil tebes atu halo poupansa tanbá maioria populasaun sempre moris ho kultura hanesan Fetosan no Umane. Maske ho kareter rai osan ne’ebe menus, liuhusi Banku Sentral Timor-Leste hamutuk ho Ministeriu Edukasaun Joventude no Desportu esforsu hodi kria koperasaun ida hodi implementa Projetu Pilotu ho naran Literasia Finanseiru.

Programa Literasia Finanseiru nudar dalan ida hodi hafanu Familia sira oinsa bele eduka sira nian an hodi rai osan liu husi programa ho naran “Hau Nia Futuru” ba labarik sira ho idade tinan 0 to’o tinan 18, programa refere Banku BSTL no MEJD kria koperasaun iha tinan 2016 hodi implementa iha eskola Ensinu baziku sira. Objetivu husi projetu atu oinsa bele Salva labarik sira nia futuru liuhusi programa Literasia Finanseiru ne’ebe mak iha no durante tinan 4 nia laran konsege implementa iha eskola balun iha teritoria Timor-Leste no total labarik sira ne’ebe eskola iha Ensinu Baziku iha teritoriu Timor laran tomak konsege rai sira nia osan sae ba to’o porsentu 14.

Husi numeru ne’ebe iha hatudu signifikativu tebes maske ema barak hare ba iha numeru refere kiik tebes. Tan ne’e ho durasaun ba implementasaun projetu Pilotu ho naran Literasia finanseiru ne’ebe iha BSTL no MEJD kontinua estende ba implementasaun programa refere ba iha eskola atus tolu resin iha teritoriu Timor-Leste hodi implementa programa refere. Tuir Governador Banku Sentral Timor-Leste (BSTL) Abraõ Vasconcelhos hateten katak BSTL ho MEJD kontinua estende Programa Projetu pilotu refere iha TL atu oinsa bele salva labarik sira nia futuru maske karater Populasaun laos ema rai osan maibe programa ida ne’e nudar dalan ida oinsa eduka populasaun sira bele rai osan ba sira nia oan nia futuru.

“Hanesan ita boot sira hatene iha fulan Juñu tinan 2016 Banku Sentral ho Ministeriu Edukasaun Asina MoU ida implementa programa Projetu Pilotu kona-ba Literasia Finanseiru no durante tinan 4 halao iha munisipiu hotu-hotu inklui RAEOA, Programa Projetu pilotu ne’e implementa iha eskola ensinu baziku no durante periodu ida ne’e, ekipa husi banku Sentral no husi Ministeriu Edukasaun estende programa ne’e laos deit ona iha eskola sira ne’ebe mak inisiu ne’e identifika maibe kontinua estende ba eskola sira hamutuk atus tolun resin mak implementa,” dehan Governador Banku Sentral Timor-Leste (BSTL) Abrão Vasconcelhos ba Jornalista sira iha edifisiu BSTL, Dili, Segunda (02/03).

Nia esplika katak BSTL ho MEJD kontinua hanaruk MoU refere tanbá hare ba nesesidade ida liu-liu iha planu futuru labarik sira nian. “Tan ne’e mak Ministeriu Edukasaun Joventude no Desportu ho Banku Sentral Timor-Leste hare iha nesesidade ida liu-liu iha planu Futuru ida hodi estende liutan, enves halo deit hanesan programa sampingan ida mais ida ne’e inkaixa iha programa kurikulun Ministeriu edukasaun ninian,” katak nia.

Tan ne’e Governador BSTL mos hateten programa refere BSTL ho MEJD hakarak atu establese diak liutan Tuir MOU ne’ebe mak iha no husi programa Refere konsege tama mos iha Kurikukum Ministeriu Edukasaun ninian. “Oinsa koperasaun ne’e halo nusa?, nia implementasaun ne’e lao oinsa, nia monitorizasaun ne’e nia lalaok halo nusa?, ida ne’e establese iha MoU nia laran.

Hau hanoin ba oin ida ne’e laos deit ba tinan 4 deit maibe ida ne’e sei kontinua nafatin ba oin hanesan Ministra Edukasaun hateten Tiha ona katak ne’e nudar komprimisiu Ministeriu ninian, atu garante labarik sira bele asesu ba informasaun ne’ebe mak diak kona-ba literasia finanseiru.” katak nia. Nia mos informa katak ninia implementasaun 14% husi labarik sira ne’ebe eskola hamutuk 35 mill resin mak partisipa ho 14% tanbá ho situasaun geografikamente Timor-Leste hanesan ita hotu hatene ne’e laos numeru kiikoan.

“Tan ne’e papel ministeriu Edukasaun importante tebes iha implementasaun ba iha programa literasia finanseiru iha Timor-Leste tanbá ida ne’e nudar asuntu ida ita hotu-hotu tenke trata laos deit banku Sentral ho Ministeriu Maibe ida ne’e ita tenke trata tanbá hanesan ministra ohin hateten katak ita nia Abitu ida rai osan ne’e laiha tanbá iha lia ruma mai ita gasta hotu kedas,” informa nia.

Iha biban ne’e mos Ministra Edukasaun Joventude no Desportu Dulce de Jesus hateten katak MEJD no BSTL kontinua Estende MoU refere atu melora diak liutan programa ne’ebe mak implementa iha VI governu ninian kona-ba Literasia fianseiru. Maske programa refere implementa la kobertura hotu ba estuda hotu maibe konsege hatudu ona porsentu 14 labarik sira ne’ebe eskola iha ensinu baziku iha teritoriu Timor Laran tomak mak rai ona sira nia osan iha banku.

Husi Numeru ne’ebe iha Ministeriu edukasaun garantia katak liu husi akordu ne’ebe BSTL ho MEJD iha bele servisu maks liutan atu nune’e iha eskola Terseiru Sikulu Ensinu baziku bele tama mos iha parte Kurikulu hodi eduka labarik sira bele kuinese diak liutan literasia finanseiru ne’ebe mak iha. Nia informa katak maske implementasaun programa refere iha eskola balun sei hasoru problema hanesan fasilidade maibe MEJD no Banku Sentral kontinua servisu maks hodi kria kondisaun hodi labarik hotu bele partisipa. (BT)