DÍLI----Kompañia Telekomunikasaun TELEMOR hala’o atividade Tour Eskola iha Universidade Nasional Timor-Leste (UNTL) ho nia objetivu oinsa bele lori benifisiu ba estudante sira liu husi produtu ne’ebé mak TELEMOR iha.

Magnifiku Reitor UNTL Francisco Miguel Martins hateten UNTL kria kooperasaun ho kompañia TELEMOR atu oinsá bele fó benifisiu ba Estudante sira ne’ebé ohin loron halo hela kareira nudár estudante iha Universidade refere.

“Servisu entre instituisaun rua ne’e iha area dizitalizasaun ninian atu fó benifisiu ba estudante sira ne’ebé mak agora eskola iha UNTL,” hatete Reitor Francisco Miguel Martins iha abertura ba atividade Tour Eskola ne’ebé mak TELEMOR hala’o iha Kampus UNTL, Tersa (25/02).

Nia esplika katak husi servisu hamutuk entre instituisaun rua ne’e atu bele fó benefisiu ba estudante sira liu-liu fasilita no eleva estudante sira nia kualidade liu husi uza internet ne’ebé sai mos fatin ba biblioteka dijitalizasaun inklui informasaun sira ne’ebé estudante sira presiza.

Tan ne’e liu husi servisu hamutuk ne’ebé iha reitor UNTL lori universidade nia naran hato’o obrigadu wain ba kompañia TELEMOR hodi halao ona atividade iha kampus Universidade, hodi ajuda ona estudante sira liu husi produtu ne’ebé mak iha. Iha biban ne’e mos Vice Diretor Kompañia TELEMOR Nyuyen Ngoc Tu agradese ba iha UNTL ne’ebé bele fasilita ona fatin hodi realize atividade Tours eskola 2020.

“Ha’u hakarak agradese ba Magnifiku Reitor UNTL ne’ebé konsege fó ona espasu ba ami hodi ami nia programa realize iha Resintu Universidade nian ba dala rua ona,” dehan nia. Nia dehan kompañia TELEMOR kontinua nafatin oinsa bele ajuda estudante sira liu husi produtu ne’ebé mak TELEMOR iha hodi hasa’e liu tan koñesimentu estudante sira ninian.

Iha fatin hanesan estudante husi Universidade UNTL Maria Soares sente orgullu ho atividade ne’ebé mak realize husi Kompañia TELEMOR iha resintu UNTL. “Hau orgullu ho sira nia atividade ohin ninian tanbá sira mai la’os deit buka lukru maibe sira mai mos ajuda ita timoroan sira liu-liu ami estudante sira,” katak nian. Nia apresia ho TELEMOR nia Produtu tanbá bele ajuda estudante sira hodi halo registu ba simcard estudante sira, inklui mos fasilita pulsa kada loron oinsa bele utilize hodi halo kontaktu ba familia no parente sira relasaun ho estudu ninia.

Tuir observasaun BT katak iha programa ne’ebé TELEMOR halo ho Naran School Tour 2020 halao mos atividade seminariu hodi konvida orador balun hodi fahe informasaun ba estudante sira, halao mos atividade Registu Sincard ba estudante sira, fahe mos informasaun ba produtu TELEMOR nian hanesan Mosa nomos produtu sira seluk tan, inklui mos atividade Kuis mos. Iha atividade ne’e hetan apresiasaun boot husi estudante sira no estudante barak mak halo registu sira nia simcard ba produtu TELEMOR nian ne’ebé mak iha. (BT)