DÍLI----Lay Siu Hing ne’ebé nudar nain ba Kompaña Star King Group planu sei harii Klinika Fuan iha Timor-Leste oinsa bele fó atendimentu ba iha sidadaun rai laran nomos rai liur ne’ebe mai iha Timor-Leste wainhira hetan moras Fuan.

Planu harii Klinika Fuan ne’e sei servisu hamutuk ho Klinika DMC atu oinsa bele harii klinika fuan iha Timor-Leste ne’ebe oras ne’e hahú prepara ona nia konstrusaun iha Dili. “Hau agora planu hela hodi servisu hamutuk ho DMC atu loke klinika kona-ba fuan nian atu oinsa bele fó atendimentu ba ita nia publiku ne’ebe mak moras fuan,” Lay Siu Hing ba BT iha knar fatin Audian, Dili, Kinta (06/02).

Nia dehan rajaun ne’ebe halo nia hodi harii klinika Fuan tanbá durante ne’e timoroan sira hetan moras fuan sempre lori ba iha rai liur hodi halo tratamentu ba moras ne’ebe mak iha. “Durante ne’e ita nia emar sira moras sempre halai ba iha rai liur tan ne’e agora hau koko hodi halo investimentu ba Klinika Fuan oinsa bele fó tratamentu ba ita nia sidadaun sira ne’ebe mak moras tanbá durante ne’e ita gasta osan barak hodi halo tratamentu,” katak nian.

Nia dehan planu sei harii klinika fuan maibé wainhira iha prosesu ne’ebe diak mak sei haboot liutan investimentu refere iha futuru oin mai. Nia mos afirma katak investimentu refere oras ne’e hahú tama ona fase konstrusaun ne’ebe lokaliza iha Audian ne’ebe antes ne’e sai fatin ba faan Motor ninian.

“Investimentu ne’e ita halo iha Audian ne’ebe uluk hau faan motor ninian ne’e no klinika ne’e sei empreza mos doutor timoroan sira ne’ebe mak iha atu oinsa bele halo tratamentu ba pasiente sira,” katak nia. Lay Siu Hing klarifka katak hosi investimentu refere ohin loron lao ona no planu sei gasta millaun $2 ne’ebe sei gasta deit ba konstrusaun ninian inklui mos sei hola ekipamentu mediku fuan ninian.

Nia informa katak hosi investimentu refere sei fó kontribuisaun ba nasaun Timor-Leste mak hanesan Fó reseita ba Estadu nomos sei hasae kualidade rekursu humanu TL liu-liu doutor fuan ninian. Tuir Observasaun katak oras ne’e dadaun kompaña hahú ona namanas halo konstrusaun ba fatin Klinika fuan ninian maske iha rai laran ekonomia rai laran sei iha problema nia laran inklui mos problema politika. (BT)