DÍLI----Relasiona ho situasaun politika ne’ebé ohin loron lao iha Timor-Leste hahú fó amiasa ba setór privadu nasionál no internasionál tanbá ho situasaun krize governasaun ne’ebé durante ne’e mósu hahú hatauk setór privadu sira nia investimentu.

Tanbá hosi situasaun ne’ebé iha Empreza sira barak mak tauk hahú amiasa atu taka sira nia investimentu iha Timor-Leste tanbá laiha ona rendimentu ne’ebé diak atu bele selu traballador sira inklui mós hodi selu Eletrisidade nomós selu taxa ba Estadu.

Tuir Diretor Exekutivu Servisu Registu no verifikasaun Emprezariál (SERVE) Florencio Sanches hateten katak situasaun ne’ebé lao iha Timor-Leste setór privadu sira ne’ebé ohin loron iha interese hakarak halo investimentu hahú trauma atu halo investimentu iha Timor-Leste.

Tanbá ohin loron situasaun refere afeita ba Emprezáriu Nasionál no Internasionál sira, hodi halo investimentu iha Timor-Leste inklui empreza sira ne’ebé kleur ona halo investimentu amiasa retira sira nia Investimentu.

“Ami hanoin ba tinan rua kotuk, ita konsege pasa ne’e la’o diak, maibé ba tinan ida ne’e a’at liu, emprezáriu sira husu SERVE hakarak atu taka sira nia kompaña,” dehan Diretór SERVE Florencio Sanches, ba BT iha nia kn’ar fátin PALM Business & Trade Centre, Hudi-Laran, Kuarta (22/01).

Diretór Exekutivu SERVE Esplika Emprezáriu Nasionál ohin loron porsentu walunulu resin lima (85%) mak sei depende ba Orsamentu Jerál Estadu (OJE), no halo komparasaun ho nasaun dezenvolvimentu sira, tanbá Nasaun avansadu Setór Privadu la interese liu ba Orsamentu Jerál Estadu.

“Maibé hau mós komprende tanbasá mak saí hanesan ne’e, tanbá ita nia Empresáriu sira 85% depende ba OJE ida ne’e mak ladi’ak, nasaun sira seluk sira lainterese liu OJE, tanbá Setór Privadu sira fórti ona. Nia mós afirma katak ohin loron situasaun ne’ebé lao iha Timor-Leste setór privadu sira taridu tanbá rendimentu atividade hotu hahú amiasa tun husi %50 ba %30 no hosi Porsentu 30 ba Porsentu 15.

“Situasaun ne’ebé lao ita nia Emprezáriu nia rendimentu Agora tun tebés, ne’ebé mak menus ona 30%, Menus dalaruma 20% tun tan 15%, agora tinan ida ne’e normalmente ita nia Kompaña Nasionál timoroan rasik seida’uk mai, maibé Kompaña Internasionál sira, liu-liu Kompaña Internasionál sira ne’ebé mak halo investimentu kleur ona iha Timor mai tiha ona atu taka, tanbá sira hakfódak ho situasaun ida ne’e,” katak nia.

Nia klarifika katak situasaun tinan 2019 diak uituan halo komparasaun iha tinan 2018 ne’ebé mak SERVE konsege simu pedidu hosi empreza sira hatama pedidu taka besik 100, maibé tinan ida ne’e konsege iha maibé sei hare situasaun ne’ebé ohin loron lao. “Osan ne’ebé mak atu tama laiha ona, selu hau nia funsionáriu timoroan sira 100% ba fóti osan iha ne’ebé, uluk ema lamai toba fátin mós, atividade Governu nian iha nafátin, hodi ami bele hetan osan oituan,” katak nian.

Nia mós infórma katak situasaun nee’ebe lao konsege fó ona impaktu ba investimentu boot sira ho millaun $25 hahu husu retira nia nia kompaña iha SERVE tanbá trauma ho situasaun ne’ebé mak ohi loron lao iha TL.

“Hosi lokál ita timoroan ne’e seida’uk, maibé sira hosi investimentu boot komesa iha tiha ona, hau hatene katak, sira nain tolu ninia investimentu kuaze $25 Milioens maibé SERVE kontinua enkoraza empreza sira oinsa bele halao nafatin atividade tanbá situasaun sei solusiona iha tempu ruma nia laran.

“Hau hateten ita boot sira, ne’ebé mak hakarak tama ne’e, ami hare imediata lolos Merkadu ne’ebé mak di’ak, tanbá Timor-Leste membru ba CPLP, ne’ebé mak odamatan ba Europa, bainhira situasaun Timor-Leste bele la’o di’ak, Emprezáriu Inrternasionál mai investe iha area turizmu nian, tanbá ne’e mak SERVE seí trava sira, labele taka kompaña, tanbá polítika Governu nian, atu promove iha área Turizmu nian atu hasa’e tan,” infórma nia.

Maibé ho situasaun ne’ebé lao durante tinan 3 nia laran hahú hosi tinan 2017 to’o tinan 2019 konsege lori impaktu negative ba rendimentu atividade komersiu ne’ebé ladun estavel iha Timor-Leste.

Tuir Nain ba Jacinto Departamentu Store Claricia Lay hateten katak ho situasaun Politika ne’ebé lao iha Timor-Leste konsege fó impaktu ba sira nia rendimentu atividade Komersiu tanbá iha tinan 2018 rendimentu konsege tun ba iha 60% to’o iha tinan 2019 maibe iha tinan 2019 situasaun lao konsege tun ba iha porsentu 30.

“Iha fulan Agostu tinan 2019 ita hare komesa sae fali hodi rekopera fila fali ba 50% maibé iha fulan Novembru ladun kapas maibé Dezembru diak fali, mungkin ema mai hosi liur no balun haruka osan mai no konsege diak maibé agora sei tun fila-fali,” dehan Claricia Lay ba BT iha nia Knar fatin Kuluhun, Díli, Kinta (16/01).

Nia dehan depois rekoperasaun iha tinan ikus tanbá ho selebrasaun loron boot Natál no tinan Foun maibé ho situasaun ne’ebé mak iha rendimentu Komersiu amiasa sei tun fila-fali ba iha pursentu 30. Bainhira rendimentu atividade Komersiu empreza sira nia tun mak sei fó inpaktu ba iha salariu funsionariu sira nian tanbá laiha Orsamentu atu belé selu funsionariu sira.

“Ho situasaun ne’ebé iha ami hanoin iha fulan Janeiru ami labelé selu Staf sira tanbá laiha osan tan ne’e ita presiza tebes iha Orsamentu Jeral Estadu oinsa belé fó inpaktu ba dezenvolvimentu Timor-Leste,” katak nia. Nia mós afirma katak ho governu sobra Orsamentu Jeral sei fó impaktu mós ba vida povu nian tanbá laiha rendimentu seluk ne’ebé belé troka Orsamentu Jeral ne’ebé mak iha.

“Tanbá Timor-Leste laiha rendimentu seluk ne’ebé mak belé ajuda Orsamentu Jeral Estadu ne’ebé mak iha,” katak nia. Tan ne’e nia dehan wainhira koalia kona-ba ekonomia iha ligasaun ho area oin-oin hanesan Investimentu sira maibé ho situasaun ne’ebé iha halo setór privadu sira ne’ebé empréga ema servisu sei hasoru problema.

“Sira tenke tau Politika labelé a’as liu Ekonomia nasaun ninian maibé ekonomia tenke a’as liu tanbá politika ne’e tuir situasaun tanbá ba ema lubun ida maibé povu barak liu ba sira.

Iha ema ida rua halo hodi afeita ba ema barak nia moris liu-liu ami setór privadu koalia hanesan ne’e tanbá kalan ami toba la dukur no ami mos tauk saida mak akontese, ita hotu hare katak iha tinan 2 ka 3 konsege troka dala 3 ona, depois ida ne’e ba ami shok teb-tebes tanbá ami ne’ebé responsabilidade ba kampu traballu susar tebes ho situasaun ida ne’e,” infórma nia.

Alende ne’e mós Prezidente Camara Comersiu Industria Timor-Leste (CCI-TL) Oscar Lima hateten katak ho situasaun ne’ebé durante ne’e lao konsege fó afeitasaun ba iha rendimentu atividade empreza sira nian, ne’ebé halao atividade iha Komersiu.

“Koalia lolos ita nia rendimentu komersiu tun teb-tebes iha Timor-Leste tanbá sasan ne’ebé sira hatama mai kontentor 4 ka 5 maibe atu hotu ne’e kleur la halimar, hosi ami nia levantamentu ba iha Señor Akam ho nia Grupu ne’e mós tun makas no ida ne’e mak situasaun ne’ebé ohin loron lao iha rai laran,” dehan Oscar Lima ba BT iha nia knar fatin, Acait, Kinta (16/01).

Nia dehan hosi rendimentu ne’ebé iha konsege prejudika hodi halo empréga balun retira hosi registu SERVE tanbá laiha atividade inklui mós laiha osan hodi selu Taxa ba Estadu.

“Se nia la taka risku ne’e nafatin, tan ne’e taka tiha bainhira iha fali osan mak nia belé loke halo fali atividade, se nia halo kios ida, halo restorante ida ema laba han maske nia gasta tiha osan 100 mill hodi harii restorante no ema laba han no nia osan la fila entaun diak liu taka tiha duke loke kria fali tusan ba fali nia,” Afirma nia.

Prezidente CCI-TL Oscar Lima mós infórma katak ho situasaun ne’ebé ohin loron lao sei afeita makas liuba iha empreza sira nia atividade tantu empreza nasionál nomós empreza Internasional. Tanbá tuir levantamentu CCI-TL hatudu katak empreza sira nia rendimentu iha komersiu sei tun ba porsentu 40 no posibilidade belé tun to’o pursentu 30. (BT)